މުޅި ދުނިޔޭގައި ހަލުވިކަމާއެކު ފެތުރެމުންދާ ކޮރޯނާވައިރަސްއާ ގުޅިގެން އާންމު ދަތުރުފަތުރު ކުރާ ސަރަހައްދުތަކުގައި މި މަހުގެ 4 ވަނަ ދުވަހުން ފެށިގެން މާސްކް ބޭނުންކުރުމަށް ސްޕެއިން ސަރުކާރުން މަޖުބޫރު ކުރަން ނިންމައިފިއެވެ.

އެ ޤައުމުގެ ބޮޑުވަޒީރު ޕެޑްރޯ ސަންޗޭޒް ވިދާޅުވީ އެޅުމަށް ނިންމާފައިވާ ފިޔަވަޅުތަކާއި ގުޅިގެން 6 މިލިއަން މާސްކް ބެހުމަށް ނިންމާފައިވާ ކަމަށެވެ. އަދި މި މާސްކުތައް އާންމު ދަތުރުފަތުރު ކުރާ ސަރަހައްދުތަކުގައި ބެހުމަށް ނިންމާފައިވާއިރު އިތުރު 7 މިލިއަން މާސްކް ކަމާއި ގުޅޭ އިދާރާތަކަށް ބެހުމަށް ނިންމާފައިވާ އެމަނިކުފާނު ވިދާޅުވިއެވެ.

ކޮވިޑް-19 އާ ގުޅިގެން ސްޕެއިން އިން އަޅާފައިވާ ބައެއް ފިޔަވަޅުތަކަށް މިހާރު ވަނީ ދޫދޭން ފަށާފައެވެ. އެގޮތުން ހަތް ހަފްތާ ފަހުން އެ ޤައުމުގެ ސަރުކާރުން ވަނީ ރައްޔިތުންނަށް ކަސްރަތު ކުރުމަށް ބޭރަށް ނިކުތުމުގެ ފުރުސަތު ދީފައެވެ.

ސްޕެއިން ލޮކްޑައުން ކޮށްފައި އޮތްނަމަވެސް މިފަހަކުން ވަނީ އެގައުމުގެ 12 އަހަރުން ދަށުގެ ކުޑަކުދިންނަށް ވެސް ބޭރަށް ނިކުމެ އުޅުމުގެ ފުރުސަތު ދީފައެވެ.

މެއި މަހުގެ 11 ވަނަ ދުވަހާ ހަމައަށް ސްޕެއިން ލޮކްޑައުންގައި ބޭއްވުމަށް އެގައުމުގެ ޤާނޫނު ހަދާ މަޖިލީހުން ވަނީ ފާސްކޮށްފައެވެ.