އޭޕްރީލް މަހުގެ 15 ދުވަހުން ފެށިގެން މާލެ ސިޓީ ލޮކްޑައުން ކުރުމުން މާލޭގައި ތާށިވެފައި ތިބި ރަށްރަށުގެ މީހުންނަށް ރަށްރަށަށް ދެވޭނެ އުސޫލު ހޮނިހިރު ދުވަހު ޖެންޑަރ މިނިސްޓްރީގެ ފަރާތުން އާންމުކުރާނެ ކަމަށް ކޮވިޑް-19 ގެ ޓާސްކް ފޯހުގެ ތަރުޖަމާނު މަބްރޫކް އަޒީޒު ވިދާޅުވެއްޖެ އެވެ.

އެކިކަންކަމަށް މާލެ އައިސްފައިވާ ރަށްރަށުގެ މީހުންނާއި ރިސޯޓްތަކުން މާލެ އައި މީހުން މާލެ ސިޓީ ލޮކްޑައުންކުރުމުގެ ސަބަބުން ވަނީ މާލޭގައި ތާށިވެފަ އެވެ. އެކަމުގެ ސަބަބުން އެމީހުންގެ އަތުން ގިނަ އަދަދަކަށް ލާރި ޚަރަދުވެ ތިބޭނެ ގޮތެއް ނެތުމުގެ ދަތިކަން ގިނަ ބަޔަކަށް ކޮށްފައިވާތީ އެކަމުގެ ޝަކުވާތައް ވަނީ ވަރަށް ބޮޑުވެފައެވެ.

އެކަމާއި ގުޅިގެން ކޮވިޑް-19 ގެ ޓާސްކް ފޯހުން ބުނެފައިވަނީ އެފަދަ މީހުންނަށް އެހީތެރިކަން ދިނުމުގެ ކަންކަން ޖެންޑަރ މިނިސްޓްރީގެ ފަރާތުން ކުރިޔަށްގެންދާ ކަމަށެވެ. އެގޮތުން އެހީތެރިކަން ބޭނުންވެގެން ޖެންޑަރ މިނިސްޓްރީއަށް ގުޅި މީހުންނަށް އެމިނިސްޓްރީގެ ފަރާތުން ވަނީ އެހީތެރިކަން ފޯރުކޮށްދީފަ އެވެ.

ހުކުރު ދުވަހުގެރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މަބްރޫކް ވިދާޅުވީ މާލޭގައި ތިބި ރަށްރަށުގެ މީހުން ދިޔުމަށް އުސޫލުތަކެއް ކަނޑާއަޅާ އެ އުސޫލުތަކުގެ ދަށުން ރަށްރަށަށް ދިޔުމަށް ކަންކަން ރާވާ ދިނުމުގެ ކަންކަން ޖެންޑަރ މިނިސްޓްރީން ކުރަމުން ގެންދާކަމަށެވެ.

ކޮވިޑް-19 މާލެއިން ފެނުމާއެކު މާލެ ސިޓީ ލޮކްޑައުންކުރުމުން މާލެ އަށް އަރާ ފޭބުން ވަނީ މަނާކޮށްފަ އެވެ. އެއާއެކު މާލެ އަންނަން ބޭނުންވާ މީހުންގެ ތެރެއިންވެސް ގިނަ ބަޔަކު ވަނީ އެބަޔަކު ތިބި ތަނެއްގައި ތާށިވެފަ އެވެ. ނަމަވެސް މާލެ އަންނަން ބޭނުންވާ މީހުންނަށް އެކަމަށް އެދުމުން އޮންނަ އުސޫލުގެ ތެރެއިން އެކަން ކުރަމުން އަންނަކަމަށް ފުލުހުން ވަނީ ބުނެފަ އެވެ.