އިންޓަރނޭޝަނަލް މާޗެންޑައިސް ޓްރޭޑް ވާރކްޝޮޕެއް ފަށައިފި
3 އެޕްރީލު 2017 | ހޯމަ 17:18މިތަމްރީން ޕްރޮގްރާމްގައި ޖުމްލަ 21 ބައިވެރިން ރާއްޖޭގެ ފަރާތުން ބައިވެރިވެފައިވޭ
ޔޫ.އެން.އެސް.ޑީއާއި ގުޅިގެން ކަސްޓަމްސްއިން ހިންގާ ތަމްރީން ޕްރޮގްރާމް
ރީޖަނަލް ވާރކްޝޮޕް އޮން އިންޓަރނޭޝަނަލް މާޗެންޑައިސް ޓްރޭޑް ސްޓެޓިސްޓިކްސް - ސްޓްރެންތެނިންގ ޑާޓާ ކޮމްޕައިލޭޝަން އެންޑް އެނެލިޓިކަލް ކެޕޭސިޓީގެ ނަމުގައި ތަމްރީން ޕްރޮގްރާމެއް ފަށައިފި އެވެ.
މިއީ ޔުނައިޓެޑްނޭޝަންސް ސްޓެޓިސްޓިކްސް ޑިވިޝަން (ޔޫ.އެން.އެސް.ޑީ) އާއި މޯލްޑިވްސް ކަސްޓަމްސް ސާރވިސް ގުޅިގެން ހަތަރު ދުވަހުގެ މުއްތަދަކަށް ކުރިއަށްގެންދާ ޕްރޮގްރާމެކެވެ. ހޯމަ ދުވަހު ފެށި މި ތަމްރީން ޕްރޮގްރާމް ފައްޓަވައިދެއްވާފައިވަނީ ނޭޝަނަލް ބިއުރޯ އޮފް ސްޓެޓިސްޓިކްސްގެ ޗީފް ސްޓެޓިސްޓީޝިއަން، އައިޝަތު ޝަހުދާ އެވެ.
މި ޕްރޮގްރާމްގައި އިންޑިޔާގެ ޑައިރެކްޓްރޭޓް ޖެނަރަލް އޮފް ކޮމަރޝަލް އިންޓެލިޖެންސް އެންޑް ސްޓެޓިސްޓިކްސް ( ޑީ.ޖީ.ސީ.އައި.އެސް ) އާއި، ސައުތު އެފްރިކާގެ ސައުތު އެފްރިކަން ރެވެނިއު ސާރވިސް (އެސް.އޭ.އާރު.އެސް)ގެ ފަރާތުން ބައިވެރިވެއެވެ.
ދިވެހިރާއްޖެއިން މިތަމްރީން ޕްރޮގްރާމްގައި ބައިވެރިވެފައިވަނީ މޯލްޑިވްސް ކަސްޓަމްސް ސަރވިސް އާއި ނޭޝަނަލް ބިއުރޯ އޮފް ސްޓެޓިސްޓިކްސް އާއި، މޯލްޑިވްސް މަނިޓަރީ އޮތޯރިޓީ އާއި މޯލްޑިވްސް އިންލޭންޑް ރެވެނިއު އޮތޯރިޓީ އަދި މޯލްޑިވްސް އިކޮނޮމިކް ޑިވެލޮޕް މަންޓްގެ ފަރާތުން ޖުމްލަ 21 ބައިވެރިންނެއެވެ.
މި ޕްރޮގްރާމްގެ މައިގަނޑު މަގްސަދަކީ އައި.އެމް.ޓީ.އެސް ގެ މިންގަނޑުތަކާއި އެއްގޮތަށް ތަފާސް ހިސާބު ބެލެހެއްޓުމުގެ ކަންކަން ހަރުދަނާކުރުމެވެ. މިގޮތުން ޔުނިވަރސިޓީ އޮފް ސަސެކްސް ތަޖުރިބާކާރު ގެ އިރުޝާދުގެ ދަށުން ޓްރޭޑް ސިފްޓް ބޭނުންކުރާނެ ގޮތްތައް ދަސްކުރުން ހިމެނޭ ކަމަށް ކަސްޓަމްސްއިން ބުންޏެވެ.
