ކައުންސިލްތަކުގެ އިންތިހާބާގުޅޭ "ސަންސެޓް" ބިލް، އިސްލާހުތަކާއެކު މަޖިލީހުން ފާސްކޮށްފި
މިބިލަށް އަމަލު ކުރަން ފަށާ ތާރީހުން ފެށިގެން 1 އަހަރުގެ ތެރޭގައި އިންތިހާބު ބާއްވާ ނިންމަން ޖެހޭ
ސަރުކާރުގެ ފަރާތުން މަޖިލީހަށް އެބިލް ހުށަހެޅުއްވި މެމްބަރު ހިސާން ހުސައިން
ކޮވިޑް-19 ރޯގާއާއި ގުޅިގެން ވަކި މުއްދަތެއް ނެތްގޮތަށް ފަސްކުރެވުފައިވާ ލޯކަލް ކައުންސިލްތަކުގެ އިންތިޚާބާގުޅޭ ޚާއްޞަ ބިލު ރައްޔިތުންގެ މަޖިލީހުން ފާސްކޮށްފިއެވެ.
ރައްޔިތުންގެ މަޖިލީހުގެ ބުދަ ދުވަހުގެ ޖަލްސާގައި އެބިލު ފާސްކޮށްފައިވަނީ، އެބިލު ދިރާސާކުރި މަޖިލީހުގެ މިނިވަން މުއައްސަސާތަކުގެ ކޮމެޓީން ނިންމާފައިވާ ގޮތުގެ ރިޕޯޓަށް ހުށަހެޅުނު އިޞްލާޙުތަކާއެކުގައެވެ. މި ބިލު ފާސްކޮށްފައިވަނީ ވޯޓުގައި ބައިވެރިވެވަޑައިގެންނެވި، 63 މެންބަރުންގެ އިއްތިފާޤުންނެވެ.
މި މަހުގެ ހަތަރު ވަނަ ދުވަހަށް ކުރިން ތާވަލުކުރި ލޯކަލް ކައުންސިލުތަކުގެ އިންތިޚާބު ފަސްކުރުމަށް ނިންމި ނިންމުމާ ގުޅިގެން، ސަރުކާރުގެ ފަރާތުން ހުށަހެޅި ލޯކަލް ކައުންސިލްތަކުގެ އިންތިޚާބާ ގުޅޭ ޚާއްޞަ ބިލު މަޖިލީހަށް ހުށަހަޅުއްވީ، ތުޅާދޫ ދާއިރާގެ މެންބަރު ހިސާން ހުސައިނެވެ. އަދި ހިސާން ވަނީ ކޮމެޓީން ދިރާސާކޮށް ނިންމި ގޮތުގެ ރިޕޯޓަށް ބައެއް އިޞްލާޙުތައް ހުށަހަޅުއްވާފައެވެ.
އެގޮތުން، ލޯކަލް ކައުންސިލްތަކުގެ އިންތިޚާބާގުޅޭ އިތުރު ތަފުޞީލުތަކާއި، އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ އިންތިޚާބާގުޅޭ އިތުރު ތަފުޞީލުތައް ހިސާން ހުށަހެޅުއްވިއެވެ.
މީގެއިތުރުން ހިސާން ވަނީ، މިހާރު މިބިލު އޮތީ (ރެޓްރޮސްޕެކްޓިވް) ކުރިން ހިނގާފައިވާ ކަމަކަށްވާތީ، މިޤާނޫނު ތަޞްދީޤުވުމާއެކު ޙައްލެއް ގެނެވޭގޮތައް ކަމަށްވާތީ، އެއީ މަޖިލީހުން ޢަމަލު ކުރަން އެހާ ރަނގަޅު ގޮތެއް ނޫންކަމަށް ވިދާޅުވެފައެވެ. އެެހެންކަމުން ސަސްޕެންޑް ކުރެވިފައިވާ މުވައްޒަފުންނާމެދު އިޖުރާޢަތު ކުރިއަށް ގެންދަންޖެހޭނީ މިޤާނޫނު ތަޞްދީޤުވުމާއެކު ކަމަށް ވިދާޅުވެ ހިސާން ވަނީ އިޞްލާޙު ހުށަހަޅުއްވާފަ އެވެ.
ކޮމެޓީ ރިޕޯޓުގައިވާ ގޮތުން މިބިލަށް ޢަމަލު ކުރަން ފަށާ ތާރީޚުން ފެށިގެން 1 އަހަރު ދުވަހުގެ ތެރޭގައި ލޯކަލް ކައުންސިލްތަކުގެ އިންތިޚާބު 2020 އާއި އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ އިންތިޚާބު 2020 ބާއްވައި ނިންމަންޖެހެއެވެ.
