ކަރަންޓީންގައި ހުރި ދިވެއްސަކު ކޮވިޑް-19 އަށް ޓެސްޓް ކުރުމަށްޓަކައި ސާމްޕަލް ދިނުމަށް ދެކޮޅު ހެދުމުން، ސާމްޕަލް ދިނުމަށް އެމީހާގެ މައްޗަށް ސިވިލް ކޯޓުން އަމުރެއް ނެރެފި އެވެ.

ބުރާސްފަތި ދުވަހުގެ ރޭ ސިވިލް ކޯޓުން ބުނީ، ކަރަންޓީންގައިި ހުރި ދިވެއްސަކު ކޮވިޑް-19 އަށް ޓެސްޓް ކުރުމަށްޓަކައި ސާމްޕަލް ދިނުމަށް ދެކޮޅު ހަދާފައިވާތީ އެފަރާތުގެ މައްޗަށް ސާމްޕަލް ދިނުމަށް އެކޯޓުން އަމުރެއް ނެރެފައިވާ ކަމަށެވެ.

ސިވިލް ކޯޓުން ބުނީ، އެކޯޓުން ނެރުނު މި އަމުރުގައި، އޭނާގެ ސާމްޕަލް ނެގުމަށްޓަކައި ޑައިރެކްޓަރ ޖެނެރަލް އޮފް ޕަބްލިކް ހެލްތް ކޮށްފައިވާ އަމުރު ތަންފީޒު ކުރުމަށް އެކަމުގައި ޝާމިލުވާ ފަރާތްތަކަށާއި ފުލުހުންގެ މައްޗަށް އަމުރުކޮށްފައިވާ ކަމަށެވެ.

ކަރަންޓީނަށް ގެންދަން ނެރޭ ޢަމުރުތަކާއި، ކޮވިޑް-19 އާގުޅިގެން ނެރޭ މިފަދަ އަމުރުތައް، އެމީހުންގެ ޒާތީ މައުލޫމާތު ސިއްރު ކުރުމުގެ ބޭނުމުގައި ސިވިލް ކޯޓުން އެޢަމުރުތައް ޢާންމެއްނުކުރެއެވެ.

ރާއްޖޭގައި އިޢުލާނުކޮށްފައިވާ ޞިއްޙީ ކުއްލި ނުރައްކަލުގެ ޙާލަތުގައި، ކަރަންޓީނަށް ދިއުމަށް ދެކޮޅުހެދި ދިވެއްސެއްގެ މައްޗަށް ނިމުނު އޭޕްރީލް މަހުގެ 26 ވަނަ ދުވަހުގެ ރޭ އޮސްޓްރިއާގެ މީހެއްގެ މައްޗަށް އަމުރެއް ސިވިލް ކޯޓުން ނެރެފައި ވެއެވެ. އަދި އޭޕްރީލް 25 ވަނަ ދުވަހުގެ ރޭ ކަރަންޓީނަށް ދާން ދެކޮޅުހެދި ދިވެއްސެއްގެ މައްޗަށް އަމުރެއް އަމުރެއް ނެރެފައިވާއިރު، ކަރަންޓީނަށް ދާންދެކޮޅުހެދި ދެ މީހެއްގެ މައްޗަށް، އޭޕްރީލް މަހުގެ 20 ވަނަ ދުވަހުވެސް ސިވިލް ކޯޓުން ޢަމުރެއް ނެރެފައިވެއެވެ.

ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 ރާއްޖޭގައި ފެތުރެން ފެށުމާއި ގުޅިގެން، މާލެ ޞަރަޙައްދު ވަނީ ލޮކްޑައުން ކޮށްފައެވެ. އަދި އެއް ރަށުން އަނެއްރަށަށް ދިއުން މަނާކޮށްފަ އެވެ. މާލެ ޞަރަޙައްދުގެ އިތުރުން، ރާއްޖޭގެ ބައެއް ރަށްރަށުން ވެސް ކޮވިޑް-19 އަށް ޕޮޒިޓިވްވާ މީހުން ދަނީ ފެންނަމުންނެވެ.

އެހެންކަމުން ރާއްޖޭގެ ގިނަ ރަށްތަކެއް މޮނީޓަރިންގ ޙާލަތަށް ގެނެސްފައިވާއިރު، ކޮންޓެކްޓް ޓްރޭސިންގ ގެ ދަށުން ބައެއް ފަރާތްތައް ކަރަންޓީން ކުރަމުންވެސް އެބަދެއެވެ.

ކަރަންޓީނަށް ދިއުން ދެކޮޅު ހެދުމާއި ސާމްޕަލް ދިނުމަށް ދެކޮޅުހެދުމަކީ ޢާންމު ޞިއްޙަތު ރައްކާތެރި ކުރުމުގެ ޤާނޫނުގެ ދަށުން ކުށެކެވެ. އަދި ކަރަންޓީނަށް އެމީހަކު ގެންދިއުމުގެ ޢަމުރުތަކާއި ސާމްޕަލް ނެގުމަށް، އަމުރު ނެރުމުގެ ބާރުވެސް ކޯޓުތަކަށް ލިބިގެންވެއެވެ. އަދި މިފަދަ ޢާންމު ޞިއްޙަތުގެ ކުއްލި ނުރައްކަލުގެ ޙާލަތުގައި ތެދު މަޢުލޫމާތު ހާމަކުރުމަކީ ހުރިހާ ފަރާތްތަކަށް ވެސް އެޤާނޫނުން ލާޒިމުކުރާ ކަމެކެވެ.