އަތޮޅު ތެރޭގެ ހޮސްޕިޓަލުތަކުގެ ޑޮކްޓަރުން ކޮވިޑާއިގުޅޭ ތަމްރީނުތައް މާލޭގައި ހޯދަމުން އެބަދޭ: މަބްރޫކް
ތަމްރީނުތަކުގެ އިތުރުން މަސައްކަތުގެ އަމަލީ ތަޖުރިބާ ވެސް ހޯދަމުންދާނެ
ދަރުމަވަންތަ ހޮސްޕިޓަލް
އަތޮޅު ތެރޭގެ ހޮސްޕިޓަލުތަކުގެ ޑޮކްޓަރުން ކޮވިޑް-19 އާ ގުޅިގެން ބޭނުންވާ ތަމްރީނުތައް ހޯދަމުންދާ ކަމަށް ކޮވިޑް-19 ގެ ޓާސްކް ފޯހުގެ ތަރުޖަމާނު މަބްރޫކް އަޒީޒު ވިދާޅުވެއްޖެއެވެ.
ހޮނިހިރު ދުވަހުގެރޭ ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މަބްރޫކް ވިދާޅުވީ އެ ޑޮކްޓަރުން ތަމްރީނުތަކުގެ އިތުރުން މަސައްކަތުގެ އަމަލީ ތަޖުރިބާ ވެސް ހޯދަމުންދާ ކަމަށެވެ. އަދި ތަމްރީނު ނިންމުމަށްފަހު އެ ޑޮކްޓަރުން އެނބުރި އަތޮޅަށް, ރަށަށް ގޮސް، 14 ދުވަހުގެ ކަރަންޓީނުގެ މުއްދަތެއް ފުރިހަމަ ކުރާނެ ކަމަށް މަބްރޫކް ވިދާޅުވިއެވެ.
މަބްރޫކް ވިދާޅުވި ގޮތުގައިމަސައްކަތަށް ނިކުތުމަށް ހަމަޖެހިފައިވާ ކަރަންޓީންގެ 14 ދުވަސް ފުރިހަމަ ކުރުމަށްފަހު އެވެ.
ނޫސްވެރިންގެ ބައްދަލުވުމުގައި އިތުރަށް ވާހަކަދައްކަވަމުން މަބްރޫކް ވިދާޅުވީ މި ދަނޑިވަޅުގައި ދިމާވާ އެންމެ ބޮޑު ދަތިކަމަކީ ޑޮކްޓަރުންގެ އަދަދު މަދުވުން ކަމަށެވެ.
ނޫސްވެރިންގެ ބައްދަލުވުމުގައި ނޫސްވެރިޔަކު ކުރި ސުވާލަކަށް ޖަވާބު ދެއްވަމުން މަބްރޫކް ވިދާޅުވީ ޑޮކްޓަރެއް ނެތުމުގެ ސަބަބުން ރަށެއްގައި ހިދުމަތް މެދުކެނޑޭ ހިސާބަށް ނުދާނެ ކަމަށެވެ. އަދި ޑޮކްޓަރުން ކަރަންޓީންގެ 14 ދުވަސް ފުރިހަމަކުރާއިރު އެ ރަށެއްގައި ފަރުވާދޭނެ އިތުރު ޑޮކްޓަރެއް ނެތިއްޖެ ހާލަތެއްގައި އެ ރަށަށް އިތުރު ޑޮކްޓަރެއް ފޮނުވުމުގެ އިންތިޒާމު ހަމަޖައްސާނެ ކަމަށް ވެސް މަބްރޫކް ވިދާޅުވިއެވެ.
ކޮވިޑް-19 ރާއްޖޭގައި ހަލުވިކަމާއެކު ފެތުރެމުންދާއިރު މި ވައިރަސް މިއަށްވުރެން އިތުރަށް ފެތުރިއްޖެނަމަ ސިއްހީ ނިޒާމުގެ ތެރެއިން ފަރުވާ ދެވޭ ވަރަށް ޑޮކްޓަރުންނާއި ނަރުހުން ނެތް ކަމަށް މީގެ ކުރިން ހެލްތް މިނިސްޓަރު އަބްދުﷲ އަމީން ވަނީ ވިދާޅުވެފައެވެ.
