ކޮވިޑް-19 މާލޭގައި ފުތުރޭތީ އެކަން ހުއްޓުވުމަށް މާލެ ސިޓީ މިމަހުގެ 30 ގެ ނިޔަލަށް ލޮކްޑައުން ކޮށްފައި އޮތްއޮތުން އިތުރު ކުރުމާމެދު އަދި ގޮތެއް ނުނިންމާކަމަށް ކޮވިޑް-19 ގެ ޓާސްކް ފޯހުގެ ތަރުޖަމާން މަބްރޫކް އަޒީޒު ވިދާޅުވެއްޖެ އެވެ.

ކޮވިޑް-19 ގެ ޓާސްކް ފޯހުގެ ފަރާތުން އެންމެ ފަހުގެ މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މަބްރޫކް ވިދާޅުވީ ކޮންމެ ރެޔަކު ޑޮކްޓަރުންގެ ޓީމާއި އަދި އެކިއެކި މަސައްކަތްތަކުގައި އުޅޭ ޓީމުތައް އެއީ ސޯޝަލް ކައުންސިލާއި ލޮކްޑައުންގެ ކަންކަން މާލެ ސިޓީގައި ބަލަހައްޓަމުން ގެންދާ ކޮމިޓީގެ މީހުންނާއި އަދި އެންއީއޯސީގެ ތެރޭގައި މަސައްކަތްކުރާ ހުރިހާ ޓީމުތަކެއް ކޮންމެ ދުވަހަކުވެސް ކަންކަމާމެދު މަޝްވަރާކުރަމުންދާ ކަމަށެވެ. އަދި ކުރިޔަށް އޮތް ދެ ރޭ މިކަމާއި ގުޅޭގޮތުން ކުރެވޭ މަޝްވަރާތައް އިތުރުވެގެންދާނެ ކަމަށް މަބްރޫކް ވިދާޅުވި އެވެ.

މިކަމުގައި ޑޮކްޓަރުންގެ ލަފާ ޑޮކްޓަރުން ދެއްވާނެކަމަށާއި އެލަފާއާއެކު ގޮތެއް ނިންމާނެކަމަށް މަބްރޫކް ވިދާޅުވި އެވެ.

ލޮކްޑައުން އުވާލުމާއި ގުޅޭގޮތުން ވާހަކަދައްކަވަމުން އެޗްޕީއޭގެ ޑޮކްޓަރ، ޑޮކްޓަރ އިބްރާހީމް އަފްޒަލް މީގެކުރިން ވިދާޅުވެފައިވަނީ ލޮކްޑައުންގެ ހާލަތު އުވައިލެވޭނީ މިހާރު ފެންނަ ކޭސްތައް ކޮންމެވެސް ވަރަކަށް ހައްލުވެގެން ކަމަށާއި ބަލި ރަށްރަށަށް ފެތުރުމުގެ ފުރުސަތު ވެސް އެބައޮތް ކަމަށެވެ. އަފްޒަލް ވިދާޅުވީ މާލެ ލޮކްޑައުން ކުރުމުން ފެންނަމުން ދަނީ ބެކްލޮގެއް ކަމަށެވެ. މިހާތަނަށް ގިނަ ކޭސްތައް ފެނުނީ މިހާރު ވެސް ހެލިފެލިވެ އުޅޭ މީހުންގެ ތެރެއިން ކަމަށް ވާތީ ބަލި އިތުރަށް ފެތުރުމުގެ ފުރުސަތު އެބައޮތް ކަމަށް އަފްޒަލް ވަނީ ވިދާޅުވެފަ އެވެ.

އަދި ރަށްރަށުން ކޭސްތައް ފެންނަމުންދާތީ ލޮކްޑައުން އުވައިލުމުގައި ރަށްރަށަށް ދިމާވެދާނެ ގޮތްތަކަކަށް ވެސް ވިސްނަން ޖެހޭ ކަމަށެވެ. މާލެގެ ލޮކްޑައުން އުވައިލަންޖެހޭ ހާލަތަކަށް އަދި ނުދާ ކަމަށް ހެލްތު މިނިސްޓަރ އަބްދުﷲ އަމީން ވެސް ވަނީ ވިދާޅުވެފަ އެވެ.

ރާއްޖެއިން މިހާތަނަށް ކޮވިޑް-19 އަށް 250 މީހަކު ވަނީ ޕޮޒިޓިވްވެފައެވެ.