ރާއްޖެޓީވީގެ އަބުރު ފަންޑަށް ކުރެންދޫގެ 8،800 ރ.

ރާއްޖެޓީވީން ބަހައްޓާފައިވާ އަބުރު ފަންޑަށް ކުރެންދޫ އެމްޑީޕީގެ އަންހެނުންގެ ރޫހުގެ ފަރާތުން އެހީތެރިކަން ފޯރުކޮށްދީއެވެ.

ޅ. ކުރެންދޫ އެމްޑީޕީ އަންހެނުންގެ ރޫހުގެ ފަރާތުން ރާއްޖޭގެ ޓީވީގެ އަބުރު ފަންޑަށް އެހީވުމުގެ ގޮތުން 8،805 ރ. ވަނީ ހަދިޔާ ކޮށްފައެވެ.

ފައިސާގެ އެހީ ހަދިޔާ ކުރުމަށް ފަހު ކުރެންދޫ އެމްޑީޕީގެ އަންހެނުންގެ ރޫހގެ ފަރާތުން ވާހަކަ ދެއްކެވި މެމްބަރު ވިދާޅުވީ ކުރެންދޫ ރައްޔިތުންނާ އަދި ކުރެންދޫ އެމްޑީޕީ އަންހެނުންގެ ރޫހުގެ ހުރިހައި މެމްބަރުން ވެސް ތިބީ ރާއްޖެޓީވީއާ އެކުކަމަށެވެ. އަބަދު ވެސް އެބޭފުޅުންގެ ފަރާތުން ރާއްޖެޓީވީ އަށް އެހީތެރިކަން ފޯރުކޮށްދެމުންދާނެ ކަމަށް އޭނާ ވިދާޅުވިއެވެ.

ރާއްޖެޓވީން އަބުރު ފަންޑުގެ ނަމުގައި ފަންޑު ފޮއްޓަށް ބަހައްޓާފައި މިވަނީ ރާއްޖޭގެ އެކި މުއައްސަސާތަކުން ރާއްޖެޓީވީ އާއި ރާއްޖެޓީވީގެ ނޫސްވެރިން ބޮޑެތި އަދަދުތަކުން ޖޫރިމަނާކުރަމުން ދާތީ އެ ފައިސާ ދެއްކުމަށްޓަކައި އެހީވުމަށް ހެޔޮއެދޭ ފަރާތްތަކުން އެދެމުންދާތީ އެވެ.

ރާއްޖެޓީވީގެ މެނޭޖްމެންޓުން މިފަދަ ފަންޑެއް ހުޅުވުމަށް ނިންމީ އަބުރުގެ ގާނޫނުގެ ދަށުން ރާއްޖެޓީވީ 200،000ރ. އިން ޖޫރިނަމާކޮށް، އަދި ރާއްޖެޓީވީގެ ކުރީގެ ނޫސްވެރިޔަކު 50،000ރ. އިން ޖޫރިމަނާ ކުރުމާ ގުޅިގެންނެވެ. އަދި ފުލުހުންގެ ވާޖިބަށް ހުރަސްއެޅިކަން ސާބިތުކޮށް، ރާއްޖެޓީވީގެ ނޫސްވެރިޔާ ލީވާން އަލީ ނާސިރު އާއި މުހައްމަދު ވިސާމް، ކޮންމެ މީހަކު 28،800ރ. އިން ޖޫރިމަނާކޮށްފައި ވާތީ އެވެ.

ރާއްޖެޓީވީ އާއި ރާއްޖެޓީވީގެ ނޫސްވެރިން ޖޫރިމަނާކުރަމުންދާ އިރު، ރާއްޖޭޓީވީ އާއި އެ ސްޓޭޝަނުގެ ނޫސްވެރިންނަށް ކެނޑިނޭޅިދަނީ ބިރުދައްކާ އިންޒާރުދެމުންނެވެ. އަދި މި މައްސަލަތައް ވެސް ފުލުހުންނަށް ހުށަހަޅައިގެން ކުރިއަށްގެންދާއިރު މައްސަލަތަކުގައި މާބޮޑު ކުރިއެރުންތަކެއް ހޯދާފައިނުވާކަން ފާހަގަކޮށްލެވެ އެވެ.