ކޮވިޑް-19 ގެ ނުރައްކަލަށް ހުށަހެޅިފައިވާ ބިދޭސީން މާލެއިން ބޭރުގައި ހެދިފައިވާ ކަރަންޓީނު ފެސިލިޓީތަކަށް މިރޭ ބަދަލުކުރަން ފެށޭނެކަމަށް ޓޫރިޒަމް މިނިސްޓަރ އަލީ ވަހީދު ވިދާޅުވެއްޖެ އެވެ.

އަލީ ވަހީދު ކުރެއްވި ޓްވީޓެއްގައި ވިދާޅުވީ ހޮނިހިރު ދުވަހުގެރޭ އެމަސައްކަތް ފެށޭއިރު ލޮކްޑައުން އާ ގުޅިގެން މާލޭގައި ތާށިވެފައިވާ ރައްޔިތުންނަށް އެމީހުންގެ ރަށްރަށަށް ދެވޭނެ އުސޫލުވެސް ތަންފީޒުކުރަން ފެށިފައިވާ ކަމަށެވެ. އަދި މާތްﷲ ގެ އިރާދަފުޅުން ކާރވް ފްލެޓް ކުރެވޭނެކަމަށް އަލީ ވަހީދު ވިދާޅުވި އެވެ.

ރާއްޖޭގައި މިހާތަނަށް 514 މީހަކު ކޮވިޑް-19 އަށް ޕޮޒިޓިވް ވެފައިވާއިރު މީގެތެރޭގައި ގިނައީ ބިދޭސީންނެވެ. އެގޮތުން 329 މީހުންނަކީ ބިދޭސީންނެވެ. މާލޭގައި ތޮއްޖެހިގެން އުޅޭ ބިދޭސީން އެއަށްވުރެ ރަނގަޅު މާހައުލުތަކަށް ބަދަލުކުރުމުގެ މަސައްކަތް ސަރުކާރުން ފަށާފައިވާއިރު ބިދޭސީންނަށް ޚާއްސަކޮށްގެން ހުޅުމާލެ، ގުޅީފަޅު އަދި ވިލިވަރުގައި އަންނަނީ ކަރަންޓީނު ފެސިލިޓީތައް ހަދަމުންނެވެ.

މާލެ ސިޓީގެ ލޮކްޑައުންގެ މުއްދަތު އިތުރުކުރި އެއް ސަބަބެއްކަމަށް ނޭޝަނަލް އިމަރޖެންސީ އޮޕަރޭޝަން ސެންޓަރު(އެންއީއޯސީ) އިން ބުނެފައިވަނީ ތޮއްޖެހިގެން އުޅެމުންދާ ބިދޭސީންގެ ކަންކަން ހައްލުކުރުމެވެ. ރާއްޖޭގައި މިހާތަނަށް ކޮވިޑް-19 އަށް ޕޮޒިޓިވްވެފައިވާ ކްލަސްޓަރ ތަކަށް ބަލާލާއިރު ގިނަ މީހުން ހިމެނެނީވެސް ބިދޭސީންގެ ކްލަސްޓަރތަކުގަ އެވެ. އެގޮތުން ބާޒާރުމަތީ ކްލަސްޓަރ އާއި ކޮކާކޯލާ އަދި ކޮވިޑް ވިލެޖް ހިމެނެއެވެ. މީގެއިތުރުން އެއް ތަނެއްގައި ދިރިއުޅެމުން އަންނަ ގިނަ އަދަދެއްގެ ބިދޭސީން އަންނަނީ ޕޮޒިޓިވްވަމުންނެވެ.