ޗެލްސީގެ ކުޅުންތެރިންނަށް އެކަނި ތަމްރީނުތައް ހަދަން ފުރުސަތުދީފި

ޗެލްސީގެ ކުޅުންތެރިންނަށް އެކަނި، އެކްލަބުގެ ޓްރެއިނިން ސެންޓަރުގައި ތަމްރީނުތައް ހެދުމުގެ ފުރުސަތު ދީފިއެވެ.

ނޮވެލް ކޮރޯނާވައިރަސް (ކޮވިޑް-19) އާ ގުޅިގެން މެދުކަނޑާލާފައިވާ އިނގިރޭސި ޕްރިމިއަރ ލީގު އަލުން ފެށުމަށް މަސައްކަތް ކުރަމުން އަންނައިރު، ބައެއް ކްލަބުތަކުން ދަނީ ކުޅުންތެރިން އެކަނި ތަމްރީނުތައް ހަދަން ފުރުސަތު ދެމުންނެވެ. ލީގު އަލުން ފަށާނެ ތާރީޚެއް އަދި ކަނޑައަޅާފައި ނުވި ނަމަވެސް، ޗެލްސީން ވަނީ އެ ކްލަބުގެ މެލްވުޑް ޓްރެއިނިން ސެންޓަރުގައި ކުޅުންތެރިންނަށް އެކަނި ތަމްރީނުތައް ހެދުމުގެ ފުރުސަތު ދީފައެވެ.

އެއާއެކު ޗެލްސީގެ ބައެއް ކުޅުންތެރިން ވަނީ ޓްރެއިނިންގ ސެންޓަރުގައި ފަރިތަ ކޮށްފައެވެ. ޗެލްސީން ބުނީ ކުޅުންތެރިން ޓްރެއިނިންގ ސެންޓަރުގައި އުޅޭއިރު އިޖުތިމާއީ ގައިދުރުކަމުގެ ގަވާއިދަށް ހުރިހާ ވަގުތެއްގައި ވެސް އަމަލުކުރަން ޖެހޭނެ ކަމަށާއި، ސަރުކާރުން ކަނޑައަޅާފައިވާ އުސޫލުތަކަށް ތަބާވާން ޖެހޭނެ ކަމަށެވެ.

ޗެލްސީގެ ކުޅުންތެރިންނަށް އެކަނި ތަމްރީނު ހެދުމުގެ ފުރުސަތު ދިންއިރު، މީގެ ކުރިން އެ ކްލަބުގެ ބޭރު ކުޅުންތެރިން އެނބުރި އިންގްލެންޑަށް އައުމަށް ވަނީ އަންގާފައެވެ.

ޗެލްސީގެ ކުޅުންތެރިންނަށް އެ ކުލަބުގެ ޓްރެއިނިން ސެންޓަރުގައި އެކަނި ތަމްރީނުތައް ހެދުމުގެ ފުރުސަތު ދިންއިރު، މީގެ ކުރިން ލިވަޕޫލާއި، އާސެނަލާއި، ޓޮޓެންހަމް ހޮޓްސްޕާ އަދި ވެސްޓްހޭމް ޔުނައިޓެޑުން ވަނީ ކުޅުންތެރިން އެކަނި ތަމްރީނުތައް ހެދުމުގެ ފުރުސަތު ހުޅުވާލާފައެވެ. އަދި ބްރައިޓަން އާއި، ކްރިސްޓަލް ޕެލަސް އާއި، ވުލްވްސް އަދި ޝެފީލްޑް ޔުނައިޓެޑުގެ ކުޅުންތެރިން ވަރަށް އަވަހަށް އެކަނި ތަމްރީނުތަކަށް ނުކުންނާނެ ކަމަށް ރިޕޯޓުތައް ބުނެއެވެ.

ކޮވިޑް-19 އާ ގުޅިގެން މިދިޔަ މާރޗު މަހުގެ 8 ވަނަ ދުވަހު އިނގިރޭސި ޕްރިމިއަރ ލީގުގެ ކުޅުން މެދުކަނޑާލިއިރު، ޖޫން މަހު އިނގިރޭސި ޕްރިމިއަރ ލީގު އަލުން ފަށަން އަންނަނީ ތައްޔާރުވަމުންނެވެ. އެގޮތުން ޕްރިމިއަރ ލީގުގެ މެޗުތައް ސަޕޯޓަރުން ނުވައްދާ ކުޅޭގޮތަށް ޖޫން މަހުގެ 8 ވަނަ ދުވަހު ފަށައި، ޖުލައި މަހުގެ 27 ވަނަ ދުވަހަށް ލީގު އެއްކޮށް ފުރިހަމަކުރަން އަންނަނީ މަސައްކަތް ކުރަމުންނެވެ.