ފަތުރުވެރިކަމުގެ ދާއިރާ އޮތީ ސަރުކާރާއެކު!
6 މެއި 2020 | ބުދަ 17:51ސަރުކާރަށް ފުރިހަމަ އެއްބާރުލުން ދޭނަން
ޓޫރިޒަމް މިނިސްޓަރު އަލީ ވަހީދު، ރައީސް އިބްރާހިމް މުހައްމަދު ސޯލިހުގެ އަރިހުގައި
ކޮވިޑް-19ގެ މިއުދަނގޫ ދަނޑިވަޅުގައި ސަރުކާރާއެކު ފަތުރުވެރިކަމުގެ ދާއިރާ އެއްކޮށް އެބައޮތް ކަމަށާއި، ފުރިހަމަ އެއްބާރުލުން ދޭނެ ކަމަށް ސިނާއަތުގެ ހަރަކާތްތެރިވާ ހަ އެސޯސިއޭޝަނަކުން ބުނެފިއެވެ.
ސަރުކާރާއެކު ތިބިކަން ހާމަކޮށް ބަޔާންނެރިފައިވަނީ ހަ އެސޯޝިއޭޝަންތައް އެކުވެގެންނެވެ. އެއީ ގެސްޓްހައުސް އެސޯސިއޭޝަން އޮފް މޯލްޑިވްސް (ގޭމް)، މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއަރ އޮޕޮރޭޓާރސް (މަޓާޓޯ)، އެސޯސިއޭޝަން އޮފް ޓްރެވަލް އެޖެންޓްސް (އާޓާ)، ނެޝަނަލް ބޯޓިންގް އެސޯސިއޭޝަން އޮފް މޯލްޑިވްސް (އެންބީއޭއެމް)، ޑައިވާސް އެސޯސިއޭޝަން އެސޯސިއޭޝަން އޮފް މޯލްޑިވްސް(ޑޭމް) އަދި މޯލްޑިވްސް އެސޯސިއޭޝަން އޮފް ޔޮޓް އެޖެންޓްސް (މާޔާ) އިންނެވެ.
މިބަޔާނުގައި ބުނެފައިވަނީ މާލެސިޓީ ލޮކްޑައުންކުރުމުގެ ކުރިން ޓޫރިޒަމް މިނިސްޓަރު އަލީ ވަހީދާއި އިކޮނޮމިކް މިނިސްޓަރު ފައްޔާޒް އިސްމާއިލްގެ އަދި މީރާގެ ޓެކްސް ކޮމިޝަނަރާއި ބައްދަލުކޮށްފައިވާ ކަމަށެވެ.
މިބައްދަލުވުންތަކުގައި ކުރެވުނު މަޝްވަރާތަކަށް އަލިއަޅުވާލައި ބަޔާނުގައި ބުނެފައިވަނީ ރިލީފް ޕެކޭޖްތަށް ދޫކުރުމަށް ސަރުކާރުން ނިންމި ނިންމުން ރަނގަޅު ކަމަށެވެ. އަދި މިރިލީފް ޕެކޭޖްތަކުގެ އަވަހަށް ލިބުމަކީ މުހިންމު ކަމެއް ކަމަށާއި، އެކަމާ ގުޅޭގޮތުން ވެސް މަޝްވަރާ ކޮށްފައިވާކަން ބަޔާނުގައިވެއެވެ.
ސަރުކާރާއެކު ތިބިކަން ހާމަކޮށް ބުނެފައިވަނީ ރާއްޖެއަށް ފަތުރުވެރިން އައުމަށް ޖުލައި މަހު ނުވަތަ ޖޫން މަހުގެފަހުކޮޅު ހުއްދަދިން ކަމުގައި ވިޔަސް ސަރުކާރަށް ފުރިހަމަ އެއްބާރުލުން ދޭނެ ކަމަށެވެ. މީގެ އިތުރުން ބަޔާނުގައި ބުނެފައިވަނީ ފަތުވެރިކަމުގެ ސިނާއަތަށް އަންނަމުންދާ ބަދަލުތައް ގާތުން ބަލަމުންދާ ކަމަށާއި، ކޮންމެ ދުވަހަކުވެސް މަޝްވަރާ ބައްދަލުވުންތައް ޑިޖިޓަލްކޮށް ކުރިއަށްގެންދާ ކަމަށެވެ.
ސަރުކާރާއެކު ފަތުރުވެރިކަމުގެ ސިނާއަތް އޮތްކަން ހާމަކޮށް ހަ އެސޯސިއޭޝަނަކުން ބަޔާން ނެރިފައިމިވަނީ ކޮވިޑް-19 ގުޅިގެން ފަތުރުވެރިކަމުގެ ދާއިރާއަށް ޚާއްސަކުރި ރިލީފް ޕެކޭޖް ކަނޑައެޅީ މަޝްވަރާނުކޮށް ކަމަށާއި، އެޕެކޭޖުން ގިނަ ވިޔަފާރިތަކަށް ފައިދާ ނުވާނެ ކަމަށް މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) އިން ބުނެފައިވަނިކޮށްށެވެ. މަޓީން ވަނީ ސަރުކާރަށް ވަރަށް ބޮޑަށް ފާޑު ވެސް ކިޔާފައެވެ.
