ކޮވިޑް-19 ޖެހިގެން ފަރުވާދެމުންދިޔަ މީހަކު ނިޔާވެއްޖެ

ކޮވިޑް-19 ޖެހިގެން ފަރުވާދެމުން ދިޔަ 80 އަހަަރުގެ މީހާ ނިޔާވެއްޖެ އެވެ.

މިހާތަނަށް ލިބިފައިވާ ބައެއް މައުލޫމާތުތަކަށް ބަލާއިރު، ނިޔާވީ ދަރުމަވަންތަ ހޮސްޕިޓަލުގެ 11 ވަނަ ފަންގިފިލާގައި ފަރުވާދެމުން ދިޔަ މީހެކެވެ. އެ މީހާގެ މައުލޫމާތު ހިއްސާކުރަމުން އެޗްޕީއޭއިން ބުނެފައިވަނީ، އޭނާ ނިޔާވީ ބުރާސްފަތި ދުވަހުގެރޭ 11:20 ހާއިރު ކަމަށެވެ.

Advertisement

ބުރާސްފަތި ދުވަހުގެ ރޭ ނިޔާވެފައިވަނީ، އޭޕްރިލް މަހުގެ 21 ވަނަ ދުވަހު ދަރުމަވަންތަ ހޮސްޕިޓަލުގެ 11 ވަނަ ފަންގިފަލާގައި (ޑީއެޗް11) ފަރުވާދޭން ފަށާފައިވާ މީހާ އެވެ. އެ މީހާގެ ހާލު ދެރަވެގެން އޮކްސިޖަން ފަރުވާ ދޭން ފަށާފައިވަނީ އޭޕްރިލް މަހުގެ 29 ގައެވެ. އޭނާއަކީ ސްޓްރޯކެއް ޖެހިގެން ދެ އަހަރު ދުވަހަށް ވުރެ ގިނަ ދުވަހު އެނދުމަތި ވެފައިވާ މީހެކެވެ.

މިނިސްޓްރީ އޮފް ހެލްތުގެ ޑޭޝްބޯޑަށް ބަލާއިރު، ނިޔާވި 80 އަހަރުގެ ފިރިހެން މީހާ (MAV0081) ނިސްބަތްވަނީ އެމްއެޗްއެފް ކްލަސްޓަރއަށެވެ. ނަމަވެސް، އެނދުމަތިވެފައިވާ މީހާއަށް ވައިރަސް ޖެހުނީ ސީދާ ކޮން ކޭސްއެއްގެ ފަރާތުން ކަމަށް ކަށަވަރުވާނެ މައުލޫމާތެއް ހިއްސާކޮށްފައެއް ނުވެ އެވެ.

މި ޕޭޝަންޓާ ގުޅިގެން 20 ކޮންޓެކްޓެއް ދެނެގަނެވިފައި ވެއެވެ. އަދި ނިޔާވީ މީހާ ނިސްބަތްވާ ކްލަސްޓަރއިން މިހާތަނަށް 36 މީހަކު ވަނީ ވައިރަސް އަށް ޕޮޒިޓިވެވެފަ އެވެ. އެންމެ ފުރަތަމަ ކޮވިޑް-19 އާ ގުޅިގެން ރާއްޖެއިން ރިޕޯޓްކުރެވިފައިވާ މަރަކީ ވެސް، މި ކްލަސްޓަރއާ ގުޅުންހުރި ކޭސްއެއް (MAV126) ގެ ކޮންޓެކްޓެކެވެ.