ފ. އަތޮޅު ވިއްކާލުމާ ބެހޭ ބެނާއެއް ދަމައިފި ނަމަ ދިއްދޫ ޖަލްސާ ހުއްޓުވާނެކަމުގެ އިންޒާރު ފުލުހުން ދީފި
ފ. އަތޮޅޭ ކިޔައިން ބެނާއެއް ދަމައިފިނަމަ ޖަލްސާ ހުއްޓުވާނެ ކަމަށް ފުލުހުން ބުނިކަމަށް ހާޝިމް ވިދާޅުވި
ފ އަތޮޅު ބަޔަކު ފ. އަތޮޅު ވިއްކާލުމާ ދެކޮޅަށް މުޒާހަރާ ކުރަނީ
އެމްޑީޕީން ބުރާސްފަތި ދުވަހުގެ ރޭ ހއ. ދިއްދޫގައި ބާއްވާ ޖަލްސާއާ ދިމާކޮށް ފ. އަތޮޅާ ގުޅޭ ގޮތުން އެއްވެސް ބެނާއެއް ދަމައިފި ނަމަ އެ ޖަލްސާ ހުއްޓުވާނެ ކަމުގެ އިންޒާރު ދީފައިވާ ކަމަށް އެމްޑީޕީން ބުނެފިއެވެ.
އެމްޑީޕީން ލޯކަލް ކައުންސިލް އިންތިހާބުގެ ކެމްޕެއިންގެ ހަރަކާތްތައް ރާއްޖޭގެ އުތުރުގައި ލޯންޗް ކުރުމަށް ހއ. ދިއްދޫގައި ބާއްވާ ހާއްސަ ޖަލްސާއާ ދިމާކޮށް، އެމްޑީޕީ ދިއްދޫ ދާއިރާގެ ސެކްރެޓަރީ ޖެނެރަލް އަދި އެމްޑީޕީ ކެމްޕެއިން ކަންތައްތަކާ އެންމެ އިސްކޮށް ހަރަކާތްތެރިވާ އަލީ ހާޝިމް ވިދާޅުވީ އަންގާރަ ދުވަހުގެ 14:30 ދިއްދޫ ޕޮލިސް ސްޓޭޝަނަށް އޭނާ ހާޒިރުކޮށް، ފ. އަތޮޅޭ ކިޔައިގެން އެއްވެސް ބޭނާއެއް ރަށުގެ އެއްވެސް ސަރަހައްދެއްގައި ނުދެމުމަށް ފުލުހުން އަންގާފައިވާ ކަމަށެވެ.
އޭނާ ވިދާޅުވީ ފ. އަތޮޅާ ބެހޭ ގޮތުން އެއްވެސް ބެނާއެއް ރަށު ތެރޭގައި ނުވަތަ ޖަލްސާ ބާއްވާ ސަރަހައްދުގައި ވެސް ދަމައިފިނަމަ ޖަލްސާ ހުއްޓުވާނެ ކަމުގެ އިންޒާރު ފުލުހުން ދީފައިވާ ކަމަށެވެ.
"ފ. އަތޮޅޭ ކިޔައިން ރަށު ތެރޭގައި ނުވަތަ ޖަލްސާ ބާއްވާ ސަރައްދުން ވެސް އެއްވެސް ބެނާއެއް ފެނިއްޖެނަމަ ޖަލްސާ ހުއްޓުވާނެ ކަމަށް ފުލުހުން ބުނީ،" އަލީ ހާޝިމް ވިދާޅުވި އެވެ.
ރާއްޖެޓީވީން ފ. އަތޮޅަށް މިދިޔަ ހަފްތާ ބަންދުގައި ކުރި ދަތުރުގައި ރާއްޖެޓީވީއަށާއި އެ އަތޮޅަށް ދިޔަ ނޫސްވެރިންނަށް ބަޔަކު މީހުން ވަނީ މަރުގެ އިންޒާރާއި ސްޓޭޝަނަށް ގެއްލުންދޭނެ ކަމަށް ވެސް އިންޒާރު ދީފަ އެވެ.
ސަރުކާރުން ފ. އަތޮޅު ވިއްކާލަން އުޅޭ ކަމަށް ބުނެ އިދިކޮޅު ފަރާތްތަކުން ކެނޑިނޭޅި އެވާހަކަތައް ދައްކަމުންދާއިރު ރައްޔިތުންގެ ގިނަ ބަޔަކު ވެސް އެކަމާ ދެކޮޅު ހަދަމުންދާކަން ފާހަގަކުރެވެ އެވެ. އަދި ސަރުކާރުން ވެސް ފަ. އަތޮޅަށް ހަދަން އުޅޭ ގޮތް ސާފުކޮށް ރައްޔިތުންނަށް މިހާތަނަށް ހާމަކޮށްދީފައެއް ނުވެއެވެ.
ފ. އަތޮޅުގެ "ޑީލް" މި މާރޗް މަހު، ސައުދީ ރަސްގެފާނު ރާއްޖެއަށް ކުރައްވާ ދަތުރުފުޅާއެކު ކުރިއަށްދާނެ ކަމަށް ބެލެވެއެވެ. މިކަމާ ނުރުހުން ފާޅުކުރުމަށް ފ. އަތޮޅުގެ ބައެއް ރަށްތަކުގައި ދަމާފައިވާ ބެނާތައް ނަގައި ފާރުތަކުގައި ހުރި ޝުއޫރުތައް ފުލުހުން ވަނީ ފުހެލާފައެވެ.
