މާލޭގައި ތާށިވި ރަށްތަކުގެ މީހުން ފޮނުވުމުގެ އިންތިޒާމުތަކާ ގުޅޭ ގޮތުން ރައީސުލްޖުމްހޫރިއްޔާ މަޝްވަރާކުރައްވައިފި
2 މެއި 2020 | ހޮނިހިރު 07:06ބިދޭސީ މަސައްކަތްތެރީންގެ ހާލަތު ބެއްލެވި
ރައީސް ސޯލިހު ވާޗުއަލްކޮށް ޓާސްކް ފޯހުގެ ބޭފުޅުުންނާއެކު ބޭއްވި ބައްދަލުވުމުގެ ތެރެއިން
މާލެ ސިޓީ ފުރަބަންދުކުރުމާއި ގުޅިގެން މާލޭގައި ތާށިވެފައި ތިބި އެހެނިހެން ރަށްރަށުގެ މީހުން ރަށަށް ދެވޭނެ އިންތިޒާމުތައް ހަމަޖެއްސުމާ ގުޅޭ ގޮތުން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙު ޓާސްކް ފޯސްގެ ބެފުޅުންނާ މަޝްވަރާ ކުރައްވައިފިއެވެ.
ރައީސުލްޖުމްހޫރިއްޔާގެ އޮފީހުން ބުނީ ހުކުރު ދުވަހުގެ ރޭ ޓާސްކްފޯހުގެ ބައްދަލުވުމުގައި ކޮވިޑް19ގެ ސަބަބުން ބިދޭސީ މަސައްކަތްތެރީންނަށް ކުރާ އަސަރާއި، އެމީހުންގެ ޙާލަތާ ބެހޭ ގޮޮތުން މަޝްވަރާ ކުރެވުނު ކަމަށެވެ.
އަދި މާލެއަށް އެކި ބޭނުންތަކުގައި އައިސް މިހާރު ރަށްރަށް ނުދެވިފައި ތިބި މީހުންގެ ތެރެއިން، ރަށަށް ދާން ބޭނުންވެފައި ތިބި މީހުންނަށް އެ އިންތިޒާމު ހަމަޖެއްސުމާ ގުޅޭ ގޮތުން ވެސް ފުޅާ ދާއިރާއެއްގައި މަޝްވަރާ ކުރެވިފައިވާ ކަމަށެވެ. މީގެ އިތުރުން މިހާރަށް ވުރެ ބޮޑަށް މަސައްކަތްތައް ހަރުދަނާ ކުރެވޭ ގޮތްތަކާ ގުޅޭ ގޮތުން ވެސް ވަނީ މަޝްވަރާ ކުރައްވާފައިވާކަމަށް ރައީސުލްޖުމްހޫރިއްޔާގެ އޮފީހުން ބުނެއެވެ.
އޭޕްރީލް 15ގައި މާލެސިޓީ ލޮކްޑައުން ކުރުމާއި ގުޅިގެން ބޭސްފަރުވާއަށާއި، އަދިވެސް އެހެނިހެން ބޭނުންތަކަށް މާލެއަށް އައިސް ތިބި ގިނަ ބަޔަކު ވަނީ ރަށްރަށް ނުދެވި ތާށިވެފައެވެ. އަދި ބައެއް މީހުން ޙާލުގައި ޖެހުމާއި ގުޅިގެން ޖެންޑަރ މިނިސްޓްރީން ވަނީ އެމީހުންނަށް ވަގުތީ ހިޔާވަހިކަން ފޯރުކޮށްދީފައެވެ.
ކޮވިޑް-19އާ ގުޅިގެން ކުރަމުންދާ މަސައްކަތްތަކާއި، ޙާލަތު ރައީސުލްޖުމްހޫރިއްޔާ ވަރަށް ގާތުން ބައްލަވަމުން ގެންދަވާއިރު، މާލެއިން ފުރަތަމަ ފަހަރަށް މީހަކު ކޮވިޑް-19 އަށް ޕޮޒިޓިވްވުމާއި ގުޅިގެން ޤައުމާއި މުޚާތަބު ކުރައްވާ ވާހަކަފުޅު ދައްކަވަމުން ރައީސުލްޖުމްހޫރިއްޔާ ވަނީ، ހުރިހާ ރައްޔިތުންގެ ކިބައިން ކެތްތެރިކަމާއެކު ސަރުކާރުން ކުރަމުންދާ މަސައްކަތަށް އެއްބާރުލުން ދެއްވުމަށް އެދިވަޑައިގަންނަވާފައެވެ.
މުޅި މުޖުތަމަޢުގެ ރައްކާތެރިކަމަށް އެންމެން އެކުގައި މަސައްކަތް ކުރުމަކީ ވަރަށް މުހިންމު ކަމެއް ކަމަށާއި، ކެތްތެރިކަމާއި ޙިކުމަތްތެރިކަމާއެކު، އެކުގައި މަސައްކަތް ކުރުމުން، ރާއްޖެއިން ކޮވިޑް-19 އިން އަރައިގަނެވޭނެ ކަމަށް އެމަނިކުފާނު ވިދާޅުވެފައިވެއެވެ.
