އެފްރިކަން ފްރީ ޓްރޭޑް އެގްރީމަންޓަށް އަމަލުކުރުން ފަސްކޮށްފި

ނޮވެލް ކޮރޯނާވައިރަސް(ކޮވިޑް-19)ގެސަބަބުން ދުނިޔެއަށް ކުރިމަތިވެފައިވާ ޙާލަތާއި ގުޅިގެން، އެފްރިކަން ފްރީ ޓްރޭޑް އެގްރީމަންޓަށް ޢަމަލުކުރަން ފަސްކޮށްފިއެވެ.

އެފްރިކާ ބައްރުގެ 55 ޤައުމަކުން ސޮއިކޮށްފައިވާ މި އެއްބަސްވުމަށް ޢަމަލުކުރަން ކަނޑައެޅީ އަންނަ ޖުލައި މަހުން ފެށިގެންނެވެ. މި އެއްބަސްވުމަށް ޢަމަލުކުރާނެ އައު ތާރީޚެއް ކަނޑައަޅާފައެވެ. އެއްބަސްވުމަށް ޢަމަލުކުރުން ފަސްކުރަން ނިންމާފައިވާކަން އިޢުލާނުކުރެއްވީ އެފްރިކަން ކޮންޓިނެންޓަލް ފްރީ ޓްރޭޑް އޭރިއާގެ ސެކެޓްރީ ޖެނެރަލް، ވަމްކޭލޭ މެނޭއެވެ.

ވީޑިއޯ ކޮންފަރެންސް މެދުވެރިކޮށް ވާހަކަދައްކަވަމުން މެނޭ ވިދާޅުވީ، އެއްބަސްވުމަށް ޢަމަލުކުރާނެ ކަމާއިމެދު ޝައްކުނުކުރައްވާ ކަމަށެވެ. އަދި އެފްރިކާ ޤައުމުތަކުގެ އިޤުތިޞާދު ގުޅުވާލަން ބޭނުންވާ ސިޔާސީ ފިކުރު ދެމިއޮތް ކަމަށް ވިދާޅުވިއެވެ.

ކޮރޯނާވައިރަސް ވަބާއާ ގުޅިގެން އައިސްފައިވާ އިޤުތިޞާދީ ހީނަރުކަމުން އަރައިގަންނަން އެމެރިކާ އާއި ޔޫރަޕުގެ ޤައުމުތަކުން އެކުލަވާލާފައިވާ ސްޓިމިއުލަސް ޕެކޭޖްތަކެއް އެކުލަވާލުމުގެ އިޤުތިޞާދީ ހައިބަތު އެފްރިކާގެ ގިނަ ދައުލަތްތަކަށް ނެތްކަން މެނޭ ފާހަގަކުރެއްވިއެވެ. އަދި މި ފްރީ ޓްރޭޑް އެގްރީމަންޓް ވެގެންދާނީ، އެފްރިކާ ޤައުމުތަކުގެ ސްޓިމިއުލަސް ޕެކޭޖަށްކަމަށް ވިދާޅުވިއެވެ.

އެފްރިކަން ފްރީ ޓްރޭޑް އެގްރީމަންޓްގައި އެއްބަސްވެފައިވާ ކަންކަމަށް ޢަމަލުކުރަން ފެށުމުން، 3.4 ޓްރިލިއަން ޑޮލަރުގެ އިޤުތިޞާދީ ގުޅުމެއް އުފެދިގެން އަންނާނެއެވެ. އަދި މި އެއްބަސްވުން ވެގެންދާނީ 1994 ވަނަ ވުޖޫދަށް އައި ވަރލްޑް ޓްރޭޑް އޯގަނައިޒޭޝަނަށް ފަހު އުފެދިގެން އަންނަ އެންމެ ބޮޑު ވިޔަފާރީގެ އެއްބަސްވުމަށެވެ.