ދުވަސްތަކަކަށް ފަހު އުތުރު ކޮރެއާގެ ލީޑަރު އާންމުންގެ ކުރިމައްޗަށް ނިކުމެވަޑައިގެންފި

އަވަހާރަވެއްޖެ ކަމުގެ އަޑުފެތުރިފައިވާ އުތުރު ކޮރެއާގެ ލީޑަރު ކިމް ޖޮންގ އުން، ދުވަސްތަކަކަށް ފަހު ޢާންމުންގެ ކުރިމައްޗަށް ނިކުމެވަޑައިގެންފާ ކަމުގެ ރިޕޯޓުތަކެއް ފެންމަތިވެއްޖެ އެވެ.

ކިމް ޢާންމުންގެ ކުރިމައްޗަށް ނިކުމެވަޑައިގެންނެވި ކަމަށް ރިޕޯޓުކުރީ ކޮރެއަން ސެންޓްރަލް ނިއުސް އެޖެންސީ (ކޭއެންސީއޭ) އިންނެވެ. ކޭއެންސީއޭއިން ބުނެފައިވަނީ، އަލަށް ޢިމާރާތްކޮށްފައިވާ ފަރޓިލައިޒަރ ފެކްޓްރީއެއް ބައްލަވާލައްވަން ހުކުރު ދުވަހުގެ ވަގުތެއްގައި އެހެން ބައެއް އޮފިޝަލުންނާއެކު ސަންޗިއޯންއަށް ވަޑައިގެންނެވި ކަމަށެވެ.

ކިމް ޢާންމުންގެ ތެރެއަށް ނިކުމެވަޑައިގެން އުޅޭ މަންޒަރު ދައްކުވައިދޭ ފޮޓޯތަކެއް އެޤައުމުގެ ދައުލަތުގެ ނޫހަކުން ވަނީ ހާމަކޮށްފައެވެ. ނަމަވެސް، މި ފޮޓޯތަކުގެ ޞައްޙަކަން މިހާތަނަށް ކަށަވަރުވެފައެއް ނުވެއެވެ. އެ ޤައުމުގެ ދައުލަތުގެ ނުފޫޒުގެ ތެރެއިން ހުރިހާ މީޑިއާއެއް ހިންގަމުން އަންނައިރު، މިވީހާ ދުވަހުވެސް އޭނާގެ ޞިއްޙީ ޙާލަތު ރަނގަޅުކަމަށް އެ ނޫސްތަކުން ރިޕޯޓުކޮށްފައިވެއެވެ.

ކިމް އަވަހާރަވެއްޖެ ކަމުގެ އަޑު ފެތުރިގެންދިޔައީ ނިމިދިޔަ ހަފުތާގެ ތެރޭގައެވެ. އޭނާގެ ކާފަގެ ހަނދާނުގައި އޭޕްރިލް މަހު 15 ގައި ބޭއްވި އެއްވެސް ޙަފުލާއެއްގައި ކިމް ބައިވެރިވަޑައިގެންފައި ނުވާކަމުގެ ވާހަކަތައް ދެކެވުނު ހިސާބުން، ގިނަ ބަޔަކު ވަނީ ކިމް އަވަހާރަވެއްޖެ ކަމަށް ކަނޑައަޅާފައެވެ.

ކިމް އަވަހާރަވެއްޖެ ކަމަށް މީގެ ކުރިންވެސް ވާހަކަތަކެއް ދެކެވުނެވެ. 2014 ވަނަ އަހަރުގެ ތެރޭގައިވެސް، ގިނަ ދުވަސްތަކެއް ވަންދެން ޢާންމުންގެ ލޯތަކުން ގެއްލިގެން ދިއުމާއި ގުޅިގެން މިފަދަ ވާހަކަތަކެއް ފެންމަތިވިއެވެ.