ކޮވިޑް-19 އަރައިގަންނަން މަސައްކަތް ކުރަނީ މަސައްކަތްތެރިންގެ ހައްގު ހިމާޔަތް ކުރުމާއި އެކު: ރައީސް
ހުންނަވާނީ މަސައްކަތްތެރިންނާއެކު ކަަމަށް ވިދާޅުވި
ރައީސް ސޯލިހު
ކޮވިޑް-19 އިން އަރައިގަންނަން މަސައްކަތް ކުރަނީ މަސައްކަތްތެރިންގެ ހައްގުތައް ހިމާޔަތް ކުރުމާއި އެކު ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
މަސައްކަތްތެރިންގެ ދުވަހުގެ މުނާސަބަތުގައި ރައީސް ސޯލިހު ކުރެއްވި ޓްވީޓެއްގައި އެމަނިކުފާނު ވިދާޅުވީ، ކޮވިޑް-19 ގެ ސަބަބުން ދުނިޔޭގެ އިގްތިސާދު އަދި މަސައްކަތްތެރިންގެ ހައްގުތަކަށް ބޮޑެތި ގޮންޖެހުންތަކެއް ދިމާވެފައިވާ ކަމަށެވެ.
ރައީސް ވިދާޅުވީ، އެމަނިކުފާނު އަބަދުވެސް ހުންނަވަނީ ރާއްޖޭގެ މަސައްކަތްތެރިންނާއި އެކު ކަމަށާއި، މިހާރު ދިމާވެފައި މިއޮތް ބަލިމަޑުކަމުން އަރައިގަންނަން މަސައްކަތް ކުރަނީ މަސައްކަތްތެރިންގެ ހައްގުތައް ހިމާޔަތް ކުރުމާއި އެކު ކަމަށެވެ.
މަސައްކަތްތެރިންނާއެކު ހުންނަވާނެ ކަމަށް ރައީސް ވިދާޅުވެފައިވާއިރު، ކޮވިޑް-19ގެ ނުރައްކާތެރިކަން ރާއްޖޭގައި އޮތް ކަމުގައި ވިޔަސް، ސަރުކާރު މުވައްޒަފުންގެ މުސާރަ ކުޑަކުރަން ގަސްތު ނުކުރައްވާ ކަމަށް ރައީސް ވަނީ ވިދާޅުވެފައެވެ.
ކޮވިޑް-19 އާ ގުޅިގެން ގިނަ ބަޔަކު ވަޒީފާތަކުން ވަކިކުރާ މައްސަލަތައް ވަނީ ބޮޑުވެފައެވެ. އިކޮނޮމިކް މިނިސްޓްރީން ގާއިމްކޮށްފައިވާ ޖޯބް ޕޯޓަލް އަށް ވަޒީފާއާ ގުޅުންހުރި އެތައް މައްސަލަތަކެއް ދަނީ ހުށައެޅެމުންނެވެ. އެގޮތުން އެންމެ ގިނައިން ވަޒީފާތަކުން ވަކިކޮށްފައިވަނީ ރިސޯޓުތަކުންނެވެ. އެކި ރިސޯޓުތަކުގައި ވަޒީފާ އަދާކުރަމުންދާ މުވައްޒަފުންގެ ތެރެއިން މިހާތަނަށް 11،000 އެއްހާ މުވައްޒަފުން މުސާރަ ނުލިބޭގޮތަށް ފޮނުވާލާފައިވާ ކަމަށް ޓޫރިޒަމް އެމްޕްލޯއީސް އެސޯސިއޭޝަން އޮފް މޯލްޑިވްސް (ޓީމް) އިން ވަނީ މީގެ ކުރިން ބުނެފައެވެ.
