ކޮވިޑް-19 ރޯގާ ރާއްޖޭގައި ފެތުރެން ފެށުމާއެކު، ރާއްޖޭގައި ދިރިއުޅޭ ގިނަ ބިދޭސީންތަކެއްގެ ހާލަތު ވަރަށް ނިކަމެތި ހާލަތަކަށް ގޮސްފައިވާކަމަށާއި، އެފަރާތްތަކަށް އެހީތެރިކަން ވެދެމުންދާ ކަމަށް މޯލްޑިވިއަން ރެޑް ކްރެސެންޓް (އެމްއާރުސީ) އިން ބުނެފި އެވެ.

ނޭޝަނަލް އިމަޖެންސީ އޮޕަރޭޝަން ސެންޓަރުގައި ދިވެހި ރެޑް ކްރެސެންޓްގެ ފަރާތުން އާދިއްތަ ދުވަހު ބޭއްވި ނޫސްވެރިން ބައްދަލުވުމުގައި މައުލޫމާތު ދެއްވަމުން، ޕްރޮގްރާމް އެންޑް ސަރވިސަސް މެނޭޖަރު މައީދު މުހައްމަދު ޒާހިރު ވިދާޅުވީ، މާލޭގައި ބިދޭސީން ދިރިއުޅޭ 23 ތަނަކަށް އެހީތެރިކަން އެޖަމާއަތުން ފޯރުކޮށްދެމުންދާ ކަމާއި، އެތަންތަނުގައި 1332 މީހަކު ދިރިއުޅެމުންދާ ކަމަށެވެ. އެގޮތުން އެ 1332 ބިދޭސީންނަށް ކެއިން ބުއިމުގެ ކަންކަން ދިވެހި ރެޑް ކްރެސެންޓުން ބަލަހައްޓަމުންދާ ކަމަށް މައީދު ވިދާޅުވި އެވެ.

މައީދު ވިދާޅުވީ، ބިދޭސީން އުޅޭ 23 ތަނެއް މާލޭގައި ލޮކްޑައުންކޮށްފައިވާއިރު، ކާބޯތަކެތި ދެ ގޮތަކަށް ފޯރުކޮށްދެމުންދާ ކަމަށެވެ. އެގޮތުން ކަންކަން ބޭނުންކުރާ ތަކެތި އެތަނުން 13 ތަނަކަށް ފޯރުކޮށްދެމުންދާއިރު، އެއީ 621 ބިދޭސީން ކަމަށެވެ. ބާކީ ހުރިތަންތަނަށް ކާބޯތަކެތި (މީލްސް) ފޯރުކޮށްދެމުންދާ ކަމަށެވެ.

މީގެއިތުރުންވެސް، ހާލުގައި ޖެހިގެން އެމްއާރުސީއަަށް އެނގޭ ހިސާބުން އެމީހަކަށް އެހީތެރިކަން ފޯރުކޮށްދެމުންދާ ކަމަށްވެސް މައީދު ވިދާޅުވި އެވެ.

މައީދު ވިދާޅުވީ، އަމީނިއްޔާ ސްކޫލްގައި 100 ވަރަކަށް ބިދޭސީން ބޭތިއްބާފައިވާއިރު، އެމީހުން ސާފްތާހިރު ވުމަށް ބޭނުންވާ ސާމާނު ހިމެނޭ ޕެކެއް "ހައިޖީން ޕެކް" ފޯރުކޮށްދެމުންދާ ކަމަށެވެ. އެގޮތުން އަންހެނުންނަށް ހާއްސަ ޕެކް ވެސް ހިމެނޭ ކަމަށް މައީދު ވިދާޅުވި އެވެ. އަދި މިއަދަދު ކުރިއަށް އޮތްތާނގައި އިތުރުވާނެ ކަމަށްބަލާފައި އެކަމަށްވެސް ތައްޔާރުވަމުން ދާކަމަށްވެސް މައީދު ވިދާޅުވި އެވެ.

ރާއްޖޭގައި ކޮވިޑް-19 ފެތުރެމުންދާއިރު، އެބައްޔަށް ޕޮޒިޓިވްވާ ބިދޭސީންގެ އަދަދު އެއްދުވަހުން އަނެއް ދުވަހަށް ދަނީ މައްޗަށެވެ. އެގޮތުން ކޮވިޑް-19 އަށް ރާއްޖޭއިން މިހާތަނަށް 519 މީހުން ޕޮޒިޓިވްވެފައިވާއިރު، 343 މީހުންނަކީ ބިދޭސީންނެވެ.