ފަސް ކުޅުންތެރިން ބަދަލުކުރެވޭ ގަވާއިދު ފާސްކޮށްފި
8 މެއި 2020 | ހުކުރު 14:57މި ބަދަލު ގެންނަން ފަސްކުރީ ކުޅުންތެރިންނަށް ލިބޭ ވަރުބަލިކަމާއި، އަނިޔާތައް މަދުކުރުމުގެ ގޮތުން
މީގެ ކުރިން ކުޅުނު މެޗެއްގެ ތެރެއިން ރެއާލް މެޑްރިޑްގެ ފޯވާޑް އެޑެން ހަޒާޑް ބަދަލުކުރަނިކޮށް
މެޗެއްގެ ތެރެއިން ފަސް ކުޅުންތެރިން ބަދަލުކުރެވޭ ގޮތަށް ފީފާ އިން ހުށަހެޅި ގަވާއިދު އިންޓަނޭޝަނަލް ފުޓްބޯލް އެސޯސިއޭޝަން ބޯޑް (އައިފެބް) އިން ފާސްކޮށްފި އެވެ.
ފުޓްބޯޅަ ގަވާއިދު ހަދާ އައިފެބް އިން ފަސް ކުޅުންތެރިން ބަދަލުކުރެވޭ ގޮތަށް ވަގުތީ ގޮތުން ގަވާއިދު ބަދަލުކުރިއިރު، މި ގަވާއިދަށް އަމަލުކުރެވޭނީ މި ސީޒަން އެކަންޏެވެ. އެގޮތުން ގައުމުތަކުގެ ލީގުތަކާއި ޔުއެފާ ޗެމްޕިއަންސް ލީގާއި ޔޫރޮޕާ ލީގުގައި ވެސް މި ގަވާއިދަށް އަމަލުކުރެވޭނެ އެވެ.
އެކަމަކު މި ކަމުގައި އެންމެ ފަހު ގޮތްތަކެއް ނިންމާނީ ލީގުތަކުގެ ބޯޑުންނެވެ. މީގެ ކުރިން ސްޕެނިޝް ލީގުން ވަނީ މި ގަވާއިދަށް އަމަލުކުރަން ހުށަހަޅާފައެވެ. އަދި ސްޕެނިޝް ލީގު އަލުން ފަށާއިރު، މި ގަވާއިދަށް އަމަލުކުރުމާ މެދު ވަރަށް އަވަހަށް ގޮތެއް ނިންމާނެ ކަމަށް ރިޕޯޓުތައް ބުނެއެވެ.
މި ގަވާއިދު ބަދަލުކުރީ ދެ މަހަށް ވުރެން ގިނަ ދުވަސް ވަންދެން މެޗުތައް ނުކުޅެ ތިބުމަށް ފަހު އަލުން މެޗުތައް ފަށާއިރު، އެކަމުގެ ސަބަބުން ކުޅުންތެރިންނަށް ލިބޭ ވަރުބަލިކަމާއި، އަނިޔާތައް މަދުކުރުމުގެ ގޮތުންނެވެ. އެގޮތުން މެޗު ކުޅެމުންދާ ވަގުތުގައި ތިން ބަދަލުކުރެވޭއިރު، ހާފް ޓައިމްގައި ދެ ބަދަލު ކުރެވޭނެ އެވެ. އަދި އިތުރު ވަގުތަށް ގޮސްފިނަމަ ބޭނުންނުކޮށް ހުރި ބަދަލުތައް ބޭނުން ކުރެވޭނެ އެވެ.
އަދި އައިފެބްއިން ވަނީ މި ސީޒަނުގައި ވީޑިއޯ އެސިސްޓަންޓް ރެފްރީ (ވީއޭއާރް) ބޭނުންކުރުން ހުއްޓާލުމުގެ ހުއްދަވެސް ދީފައެވެ. ރިޕޯޓުތައް ބުނާ ގޮތުން އިނގިރޭސި ޕްރިމިއާ ލީގު އަލުން ފަށާއިރު، ވީއޭއާރް ބޭނުންނުކުރަން އަންނަނީ މަޝްވަރާ ކުރަމުންނެވެ.
މިހާތަނަށް ޔޫރަޕުން ލީގުތައް އަލުން ފަށަން ނިންމާފައިވަނީ ޖަރުމަނާއި ތުރުކީންނެވެ. އަދި ޕްރިމިއާ ލީގާއި ސްޕެނިޝް ލީގުގެ އިތުރުން އިޓާލިއަން ލީގު އަލުން ފަށަން އަންނަނީ މަސައްކަތް ކުރަމުންނެވެ.
