ރައީސް ޞާލިހު ކުޑަކުދިންގެ ދުވަހުގެ ތަހުނިޔާ އަރިސް ކުރައްވައިފި
ބަލިން ރައްކާތެރިވުމަށް ކުރަންޖެހޭ މަސައްކަތްތައް ކޮށްދެއްވާނެ
ރައީސުލްޖުމްހޫރިއްޔާ އިބްރާޙިމް މުޙައްމަދު ސޯލިޙު- ކުޑަކުދިންގެ ޙައްޤުތައް ރައްކާތެރި ކުރައްވާނެ ކަމުގެ ފުރިހަމަ ޔަޤީންކަން އެމަނިކުފާނު ދެއްވާފައިވޭ
މިއަހަރުގެ ކުޑަކުދިންގެ ދުވަހުގެ ތަހުނިޔާ ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙު އަރިސް ކުރައްވައިފިއެވެ.
ޤައުމީ ކުޑަކުދިންގެ ދުވަހުގެ މުނާސަބަތުގައި ރައީސް ކުރެއްވި ޓްވީޓެއްގައި ވިދާޅުވީ، ދުވަހުގެ ތަހުނިޔާ ހުރިހާ ކުޑަކުދިންނަށްވެސް އަރިސްކުރައްވާ ކަމަށާއި، ކުޑަކުދިންގެ ސަލާމަތާއި ރައްކާތެރިކަމަށް ކުރައްވާ މަސައްކަތްތަކާއި ކަނޑައަޅާފައިވާ ލަނޑުދަނޑިތައް ޙާޞިލު ކުރައްވާނެ ކަމުގެ ޔަޤީންކަން ދެއްވާ ކަމަށެވެ.
ޚާއްޞަ ގޮތެއްގައި ކޮވިޑް-19 ގެ ބަލިމަޑުކަން ފެތުރެމުންދާ މި ދަނޑިވަޅުގައި ބަލިން ރައްކާތެރިވުމަށް ކުރަންޖެހޭ މަސައްކަތްތައް ކޮށްދެއްވުމުގެ އިތުރުން، އެ ކުދިންނަށް އުފާވެރި މުސްތަޤްބަލެއް ހޯއްދަވައި ދެއްވުމަށް މަސައްކަތް ކުރައްވާނެ ކަމަށް ވިދާޅުވެފައިވެއެވެ. އެގޮތުން ދުޅަހެޔޮ ރަނގަޅު ކާނާއާއި، ތަޢުލީމުގެ އިތުރުން، އަނިޔާއިން ރައްކާތެރި ކޮށްދެއްވުމަކީ ޢަމާޒެއްކަމަށް ރައީސުލްޖުމްހޫރިއްޔާ ވިދާޅުވެފައިވެއެވެ.
ކޮންމެ އަހަރެއްގެވެސް މއި މަހުގެ 10 ވަނަ ދުވަހަކީ ޤައުމީ ފެންވަރެއްގައި ފާހަގަކުރާ ކުޑަކުދިންގެ ދުވަހެވެ.
