ޓެކްސީ އަދި ޕްރައިވެޓް އުޅަނދުތަކުގައި ކާބޯތަކެތި އުފުލުމުގައި އަމަލުކުރާނެ ގޮތުގެ އުސޫލު ހެލްތް ޕްރޮޓެކްޝަން އޭޖެންސީ (އެޗްޕީއޭ)އިން އާންމުކޮށްފިއެވެ.

ބުރާސްފަތި ދުވަހު އެޗްޕީއޭއިން އާންމުކޮށްފައިވާ އުސޫލުގައި ވަނީ ކާބޯތަކެތި އުފުލުމަށް ބޭނުންކުރާ ޓެކްސީ ނުވަތަ ޕްރައިވެޓް އުޅަނދުތަކުގައި އެ ޚިދުމަތް ފޯރުކޮށްދިނުމުގައި ފުރިހަމަވާންޖެހޭ ޝަރުތުތަކާއި، ފޯރުކޮށްދޭ ތަކެތި ހިފާ ގެންގުޅުމުގައި އަމަލު ކުރަންޖެހޭ ގޮތް ބަޔާންކޮށްފައެވެ.

އޭގެ އިތުރުން، މުވައްޒަފުންގެ ސިއްޙަތާއި އާންމު ސާފުތަހިރުކަމުގެ މިންގަނޑުތައްވެސް އުސޫލުގައި ބަޔާންކޮށްފައިވެއެވެ.

އޭގެ އިތުރުން، ޑެލިވަރީ ކުރުމަށް ކާރުގައި އުޅެ ވަގުތުތަކުގައި އިތުރު އަންގިއާއި މާސްކް ބަހައްޓަންވާނެ ކަމަށާއި، ޑްރައިވަރު އެއްވެސް ގޮތަކަށް ތަކެތި ބަލާ ފިހާރައަށް ވަދެގެން ނުވާނެކަންވެސް ފާހަގަކޮށްފައިވެއެވެ. އަދި ގޭގެއަށް ފޯރުކޮށްދޭ ތަކެތި ފިހާރައިން ކާރަށް އެރުވުމުގައި ފިހާރައިގެ މުވައްޒަފުންނާއި ޑްރައިވަރު ގައިދުރުކަން ބަހައްޓަންވާނެ ކަމަށާއި،ގޭގެއަށް ތަކެތި ފޯރުކޮށްދޭ އިރު ޑްރައިވަރު ގޭގެ އެތެރެއަށް ވަދެގެން ނުވާނެކަމަށް ބަޔާންކޮށްފައިވާއިރު، ފޯރުކޮށްދޭ ފަރާތަށް ގުޅާ ގޭގެ ދޮރުކައިރިން އެއްޗިއްސާ ހަވާލުވުމަށް އަންގަންވާނެކަންވެސް ވަނީ ބަޔާންކޮށްފައެވެ.

އެޗްޕީއޭއިން ބުނީ، އުޅަނދުގައި އުފުލާ ކާބޯތަކެތި ހުންނަންވާނީ ރަނގަޅަށް ބަންދުކޮށް އަދި ޑެލިވަރީ ކުރާ ގޭގެ ނަމާ ގުޅޭނެ ނަމްބަރު ޖަހާ އަދި ރިސީޓް ކޮތަޅުގެ ބޭރުގައި ހަރުކުރެވިފައި ކަމަށެވެ. އަދި ކާރަށް ތަކެތި އެރުވި ތާރީޚާއި ގަޑި ޖަހަންވާނެކަންވެސް ބަޔާންކޮށްފައިވާއިރު، ކާބޯތަކެތި އުފުލަންވާނީ ދޮންނަކުޑި، ބްލީޗް، އަދި އެނޫންވެސް ކެމިކަލް އާއި އެކުވެ ތަޢައްޔަރު ނުވާނެ ގޮތަށްކަމަށް ބުނެފައިވެއެވެ.

އޭގެ އިތުރުންވެސް އާންމު ސާފުތާހިރުކަމާ ގުޅޭ އިތުރު ގިނަ އުސޫލުތަކެއް ވަނީ ބަޔާންކޮށްފައެވެ.