އިންތިހާބާ ނުލައި 13 ކެންޑިޑޭޓަކު ކައުންސިލަށް އިންތިހާބު ވެއްޖެ

އިލެކްޝަންސް ކޮމިޝަނުން އޭޕްރީލް 15 ވަނަ ދުވަހު ބާއްވާ ލޯކަލް ކައުންސިލް އިންތިހާބުގެ ވާދަކުރާ 13 ކެންޑިޑޭޓަކު އެ ކެންޑިޑޭޓުން ކުރިމަތިލައްވާފައިވާ ކައުންސިލްތަކަށް އިންތިހާބު ވެއްޖެ އެވެ.

އިލެކްޝަންސް ކޮމިޝަނުން ބުނީ ލޯކަލް ކައުންސިލްތަކުގެ އިންތިހާބަށް ކުރިމަތިލުމަށް ހުޅުވާލި މުއްދަތު ހަމަވިއިރު، އިންތިހާބަށް ކުރިމަތިލި ކެންޑިޑޭޓުންގެ އަދަދު އިންތިހާބުކުރަންޖެހޭ މެމްބަރުންގެ އަދަދާ އެއްވަރުވެފައިވާ ފަސް ކައުންސިލެއް ވާ ކަމަށެވެ.

އެގޮތުން ހދ. އަތޮޅު ކައުންސިލަށް ނޮޅިވަރަމް ދާއިރާގެ މެމްބަރެއްގެ ގޮތުގައި ކުރިމަތިލާފައިވަނީ އެމްޑީޕީގެ ކެންޑިޑޭޓް ހުސައިން ހަސަން އެކަންޏެވެ.

މީގެ އިތުރުން، ރ. ކިނޮޅަހު ކައުންސިލަށް އަމިއްލަ ގޮތުން ކުރިމަތިލި ތިން ކެންޑިޑޭޓުންނާއި އދ. ދިއްދޫ ކައުންސިލަށް ކުރިމަތިލި ޕީޕީއެމްގެ ދެ ކެންޑިޑޭޓަކާއި އަމިއްލަ ގޮތުން ކުރިމަތިލި ކެނޑިޑޭޓާއެކު ތިން ކެންޑިޑޭޓުން ވަނީ އިންތިޚާބެއް ނެތި އެ ކައުންސިލްތަކަށް ހޮވިފައެވެ. އަދި އިލެކްޝަންސް ކޮމިޝަނުން ބުނީ މ. ރަތްމަންދޫ ކައުންސިލަށް އަމިއްލަ ގޮތުން ކުރިމަތިލި ތިން ކެންޑިޑޭޓުންނާއި ތ. ގުރައިދޫ ކައުންސިލަށް ޕީޕީއެމްގެ ފަރާތުން ކުރިމަތިލި ތިން ކެންޑިޑޭޓުންނާ އެކު ޖުމްލަ 13 ކެންޑިޑޭޓަކު އިންތިހާބު ވެފައިވާ ކަމަށެވެ.

އިލެކްޝަންސް ކޮމިޝަނުން ބުނީ ލޯކަލް ކައުންސިލްތަކުގެ އިންތިހާބުގެ ގާނޫނުގެ 24 ވަނަ މާއްދާގައިވާ ގޮތުގެ މަތިން ލޯކަލް ކައުންސިލްތަކުގެ އާ ދައުރަށް، އެ 13 ކެންޑިޑޭޓުން އިންތިހާބު ވެއްޖެ ކަމަށެވެ.