ރާއްޖޭގެ ނޫސްވެރިކަމުގެ މުސްތަޤުބަލު ފެންނަނީ ވަރަށް އުޖާލާކޮށް: މީޑިއާ ކައުންސިލް
ދެކުނު އޭޝިޔާގެ އެއްވަނާ ގައި އޮތީ 67 ޕޮއިންޓާއެކު ބޫޓާން
\'ނޫސްވެރިކަމުގެ އިނާމު 2018\' ގައި މީޑިއާ ކައުންސިލްގެ މެމްބަރުން ނައިބް ރައީސް ފައިސަލް ނަސީމްއާ އެކު
ނޫސްވެރިކަމުގެ މިނިވަން ކަމުގައި، ދެކުނު އޭޝިޔާއިން ދެވަނަ ދަރަޖައާއެކު ރާއްޖޭގެ މިނިވަން ނޫސްވެރިކަމުގެ މުސްތަޤުބަލު ވަރަށް އުޖާލާ ކަމަށް މޯލްޑިވްސް މީޑިއާ ކައުންސިލް (އެމްއެމްސީ) އިން ބުނެފިއެވެ.
ދަ "ވަރލްޑް ޕްރެސް ފްރީޑަމް އިންޑެކްސް" އިން ނެރޭ ނޫސްވެރިކަމުގެ މިނިވަން ކަމުގެ ލިސްޓުގައި މި އަހަރު ދިވެހިރާއްޖެއަށް ވަނީ 19 ދަރަޖައިގެ ކުރިއެރުމެއް ހޯދައި ލިސްޓުގެ 79 ވަނަ އަށް ޖެހިލާފައެވެ. މި ދަރަޖައަކީ ދެކުނު އޭޝިޔާގެ ދެވަނަ ދަރަޖައެެވެ. ދެކުނު އޭޝިޔާގެ އެއްވަނާގައި އޮތީ 67 ޕޮއިންޓާއެކު ބޫޓާނެވެ.
ދުނިޔޭގެ ނޫސްވެރިކަމުގެ މިނަވަން ދުވަހުގެ މުނާސަބަތުގައި ރާއްޖޭގެ ހުރިހާ ނޫސްވެރިންނަށް ތަހުނިޔާއާ ކިޔަމުން މޯލްޑިވްސް މީޑިއާ ކައުންސިލް (އެމްއެމްސީ) ގެ ރައީސް ހިދާޔަތުﷲ ނެރެފައިވާ ބަޔާނެއްގައި ބުނެފައިވަނީ، މުސްތަޤުބަލުގައިވެސް އެ ކުރިއެރުން އިތުރު ހަރުފަތަކަށް ގެންދިއުމުގައި ދިވެހި މީޑިއާތަކާއެކު މީޑިއާ ކައުންސިލް އަބަދުވެސް އޮންނާނެ ކަމަށެވެ.
ޔުނެސްކޯއިން މިއަހަރުގެ ޚާއްޞަ ކޮންފަރެންސަށް ކަނޑައަޅާފައިވާ ޝިޢާރަކީ،"ޖެހިލުންވުމެއް ވަކިއަތަކަށް ޖެހުމެއްނެތި ނޫސްވެރިކަން" އެވެ. ހިދާޔަތުﷲ ވިދާޅުވީ، އެ ޝިޢާރުން ދޭހަކޮށްދެނީ، ނޫސްވެރިން މަސައްކަތްކުރަންވާނީ ނޫސްވެރިންނަށް ލިބިދީފައިވާ މިނިވަންކަމުގެ އިމުގެ ތެރޭގައި ބިރެއް ފަސްޖެހުމެއް ނެތިކަން ކަމަށާއި އަދި އެހެންމެ ވަކި ފަރާތަކަށް ނުޖެހި ހަމަހަމަކަމާއި އިންސާފަށް ކަމަށެވެ.
މީޑިއާ ކައުންސިލުން ވަނީ، މި ނުރައްކާތެރި ބިރުވެރި ޙާލަތުގައި ރައްޔިތުންނަށް ޚަބަރާއި އެންމެ ފަހުގެ މަޢުލޫމާތު ފޯރުކޮށްދިނުމަށް ފަސްޖެހުމެއް ނެތި ދިވެހި ނޫސްވެރިން ކުރައްވަމުން ގެންދާ ބުރަ މިންނެތް މަސައްކަތަށް ޝުކުރު އަދާކޮށްފައެވެ.
