މާލޭގައި އިމާރާތް ކުރުމުގެ މަސައްކަތް ކުރަން ހުއްދަ ދޭން ފަށައިފި
ކޮވިޑް-19 ގެ އެއްވެސް އަލާމާތެއް ހުރި މީހަކު ސައިޓައް ނުނެރުން ހިމެނޭ
މާލެ ސިޓީ މަތިން ނަގާފައިވާ މަންޒަރެއް
މާލޭ ސިޓީގެ ލޮކްޑައުން ކުރުމާއި ގުޅިގެން ހުއްޓާލެވިފައިވާ އިމާރާތްކުރުމުގެ މަސައްކަތްތަކުގެ ތެރެއިން ކަނޑައެޅިފައިވާ މިންގަޑަށް ފެތޭ ތަންތަނުގެ މަސައްކަތް އަލުން ފެށޭނެ ގޮތް ހަމަޖައްސައިފި އެވެ.
މާލެ ސިޓީ ކައުންސިލުން ވަނީ އަލުން އިމާރާތް ކުރާން ހުއްދާ ދޭ ތަންތަނަށް ހާއްސާ އުސޫލެއް އެކުލަވާލާފަ އެވެ. އެ އުސޫލުގައި ވާގޮތުން މަސައްކަތައް ނެރޭ މީހުންނަކީ އެކަށީގެންވާ ގައިދުރުވެގެން ތިބެވޭނެ ގޮތަށް ބެލެހެއްޓޭވަރުގެ އަދަދަކަށް ވުމާއި، ކޮވިޑް-19 އަށް ޕޮޒިޓިވް ވެފައި ހުރި މީހަކު ނުވަތަ އެފަދަ މީހެއްގެ ކޮންޓެކްޓެއްގެ ގޮތުގައި ހުރި މީހަކު އައިސޮލޭޝަން ފުރިހަމަކޮށްފައި މެނުވީ މަސައަކަތަށް ނުނެރުމާއި، ކޮވިޑް-19 ގެ އެއްވެސް އަލާމާތެއް ހުރި މީހަކު ނުނެރުމާއި، މަސައްކަތު ގަޑީގައިވެސް އަދި އެހެން ގަޑިތަކުގައިވެސް، އެމީހަކު މަސައްކަތްކުރާ ތަން ނޫން އެހެން ތާނަކަށް ނުގެންދިއުމާއި މިފަދަ ކަންތައްތައް ހިމެނެ އެވެ.
ސިޓީ ކައުންސިލްގެ އުސޫލުގައި ރައްކާތެރިކަމުގެ ގޮތުން އަޅަންޖެހޭ ފިޔަވަޅުތަކެއްވެސް ވަނީ ފާހަގަކޮށްފަ އެވެ. އެގޮތުން މަސައްކަތުގައި އުޅޭއިރު ގައިދުރުކަން ބެހެއްޓުމާއި، ހެވީ ޑިއުޓީ މާސްކާއި އަންގި ބޭނުންކުރުމާއި، ގިނައިން އަތްދޮވުމަށް ބާރުއެޅުމާއެކު އެ އިންތިޒާމް ހަމަޖެއްސުމާއި، މަސައްކަތަށް މުވައްޒަފުން ސައިޓަށް ނެރޭއިރު ކުންފުނީގެ ޔުނިފޯމް ލުމާއި، މަސައްކަތްކުރުމަށް ހަމަޖެހިފައިވާ މީހުންގެ ސައިޓް ނޫން އެހެން ސައިޓްތަކަށް ނުގެންދިއުމާއި، ސައިޓަށް ނެރުމުގެ ކުރިން ކޮންމެދުވަހަކު ހުންބެލުމާއި، އެމުވައްޒަފުންގެ ރެކޯޑްތަށް ބެލެހެއްޓުން ހިމެނެ އެވެ.
ކައުންސިލުން ބުނީ، އުސޫލާހިލާފަށް މަސައްކަތްކުރާ ފަރާތްތަކާމެދު ފިޔަވަޅު އަޅައި ހުއްދަ ބާތިލް ކުރެވޭނެ ކަމަށެވެ. މި މަހުގެ ހަތް ވަނަ ދުވަހު އަމަލުކުރަން ފެށި މި އުސޫލުގެ ދަށުން މިހާތަނަށް ސައިޓްއެތެރޭގައި އެކިއެކި މަސައްކަތްކުރުމަށް 11 ފަރާތަކަށް ހުއްދަ ދީފައިވާއިރު މަގުބަންދުކޮށްގެން ކޮންކްރީޓް މަސައްކަތްކުރުމަށް ހަތަރު ފަރާތަކަށް ދީފައިވާ ކަަމަށްވެސް ސިޓީ ކައުންސިލުން ބުންޏެވެ.
އިމާރާތްކުރުމުގެ މަސައްކަތުގައި ހުއްދަ ދިނުމުގައި މާލޭ ސިޓީ ކައުންސިލުން ބަލާފައިވާ ކަންތައްތަކުގެ ތެރޭގައި މަސައްކަތް ފަށައި ހުއްޓާލަންޖެހުމުގެ ސަބަބުން އެތަނަކަށް އިތުރު ގެއްލުންތަކެއް ލިބިދާނެ ކަމަށް ފެންނަ ތަންތަނާއި، އެތަނެއްގެ އެގޮތަށް ބެހެއްޓުމުގެ ސަބަބުން ކައިރި ގޭގެއަށް އިތުރުގެއްލުމެއް ލިބިދާނެފަދަ ތަންތަން ހިމެނެއެވެ.
