6 ހަފްތާގެ ލޮކްޑައުންއަކަށް ފަހު އަޔަލެންޑްގެ އުމުރުން ދުވަސްވީ މީހުންނަށް ބޭރަށް ދިއުމުގެ ހުއްދަ

ނޯތް އެޓްލާންޓިކް ޤައުމެއްކަމަށްވާ އަޔަލެންޑުގައި ކޮވިޑް-19 އާ ގުޅިގެން އިޢުލާނުކޮށްފައިވާ ލޮކްޑައުންއަށް އަނެއްކާވެސް ލުއިތަކެއް ދީފިއެވެ.

ބޭރުގެ މީޑިއާތަކުން ރިޕޯޓުކުރާ ގޮތުން އެ ޤައުމުގައި ކޮވިޑް-19 ފެތުރުން ކޮންޓްރޯލް ކުރުމަށް ލޮކްޑައުން އިޢުލާނު ކޮށްފައިވާއިރު، އުމުރުން 70 އަހަރަށްވުރެ މަތީގެ މީހުންނަށް ބޭރަށް ދިއުން މަނާކޮށްފައި އޮތް އޮތުމަށް 6 ހަފުތާއަށްފަހު ވަނީ ލުއެއް ދީފައެވެ. އެގޮތުން އެމީހަކު ދިރިއުޅޭ ގެއާ 5 ކިލޯމީޓަރުގެ ރޭޑިއަސްއެއްގައި ބޭރަށް ނުކުމެ އުޅުމާއި، ކަސްރަތު ކުރަން ނުކުމެ އުޅުން އެ ޤައުމުގެ ސަރުކާރުން މިވަނީ ހުއްދަކޮށްފައެވެ.

ކޮވިޑް-19 ފެތުރުން ކޮންޓްރޯލް ކުރުމުގެ ގޮތުން އެ ޤައުމުގައި ލޮކްޑައުން އިޢުލާނުކުރީ މާރޗު މަހުގެ 28 ވަނަ ދުވަހުއެވެ. އެއާއެކު ފިހާރަތަކާއި ރެސްޓޯރަންޓްތައްވެސް ބަންދުކޮށް، ގިނަ މީހުން އެއްވެ ހިންގާ ހުރިހާ ޙަރަކާތްތަކެއްވެސް މަނާކުރިއެވެ. އޭގެ އިތުރުން، ޚާއްޞަ ޙާލަތްތަކެއްގައި ބޭރަށް ދެވޭނެ އުޞޫލުތައް ޢާންމުކުރިއިރު، ކަސްރަތު ކުރުމުގެ ގޮތުން އެމީހަކު އުޅޭ ގެއާ 2 ކިލޯމީޓަރުގެ ރޭޑިއަސްއަކަށްވުރެ ބޭރަށް ނުކުތުން އޭރު އޮތީ މަނާކޮށްފައެވެ. ނަމަވެސް އޭގެންވެސް އުމުރުން ދުވަސްވީ މީހުން އޭރު އޮތީ އިސްތިސްނާ ކުރެވިފައެވެ.

އެއާއެކު، އެ ޤައުމުގައި ދިރިއުޅޭ އުމުރުން ދުވަސްވީ މީހުންނަށް ބޭރަށް މި ނުކުމެވެނީ 6 ހަފުތާގެ މުއްދަތަކަށް ގޭގައި މަޑުކުރުމަށްފަހު ކަމަށް ރިޕޯޓުތައް ބުނެއެވެ.

އަޔަލެންޑުން މިހާތަނަށް 21،900ށް ވުރެ ގިނަ ކޭސް ފެނިފައިވާއިރު، 1339 މީހުން މި ވައިރަސްގެ ސަބަބުން މަރުވެފައިވެއެވެ. އަދި ބަލި ޖެހިގެން ރަނގަޅުވި މީހުންގެ ޢަދަދުވެސް އުޅެނީ 13،386 ގައެވެ.