ށ. އަތޮޅު ދެ ރަށެއްގެ މޮނީޓަރިންގ ހާލަތު އުވާލައިފި
8 މެއި 2020 | ހުކުރު 02:12އެ 2 ރަށުގެ މޮނިޓަރިންގ ގެ ޙާލަތު އިތުރަށް ދަމަހައްޓަންޖެހޭ ސަބަބެއް މިވަގުތަށް ނެތް
ށ. ފީވައް މަތިން ނަގާފައިވާ މަންޒަރެއް
ށ އަތޮޅުގެ 2 ރަށެއްގެ މޮނީޓަރިންގ ހާލަތު އުވާލައިފައިވާކަމަށް ނޭޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) އިން ހާމަކޮށްފި އެވެ.
މޮނީޓަރިންގ ހާލަތު އުވާލުމަށްފަހު އާންމު ހާލަތަށް ގެނެސްފައިވަނީ ށ. ފީވައް އަދި ށ. ފުނަދޫ އެވެ. ށ. ފީވައް އަދި ށ. ފުނަދޫ މޮނީޓަރިންގް ހާލަތަށް ގެނެސްފައިވަނީ އޭޕްރީލް މަހުގެ 25 ވަނަ ދުވަހުގަ އެވެ.
ށ. އަތޮޅުގެ ރަށްތަކެއް މޮނީޓަރިންގ އަށް ލެވިފައިވަނީ ކާވިޔާ ބޯޓާއި އަމާޒު ބޯޓުން ދަތުރުކުރި ބަޔަކު ޕޮޒިޓިވްވުމާއި ގުޅިގެންނެވެ. އެގޮތުން، އެ އަތޮޅު ނަރުދޫ އަދި މިލަންދޫ އިން މިހާތަނަށް 12 ކޭސްއެއް ފެނިފައި ވެއެވެ. އޭގެ ތެރެއިން 11 ކޭސް ފެނިފައިވަނީ ނަރުދޫ އިންނެވެ.
މި ދެ ރަށް އާންމު ހާލަތަށް ބަދަލުވުމާއިއެކު، މާލެ ސިޓީ ހިމެނޭގޮތަށް މޮނީޓަރިންގް ހާލަތުގައި ދެން އޮތީ 7 ރަށެކެވެ. ރަށްރަށް މޮނީޓަރިންގ އަށް ލުމުގެ ބާރު ލިބިފައިވަނީ ޑިރެކްޓަރ ޖެނެރަލް އޮފް ޕަބްލިކް ހެލްތަށެވެ. އަދި ބަލަންޖެހޭ ކަންކަން ބެލުމަށްފަހު، ރަށްތައް އާންމު ހާލަތަށް ގެނައުމުގެ ބާރު ލިބިގެންވަނީ ޑީޖީ އަށެވެ.
