މިއީ އެހެން ބަޔަކަށް ހޯދޭނެ ތިން ޕޮއިންޓެއް ނޫން : ސުޒެއިން

މާޒިޔާ އަތުން މި ހޯދުނު 3 ޕޮއިންޓަކީ އެހެން ބަޔަކަސް ހޯދޭނެ 3 ޕޮއިންޓެއް ކަމަށް ގަބޫލު ނުކުރާ ކަމަށާއި، މިއީ އަނެއް ބުރަށް ދާން ބަލާއިރު ވަރަށް މުހިންމު 3 ޕޮއިންޓު ކަމަށް ވިކްޓްރީ ސްޕޯޓްސް ކުލަބުގެ ކޯޗް ޢަލީ ސިޒެއިން ބުނެފިއެވެ.

އެސްޓީއޯ މާލެ ލީގުގެ ދެވަނަ ބުރުގެ ފުރަތަމަ މެޗުގައި މާޒިޔާ އަތުން މޮޅުވި މެޗަށްފަހު ވާހަކަ ދައްކަމުން ވިކްޓްރީގެ ކޯޗް ސުޒެއިން ބުނީ، މިވަރުގެ ތިން ޕޮއިންޓް ވިކްޓްރީއަށް ފަސޭހައިން ނުލިބޭނެކަން އެންމެންވެސް ގަބޫލު ކުރާނެ ކަމަށާއި، އެހެންކަމުން މިއީ ވިކްޓްރީ އިތުރަށް ކުރިއަށްދާން ލިބުނު ވަރަށް ބޮޑު ހިތްވަރެއް ކަމަށެވެ. އަދި ސުޒެއިން ވަނީ މެޗުގައި ވިކްޓްރީގެ ކީޕަރު އިމްރާންގެ ފަރާތުން ފެނުނު މޮޅު ކުޅުން ފަހަގަ ކޮށްފައެވެ. އެގޮތުން ސުޒެއިން ބުނީ، ޖުމްލަކޮށް ބުނާނަމަ މެޗުގައި ފެނިގެންދިޔައީ ވިކްޓްރީގެ ކުޅުންތެރިންގެ ޓެކްނިކަލް ޑިސިޕްލަން ހިފެހެއްޓުމުގެ ބަޔާއި ކީޕްރު އިމްރާންގެ މޮޅު ކުޅުން ކަމަށެވެ.

އިތުރަށް ވާހަކަ ދައްކަމުން ސުޒެއިން ބުނީ، ލީގުގެ ފުރަތަމަ ބުރުގައި ވިކްޓްރީއަށް ގެއްލެން ނުވާވަރުގެ 2 ޕޮއިންޓް ގެއްލިފައި ވާކަމަށައި، އެހެންކަމުން އެ ޕޮއިންޓްތަށް ރިކަވާކުރުމަށް މިއަށްވުރެ މުހިންމު ތިން ޕޮއިންޓެއް ލިބޭނެ ކަމަށް ގަބޫލު ނުކުރާ ކަމަށެވެ. އަދި މި ތިން ޕޮއިންޓްގެ ސަބަބުން ޓީމުގެ މޯޓިވޭޝަން ވަރަށް ބޮޑަށް ރަނގަޅު ވާނެ ކަމަށްވެސް ސުޒެއިން ވަނީ ބުނެފައެވެ.

މާލެ ލީގުގައި މި ސީޒަނުގައި މިހާތަނަށް މާޒިޔާ ބަލިކުރެވުނު ހަމައެކަނި ޓީމަކީވެސް ވިކްޓްރީކަންވެސް ފަހަގަ ކޮށްލެވެއެވެ.