ކޮވިޑް-19 އަށް ޓެސްޓުކުރާ މެޝިންތައް ރާއްޖެއަށް ހަދިޔާ ކުރުމާގުޅޭ ގޮތުން މަޝްވަރާ ކުރަމުންދާކަމަށް ޗައިނާއިން ރާއްޖެއަށް ކަނޑައަޅުއްވާފައިވާ ސަފީރު ޒަންގް ލީ ޒޮންގް ވިދާޅުވެއްޖެއެވެ.
ކޮވިޑް-19 ޓެސްޓު ކުރުމުގެ ކެޕޭސިޓީ އިތުރުކުރުމުގެ ގޮތުން ޓެސްޓުކުރާ މެޝިންތައް ރާއްޖެއަށް ހަދިޔާ ކުރުމާމެދު ދެކޭގޮތް އޮޅުންފިލުވުމަށް ޓްވިޓަރގައި މީހަކު ކުރި ސުވާލަކަށް ޖަވާބު ދެއްވަމުން ސަފީރު ވިދާޅުވީ، އެކަމާ ގުޅޭގޮތުން މަޝްވަރާތައް ކުރެވެމުންދާ ކަމަށެވެ. ނަމަވެސް އިތުރު ތަފުޞީލެއް ސަފީރު ހާމައެއް ނުކުރައްވައެވެ.
ކޮވިޑް-19 އާ ގުޅިގެން ޗައިނާއިން ދަނީ އެކި ގޮތް ގޮތުން ރާއްޖެއަށް އެހީތެރިކަން ފޯރުކޮށްދެމުންނެވެ. އެގޮތުން މީގެ ކުރިންވެސް ޞިއްޙީ ދާއިރާއަށް ބޭނުންވާ ގިނަ ސާމަނުތަކެއް އެ ޤައުމުން ވަނީ ރާއްޖެއަށް ހަދިޔާ ކޮށްފައެވެ.
ރާއްޖޭގައި މިހާރު ކޮވިޑް-19 އަށް ޓެސްޓު ކުރެވެނީ އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގައި ހުންނަ ނެޝަނަލް ރިފަރެންސްގެ ލެބޯރެޓަރީގެ އިތުރުން ފުލުހުންގެ ފޮރެންސިލް ލެބޯރެޓަރީގައެވެ. އައިޖީއެމްއެޗުން ވަނީ ކޮވިޑް-19 އަށް ޓެސްޓު ކުރަން 16 ލެބް ޓެކްނީޝަނުން ތަމްރީނު ކޮށްފައެވެ.
ދާދި ފަހުން ބޭއްވި ޕްރެސް ކޮންފަރެންސެއްގައި ވާހަކަ ދައްކަވަމުން ހެލްތު މިނިސްޓަރު ޢަބްދުﷲ އަމީން ވިދާޅުވީ، މިހާރު ދުވާލެއްގެ މައްޗަށް 400 ޓެސްޓު ހެދޭނެ ކަމަށެވެ. ޢާންމުންގެ ތެރޭގައި ކޮވިޑް-19 ފެތުރުމުންދާތީވެ ބަލި އޮތް މިންވަރު ބަަލަން ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ވަނީ އެކި ޞަރަޙައްދުތަކުން ސާމްޕަލް ނަގަން ފަށާފައެވެ.
