ފުރަބަންދު އަމުރާ ހިލާފުވެގެން ޖޫރިމަނާގެ ގޮތުގައި 2.5 މިލިއަން ރުފިޔާ!
ޖުމްލަ 2497 މީހަކު ވަނީ ޖޫރިމަނާކުރެވިފައި، މީގެ ތެރެއިން 2130 ޖޫރިމަނާކުރީ މާލެއިން
ފުރަބަންދުކޮށްފައިވަނިކޮށް މަގުމަތިން ދިޔަ މީހަކާ ފުލުހުން ސުވާލުކުރަނީ
ކޮވިޑް-19 ފެތުރުން ހުއްޓުވުމުގެ ގޮތުން މާލެ ސިޓީގައި އިއުލާންކޮށްފައިވާ ފުރަބަންދު އަމުރާ ހިލާފުވެގެން މިހާތަނަށް 2497 މީހަކު ޖޫރިމަނާ ކޮށްފި އެވެ.
މޯލްޑިވްސް ޕޮލިސް ސަރވިސް އިން އާންމުކޮށްފައިވާ ތަފާސްހިސާބުތަކަށް ބަލާއިރު، އެންމެ ގިނަ ބަޔަކު ޖޫރިމަނާ ކޮށްފައިވަނީ މާލެ އިންނެވެ. އެގޮތުން މާލެ އިން އެކަނިވެސް 2130 ފަރާތެއް ވަނީ ޖޫރިމަނާކޮށްފަ އެވެ.
މި އަދަދުތަކާއެކު މިހާތަނަށް ޖޫރިމަނާ ކޮށްފައިވާ ފަރާތްތަކުން ދައުލަތަށް ދައްކަން ޖެހޭ ފައިސާގެ އަދަދަކީ 2،497،000ރ. އެވެ. ފުރަބަންދު އަމުރާ ޙިލާފުވާ ފަރާތްތައް ޖޫރިމަނާ ކުރަނީ 1000ރ. އިންނެވެ. މި އަމަލު ތަކުރާރުކުރާނަމަ، ގާނޫނުލް އުގޫބާތުގެ 533 ވަނަ މާއްދާގެ (ހ) ދަށުން ހައްޔަރުކުރުމުގެ ބާރު ފުލުހުންނަށް ވަނީ ލިބިފަ އެވެ.
މިހާތަނަށް ފުލުހުން ވަނީ 140 މީހަކު ހައްޔަރަށް ގެންގޮސްފަ އެވެ. ނަމަވެސް، ހައްޔަރަށް ގެންދާ މީހުންގެ އަދަދު ދުވަހަކަށް ވުރެ ދުވަހެއް އަންނަނީ މަދުވަމުންނެވެ. އެގޮތުން އޭޕްރިލް 5 ގައި ހައްޔަރަށް ގެންދެވިފައިވަނީ އެންމެ ތިން މީހެކެވެ.
