ކުޅުދުއްފުއްޓަށް ބަޔަކު ގެންގޮސްފައިވަނީ އާސަންދައިން ކައުންސިލަށް އެންގުމަށްފަހު: މަބްރޫކް

ހދ. ކުޅުދުއްފުށި ސިޓީ ލޮކްޑައުން ކޮށްފައިވަނިކޮށް މާލެއިން ބަޔަކު ދިޔައީ އާސަންދައިގެ ފަރާތުން އެރަށު ކައުންސިލަށް އެކަން އެންގުމަށްފަހު ކަމަށް ކޮވިޑް-19 ޓާސްކް ފޯހުގެ ތަރުޖަމާން މަބްރޫކް އަޒީޒު ވިދާޅުވެއްޖެ އެވެ.

ކުޅުދުއްފުށީގެ ކޮވިޑް-19 ޓާސްކް ފޯސްއަށް އެންގުމަކާ ނުލައި އެރަށަށް 7 މީހަކު ދިޔަ މައްސަލައެއް ވަނީ ފެންމަތިވެފައެވެ.

އެކަން ހިނގާދިޔަ ގޮތް ސާފު ކޮށްދެއްވަމުން މަބްރޫކް ވިދާޅުވީ މާލެ ސިޓީ ލޮކްޑައުން ކުރިއިރު މާލޭގައި ތާށިވެފައިވާ ކުޅުދުއްފުށީ މީހުންގެ ތެރެއިން 7 މީހަކު ހޮނިހިރު ދުވަހު ކުޅުދުއްފުއްޓަށް ގޮސްފައިވާ ކަމަށެވެ. މިމީހުންނަކީ އާސަންދައިގެ ދަށުން މާލޭގައި ބޭސްކުރަމުންދިޔަ މީހުން ކަމަށް މަބްރޫކް ވިދާޅުވި އެވެ. މީގެތެރޭގައި ހިމެނެނީ ކުޅުދުއްފުށީ މީހުންނާއި އެއަތޮޅު ކުމުންދޫ މީހުންނެވެ.

މާލެ ސަރަޙައްދު ލޮކްޑައުން ކުރުމާއި ގުޅިގެން އެކިއެކި ބޭނުންތަކަށް މާލެ އައިސް އެނބުރި ރަށަށް ނުދެވި ތިބި ފަރާތްތައް ރަށަށް ފޮނުވުމުގައި ޢަމަލު ކުރާނެ އުޞޫލު ކަނޑައަޅާ ވަނީ ގެޒެޓްކޮށްފަ އެވެ. މިއުސޫލުގައި އިސްކަންދޭނެ މީހުން ހިމަނާފައިވާއިރު ފުރަތަމަވެސް ހިމަނާފައިވަނީ އާސަންދަ ނުވަތަ ނޭޝަނަލް ސޯޝަލް ޕްރޮޓެކްޝަން އޮތޯރިޓީ (އެން.އެސް.ޕީ.އޭ) ގެ އެހީތެރިކަމާއި އެކު ބޭސްފަރުވާއަށް މަލޭ އައިސް އެނބުރި ރަށަށް ނުފުރިފައިވާ ފަރާތްތަކެވެ.

މަބްރޫކް ވިދާޅުވީ އެ ހަތް މީހުން ވެސް މި ވަގުތު ތިބީ ކުޅުދުއްފުށީގައި ގާއިމްކޮށްފައިވާ ކަރަންޓީން ފެސިލިޓީއެއްގައި ކަމަށެވެ. ނަމަވެސް ކުމުންދޫ މީހުން ރަށަށް ގެންދިއުމުގެ އިންތިޒާމް ހަމަޖައްސަދޭނެ ކަމަށް މަބްރޫކް ވިދާޅުވި އެވެ.

ކޮވިޑް-19 އިން ރައްކާތެރިވުމުގެ ފިޔަވަޅެއްގެ ގޮތުން ކުޅުދުއްފުށި ލޮކްޑައުންކުރީ މިދިޔަ އޭޕްރީލް މަހުގެ 21 ވަނަ ދުވަހު އެވެ. ތިން ދުވަހަށް ލޮކްޑައުން ކުރުމަށްފަހު އަނެއްކާ ވެސް މެއި އެއްވަނަ ދުވަހާ ހަމައަށް މުއްދަތު އިތުރުކުރި އެވެ. އަދި އޭގެ ފަހުން މެއި ހަތްވަނަ ދުވަހާ ހަމައަށް ކާފިއު ދިގުދަންމާލި އެވެ. ނަމަވެސް ބޭރަށް ނިކުމެ އުޅުމުގައި ކޮންމެވެސް ވަރެއްގެ ލުއިތަކެއް މިހާރު ވަނީ ދީފަ އެވެ.

ރާއްޖެއިން މިހާތަނަށް 519 މީހަކު ކޮވިޑް-19 އަށް ވަނީ ޕޮޒިޓިވްވެފަ އެވެ. މީގެތެރޭގައި ރަށްރަށުގައި ދިރިއުޅެމުންދާ މީހުންވެސް ހިމެނެއެވެ.