އަބްދުﷲ ރިޔާޒުގެ މައްޗަށް ފުލުހުންގެ ދައުރު އަދާކުރުމަށް ދަތިކުރާ ކަމަށް ތުހުމަތުކޮށްފި
ރިޔާޒު ވިދާޅުވީ ފޯނު ހުޅުވަން ބޭނުންކުރަނީ ފިންގަރ ޕްރިންޓް ކަމަށް
ކިނބިދޫ ދާއިރާގެ މެމްބަރު އަބްދުﷲ ރިޔާޒު
ރައްޔިތުންގެ މަޖިލީހުގެ ކިނބިދޫ ދާއިރާގެ މެމްބަރު އަދި ކުރީގެ ކޮމިޝަނަރ އޮފް ޕޮލިސް އަބްދުﷲ ރިޔާޒުގެ މައްޗަށް ފުލުހުންގެ ދައުރު އަދާ ކުރުމަށް ދަތިކުރާ ކަމަށް ފުލުހުންގެ ތުހުމަތު ކޮށްފި އެވެ.
އާދިއްތަ ދުވަހުގެ ރޭ 20:00އަށް ފުލުހުންގެ އިދާރާއަށް ހާޒިރުވުމަށް އެންގުމުން، ހާޒިރުވެ ފުލުހުންގެ އިދާރާއިން ނިކުމެވަޑައިގެން ވާހަކަ ދައްކަވަމުން ރިޔާޒު ވިދާޅުވީ މާރޗު މަހުގެ 27 ވަނަ ދުވަހުގެ ރޭ މާވެޔޮމަގުން ހިނގާފައި ދަނިކޮށް، އާދައިގެ ހެދުމެއްގައި ހުރި ފުލުހުންކަމަށް ބެލެވޭ ދެ މީހަކު އޭނާ ހުއްޓުވާ ކޯޓު އަމުރެއް ކަމަށް ބުނެ ލިޔުމެއް ދެއްކުމަށްފަހު ފޯނު ހަވާލު ކުރުމަށް އެދުނު ކަމަށެވެ.
ރިޔާޒު ވިދާޅުވީ އެވަގުތު އެސަރަހައްދު އަނދިރިކަމުން އެކޯޓު އަމުރުގައި އޮތް އެއްޗެއް އެނގޭވަރެއް ނުވި ކަމަށާއި އަދި މާވެޔޮމަގުން މީގެ ކުރިންވެސް ރިޔާޒަށް ހަމަލާއެއް އައިސްފައިވާތީ އެ މީހުންނާ ފޯނު ހަވާލުކުރުމަށް ދެކޮޅު ހެއްދެވިން ކަމަށާއި، ނަމަވެސް ފުލުހުންގެ އިދާރާއަށް ވަޑައިގެން ފޯނު ހަވާލު ކުރެވިދާނެ ކަމަށް ވިދާޅުވުމުން ފުލުހުން ރިޔާޒުގެ ފޯނު ޖަހައިގެންނެވި ކަމަށް ރިޔާޒު ވިދާޅުވި އެވެ. އަދި ކުޑައިރުކޮޅެއްގެ ތެރޭގައި ފުލުހުންގެ ވެހިކަލެއްގައި ގަލޮޅު ވިލީ ފުލުސްއަށް ހާޒިރުކުރި ކަމަށް ރިޔާޒު ވިދާޅުވި އެވެ.
ރިޔާޒު ވިދާޅުވީ ޖެހިގެންއައި 28 ވަނަ ދުވަހު ފުލުހުންގެ މައި އިދާރާއަށް ހާޒިރުވުމަށް އެންގުމުން ވަޑައިގެންނެވި ކަމަށާއި އެދުވަހު ކޯޓު އަމުރު ދެއްކި ކަމަށެވެ. އެ އަމުރުގައި އޮތީ ފޯނުގެ ލޮކް ކޯޑާއި ފޯނުގެ އެންމެހާ ކަންކަން ބެލުމަށް ނެރެފައިވާ އަމުރެއް ކަމަށް ރިޔާޒު ވިދާޅުވި އެވެ.
ރިޔާޒު ވިދާޅުވީ އޭނާއަކީ އެއްގޮތަކަށްވެސް ފޯނު ނިއްވާލާ ބޭފުޅެއް ނޫންކަމަށާއި އަދި ފޯނު ހުޅުވުމަށް ބޭނުންކުރަނީ ފިންގަޕްރިންޓް ކަމަށެވެ. ރިޔާޒު ވިދާޅުވީ ފޯނު ހުޅުވުމަށް ރިޔާޒުގެ އަތަށް ފޯނު ދިންއިރު އޮތީ ނިވިފަ ކަމަށާއި އެހެންކަމުން ފޯނު ހުޅުވުމަށް ބޭނުންކުރާ ލޮކް ކޯޑު ހަނދާންނެމުން ފޯނު ހުޅުވިފައި ނުވާ ކަމަށެވެ. ރިޔާޒު ވިދާޅުވީ ފޯނު ހުޅުވުމަށް އޭނާ އާއްމުކޮށް ބޭނުންކުރާ ތިން ލޮކް ކޯޑެއް ފުލުހުންނަށް ދިންނަމަވެސް އެއިން އެއްވެސް ކޯޑެއް ބޭނުންކޮށްގެން ފޯނު ނުހުޅުވުނު ކަމަށެވެ. އެހެންކަމުން އެ ފޯނު ހުޅުވޭގޮތް ނުވި ކަމަށް ރިޔާޒު ވިދާޅުވި އެވެ.
ރިޔާޒު ވިދާޅުވީ އާދިއްތަ ދުވަހުގެ ރޭ ފުލުސް އޮފީހަށް ހާޒިރު ވުމަށް އެންގުމުން ހާޒިރުވުމުން ފުލުހުން ތުހުމަތު ކޮށްފައިވަނީ ރިޔާޒުގެ ފޯނު ހުޅުވައި ނުދިނުމުން، ފުލުހުންގެ މަސައްކަތަށް ހުރަސް އެޅުމުގެ ކުށުގެ ތުހުމަތު ކަމަށެވެ. ނަމަވެސް އެމައްސަލަ ތަހުގީގު ކުރުމަށް ފުލުހުނަށް އެއްބާރުލުންދީފައިވާނެ ކަމަށް ރިޔާޒު ވިދާޅުވި އެވެ.
ރިޔާޒު ވިދާޅުވީ ކިތައްމެ ބިރެއް ދެއްކިޔަސް އިސްލާހީ މިސައްކަތުގައި ދެމިހުންނާނެ ކަމަށާއި ޖަލަށްލާފާނެ ކަމުގެ ބިރަށްޓަކައި ފަހަތަށް ނުޖެހޭނެ ކަމަށެވެ.
