ޗެލްސީ ދޫކޮށްލުމަށްފަހު ދިޔަޔަސް ދާނީ ސްޕެއިންގެ ކްލަބަކަށް ކަމަށް ޗެލްސީއަށް ކުޅެމުން އަންނަ ސްޕެއިންގެ ފޯވާޑް ޑިއެގޯ ކޯސްޓާ ބުނެފި އެވެ.
އާސެނަލް އަތުން 1-2 ގެ ނަތީޖާއިން ޗެލްސީ ބަލިވި މެޗަށްފަހު ނޫސްވެރިންނަށް މައުލޫމާތު ދެމުން ކޯސްޓާ ބުނީ ކްލަބާއެކު އޭނާ ހެދި އެއްބަސްވުމުގައި އަދިވެސް ބާކީ ދެ އަހަރު އެބަ އޮތް ކަމަށާއި، މުއްދަތު ހަމަނުވަނީސް ކްލަބް ދޫކޮށްލުމުގެ ވިސްނުމެއް އޭނާ ނުގެންގުޅޭ ކަމަށެވެ.
އެހެންނަމަވެސް ކޯސްޓާ ބުނީ އޭނާއަށްވުރެ އެހެން ސްޓްރައިކަރަކަށް ޓީމުގައި އިސްކަންދީ، އޭނާ އަށް ކުޅެން އެކަށީގެންވާ ވަގުތު ނުދޭނަމަ ކްލަބް ދޫކޮށްލާނެ ކަމަށެވެ. އެގޮތުން އޭނާ ބުނީ އެފަދަ ހާލަތެއްގައި ބަދަލުވިޔަސް ބަދަލުވާނީ ސްޕެއިންގެ ކްލަބަކަށް ކަމަށާއި، އެހެން ގައުމަކަށް ކުޅުމުގެ އެއްވެސް ހިޔާލެއް ނެތް ކަމަށެވެ.
މީގެއިތުރުން ކޯސްޓާ ބުނީ ޗެލްސީން އޭނާ ވިއްކާލާނަމަ އެ ވިއްކަން ޖެހޭ ކްލަބެއް އެނގޭނީ ޗެލްސީއަށް ކަމަށެވެ.
މިދިޔަ ޖެނުއަރީ ޓްރާންސްފާގަވެސް ޗައިނީޒް ސުޕާ ލީގުގެ ކްލަބްތަކުން ކޯސްޓާ ހޯދުމަށް މަސައްކަތްކޮށްފައިވާއިރު، އޭނާ ވަނީ އެ ހުށަހެޅުންތައް ރިޖެކްޓްކޮށްފައެވެ. ޗައިނާ ކްލަބްތަކުގެ އިތުރުން ޔޫރަޕްގެވެސް ގިނަ ކްލަބްތަކުން އަންނަނީ ކޯސްޓާއަށް ފާރަލަމުންނެވެ.
އެޓްލެޓިކޯ މެޑްރިޑް ދޫކޮށްލުމަށްފަހު 2014 ވަނަ އަހަރު ޗެލްސީއާ ގުޅުނު ކޯސްޓާ ވަނީ މިވީތަނަށް އެޓީމަށް ކުޅުނު 119 މެޗުގައި 58 ލަނޑު ކާމިޔާބުކޮށް، އެޓީމާއެކު ޕްރިމިއާ ލީގު ދެފަހަރު އަދި ލީގް ކަޕް އެއްފަހަރު ކާމިޔާބުކޮށްފައެވެ.
