ގުޅީފަޅުގައި އަޅާ 665 އެނދުގެ ކަރަންޓީން ފެސިލިޓީ ނިންމައިފި
3 މެއި 2020 | އާދީއްތަ 12:16ހުޅުމާލެ ދެވަނަ ފިޔަވަހީގައިވެސް 700 ބިދޭސީން ބައިތިއްބަން ތަނެއް ހަދާފައިވޭ
ގުޅީފަޅުގައި ހެދި 665 އެނދުގެ ކަރަންޓީން ފެސިލިޓީ
ގުޅީފަޅުގައި ހަދާ 665 އެނދުގެ ކަރަންޓީން ފެސިލީޓީގެ މަސައްކަތް ނިންމައިފި އެވެ.
މާލެ ޞަރަޙައްދުގައި އުޅޭ ބިދޭސީންނަށް ޚާއްޞަކޮށް، ގުޅީފަޅުގައި 665 އެނދުގެ ކަރަންޓީން ފެސިލިޓީއެއް ހެދުމަށް ނިންމީ، ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 ރާއްޖޭގައި ފެތުރުން ކޮންޓްރޯލް ކުރުމުގެ ގޮތުންނެވެ. ހުޅުމާލޭގެ ދެވަނަ ފިޔަވަހީގައި ވެސް 700 އެއްހާ ބިދޭސީންނަށް ފެސިލިޓީއެއް ޤާއިމުކޮށްފައި ވެއެވެ. މީގެއިތުރުން ހުޅުމާލެ އާއި ގުޅީފަޅާއެކު ޖުމުލަ 6،000 ބިދޭސީން ބޭތިއްބުމަށް ފެސިލިޓީތަށް ޤާއިމު ކުރަމުންދާނެ ކަމަށް ކަމާބެހޭ ފަރާތްތަކުން ވަނީ މީގެކުރިން ބުނެފައެވެ.
ކަމާބެހޭ ފަރާތަތްކުގެ އެންމެ ބޮޑު އިސްކަމެއް ދީގެން ކުރަމުންދާ އެއް މަސައްކަތަކީވެސް، ރާއްޖޭގައި އުޅޭ 200،000 އެއްހާ ބިދޭސީންގެ ތެރެއިން ގިނަ ބަޔަކު ތޮއްޖެހިގެން އުޅެމުންދާތީ، މި ރޯގާ އެމީހުންގެ ތެރޭގައި ފެތުރިއްޖެނަމަ ކޮންޓްރޯލް ކުރަން އުނދަގޫތަކެއް ކުރިމަތިވާނެ ކަމަށް ބަލާފައި ބިދޭސީންގެ ތޮއްޖެހުމުގެ މައްސަލައަށް ޙައްލެގެނައުމުގެ މަސައްކަތެވެ.
އެމްއެންޑީއެފްގެ ޗީފް އޮފް ޑިފެންސް ފޯރސް ޢަބްދުﷲ ޝަމާލު ކުރެއްވި ޓްވީޓެއްގައި ވިދާޅުވެފައިވަނީ، އެމްޓީސީސީ އާއި އަދި ކަމާބެހޭ ފަރާތްތަކާ ގުޅިގެން އެމްއެންޑީއެފުން ހެދި 665 އެނދުގެ ކަރަންޓީން ފެސިލިޓީގެ މަސައްކަތް ނިންމާފައިވާ ކަމަށެވެ.
ރާއްޖޭގައި ގިނަ ޢަދަދެއްގެ ބިދޭސީން އުޅޭއިރު، ޤަވާއިދާ ޚިލާފަށް ވެސް ގިނަ ޢަދަދެއްގެ ބިދޭސީން އުޅެއެވެ. ބައެއް ފަރާތްތަކުން ލަފާކުރާ ގޮތުގައި ޤަވާއިދާ ޚިލާފަށް ވެސް 100،000 އެއްހާ ބިދޭސީން ރާއްޖޭގައި އުޅެއެވެ.
ކޮވިޑް-19 ފެތުރުން ކޮންޓްރޯލް ކުރުމަށް އޮތް އެންމެ ބޮޑު ގޮންޖެހުމަކީ ބިދޭސީންގެ މައްސަލަ ކަމަށް ހޯމް މިނިސްޓަރު ޝައިޚް އިމްރާން ޢަބްދުﷲ ވަނީ ވިދާޅުވެފަ އެވެ.ހޯމް މިނިސްޓަރު ކުރެއްވީ ޓްވީޓެއްގައި ވިދާޅުވީ، ކޮވިޑް-19 ކޮންޓްރޯލް ކުރުމަށް އޮތް އެންމެ ބޮޑު ގޮންޖެހުމަކީ ޒަމާނުއްސުރެ ޙައްލެއް ނުލިބިފައި އޮތް ބިދޭސީންގެ މައްސަލަ ކަމަށެވެ. މިނިސްޓަރު އިމްރާން ވިދާޅުވީ، އެމީހުން ދިރިއުޅޭ ދަތި ތަންތަނުން ނެރެ ރައްކާތެރި ތަންތަނަށް ގެންދިޔުމަކީ ސަރުކާރަށް ބުރަބޮޑު ކަމެއް ކަމަކަށްވިޔަސް، އިސްކަމެއް ދީގެން ކުރަމުންދާ މުހިއްމު އެއް މަސައްކަތް ކަމަށެވެ.
ކޮވިޑް-19 އަށް ރާއްޖެއިން 519 މީހަކު ޕޮޒިޓިވް ވެފައިވާއިރު 343 މީހުންނަކީ ބިދޭސީންނެވެ.
