އުގައިލް ފައުންޑޭޝަނުން އައްޑޫސިޓީއަށް ޑެލިވަރީގެ ޚިދުމަތް ދޭން ޚާއްސަ ސިސްޓަމެއް
3 މެއި 2020 | އާދީއްތަ 08:28ސިސްޓަމް މެދުވެރިކޮށް ޚިދުމަތް ދިނުމުގެ އިންތިޒާމު މިހާރުވަނީ ހަމަޖައްސާފައި
ކޮވިޑް-19އާ ގުޅިގެން ރައްކާތެރިވުމުގެ ގޮތުން އައްޑޫ ސިޓީގައި ވަނީ ގިނަ ފިޔަވަޅުތަކެއް އަޅާފައި
ކޮވިޑް-19 އިން ރައްކާތެރިވުމަށް އަޅާފައިވާ ފިޔަވަޅުތަކާ ގުޅިގެން އައްޑޫ ސިޓީ ވިޔަފާރިތަކުން ޑެލިވަރީގެ ޚިދުމަތް ދޭން ޚާއްޞަ ސިސްޓަމެއް ބޭނުންކުރަން ނިންމައިފިއެވެ.
އައްޑޫ ސިޓީ ކައުންސިލުން ބުނީ ކޮވިޑް-19ގެ ޞިއްޙީ ކުއްލި ނުރައްކަލުގެ ޙާލަތާއި ގުޅިގެން އައްޑޫ ފުރަބަންދުގެ ޙާލަތަށް ގެނެސްފައިވާތީ ޢާންމު ރައްޔިތުންނަށް ކާބޯތަކެއްޗާއި، ޒަރޫރީ ބޭނުންތަކަށް ބޭނުންވާ މުދާ ފަސޭހަކަމާއެކު ފޯރުކޮށްދިނުމުގެ މަޤުޞަދުގައި އުގައިލް ފައުންޑޭޝަނުން އިސްނަގައިގެން ކައުންސިލާއި ގުޅިގެން ޑެލިވަރީ ސިސްޓަމެއް ޤާއިމުކޮށްފައިވާ ކަމަށެވެ.
ކައުންސިލުން ބުނީ ޑެލިވަރީ ހުއްދަ ދޫކޮށްފައިވާ ހުރިހާ ވިޔަފާރިތަކަށް މި ސިސްޓަމް މެދުވެރިކޮށް ޚިދުމަތް ދިނުމުގެ އިންތިޒާމު މިހާރު ހަމަޖައްސާފައިވާ ކަމަށެވެ. އަދި ސިސްޓަމަށް ރަޖިސްޓަރީކުރަން ޢަމަލުކުރަންޖޭހޭ ގޮތުގެ މަޢުލޫމާތާއި، ސިސްޓަމް ބޭނުންކުރާނެ ގޮތުގެ މަޢުލޫމާތު ސެޝަނެއް އުގައިލް ފައުންޑޭޝަނުގެ ސަޕޯޓް ޓީމުން ވިޔަފާރިތަކަށް ދިނުމަށް ހަމަޖެހިފައިވާ ކަމަށެވެ.
މީގެ އިތުރުން ކައުންސިލުން ބުނީ މިސެޝަން ކުރިއަށް ގެންދާނީ ކޮންމެ ވިޔަފާރިއަކަށް ވެސް ވަކިވަކިން ވަގުތު ދީގެން ކަމަށެވެ. އެހެންކަމުން ސެޝަންތަކުގެ ވަގުތު ކަނޑައެޅުމަށް ވިޔަފާރިތަކަށް ކައުންސިލުން ގުޅައި އެކަން ހަމަޖެއްސުމުގެ މަސައްކަތް ހޮނިހިރު ދުވަހުގެ ރެއިން ފެށިގެން ކުރަމުން އަންނަކަމަށް ކައުންސިލުން ބުނެއެވެ.
މި ސިސްޓަމާބެހޭ އިތުރު މަޢުލޫމާތު ހޯދަން އުގައިލް ފައުންޑޭޝަންގެ ހޮޓްލައިން ނަންބަރު 7259034ށް ގުޅުމަށް ކައުންސިލުން އެދިފައިވެއެވެ.
