ބާސެލޯނާ އާއެކު ހަދާފައިވާ އެއްބަސްވުން ހަމަނުވަނީ އެހެން ކްލަބަކަށް ބަދަލުނުވާނެ ކަމަށް ކްރޮއޭޝިއާގެ މިޑްފީލްޑަރު އިވާން ރަކިޓިޗް ބުނެފިއެވެ.
ރަކިޓިޗް ބާސާއާއެކު ހަދާފައިވާ އެއްބަސްވުން 2021 ވަނަ އަހަރު ހަމަވާއިރު، އޭނާގެ ރިލީޒް ފީއަކީ 125 މިލިއަން ޔޫރޯއެވެ. ރަކިޓިޗްގެ އެއްބަސްވުން އާކުރަން ބާސާ އިން އަދި މިހާތަނަށް މަޝްވަރާ ކޮށްފައެއް ނުވެއެވެ.
މީގެ ކުރިން ރަކިޓިޗް ވަނީ ޖެނުއަރީ މަހު ބާސާ ދޫކޮށްލަން ވިސްނި ކަމަށްވެސް ބުނެފައެވެ. އޭނާ ހޯދުމަށް ޖެނުއަރީ މަހު ޔުވެންޓަސް އާއި އިންޓަ މިލާނުން ވަނީ މަސައްކަތް ކޮށްފައެވެ. އަދި ބައެއް މީޑިއާތަކުން ވަނީ ނޭމާ އަނބުރާ ހޯދުމަށް ރަކިޓިޗް ޕީއެސްޖީއަށް ވިއްކާލަން އުޅުނު ކަމަށްވެސް ރިޕޯޓުކޮށްފައެވެ.
އެކަމަކު ރަކިޓިޗް ބުނީ ބާސާގައި ހުރީ އުފަލުން ކަމަށާއި، ކްލަބާއެކު ހަދާފައިވާ އެއްބަސްވުމާ އެއްގޮތަށް އަމަލުކުރަން ބޭނުންވާ ކަމަށެވެ. އެހެންކަމުން އެއްބަސްވުމުގެ މުއްދަތު ހަމަނުވަނީސް އެހެން ކްލަބަކަށް ބަދަލުނުވާމެ ކަމަށް ރަކިޓިޗް ބުންނެވެ.
ބަސެލް އިން ސީނިއަރ ކެރިއަރު ފެށި ރަކިޓިޗް ވަނީ ޝާލްކޭ އާއި ސެވިއްޔާ އަށް ވެސް ކުޅެފައެވެ. އޭނާ ބާސާ އަށް ބަދަލުވީ 2014 ވަނަ އަހަރުގެ ސީޒަނުގައެވެ.
އެގޮތުން ރަކިޓިޗް ވަނީ މިހާތަނަށް ބާސާއަށް ކުޅުނު 299 މެޗުގައި 35 ލަނޑު ކާމިޔާބުކޮށްފައެވެ. އޭނާ ވަނީ ބާސާ އާއެކު ސްޕެނިޝް ލީގު ތިން ފަހަރު، ސްޕެނިޝް ކަޕް ހަތަރު ފަހަރު، ސްޕެނިޝް ސުޕަރ ކަޕް ދެ ފަހަރު، ޔުއެފާ ޗެމްޕިއަންސް ލީގު އެއް ފަހަރު، ޔުއެފާ ސުޕަރ ކަޕް އެއް ފަހަރު އަދި ފީފާ ކްލަބު ވޯލްޑް ކަޕް އެއްފަހަރު ކާމިޔާބު ކޮށްފައެވެ.
