ޕޯޓަލް މެދުވެރިކޮށް ފާސް ނުނެގޭ މީހުންނަށް އެހީތެރިކަން ފޯރުކޮށްދެއްވާ: ފުލުހުން
28 އެޕްރީލު 2020 | އަންގާރަ 07:38މިދަނޑިވަޅުގައި އެކަކު އަނެކަކަށް އެހީވާންޖެހޭ
އެސިސްޓަންޓް ކޮމިޝަނަރު އޮފް ޕޮލިސް އިސްމާއިލް ނަވީން
ޒަރޫރީ ބޭނުންތަކަށް ބޭރަށް ދިއުމަށް ފުލުހުން ދޫކުރަމުންދާ ފާސް ''ޕޯޓަލް'' މެދުވެރިކޮށް ނަގަން ނޭނގޭ މީހުން އެބަތިބި ކަމަށާއި، އެމީހުންނަށް އެހީތެރިކަން ފޯރުކޮށްދިނުމަށް ފުލުހުން އެދިއްޖެ އެވެ.
ކޮވިޑް-19 ގެ އެންމެފަހުގެ މައުލޫމާތު ހިއްސާ ކުރުމަށް ހޯމަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި އެސިސްޓަންޓް ކޮމިޝަނަރު އޮފް ޕޮލިސް އިސްމާއިލް ނަވީން ވިދާޅުވީ ޕޯޓަލް މެދުވެރިކޮށް ގިނަ ބަޔަކު ފާހަށް އެދެމުންދާކަމަށެވެ.
ފާހަށް އެއް ބަޔަކު އެދެމުންދާއިރު، ސްމާޓް ފޯނެއް ނެތިގެން ފާހަށް އެދޭނެ ގޮތެއް ނެތް ފަރާތްތަކާއި، ޕޯޓަލް ބޭނުންކުރާ ގޮތް ނޭނގޭ މީހުން އެބަތިބި ކަން ފާހަގަކުރައްވާ ނަވީން ވިދާޅުވީ މިފަދަ ފަރާތްތަކަށް އެހީތެރިވާން ޖެހޭ ކަމަށެވެ.
އެގޮތުން ޕޯޓަލް މެދުވެރިކޮށް ފާސް ނަގާނެ ގޮތް ކިޔާދިނުމާއި، ހޭލުންތެރިކުރުމުގެ މަސައްކަތްތައް ކޮށްދިނުމަށް ނަވީން އެދިފައި ވެއެވެ. އަދި ވިދާޅުވީ މިފަދަ މައްސަލަތައް ރިޕޯޓު ކުރާނަމަ އެމީހަކަށް ފުލުހުން އެހީތެރިވެދޭނެ ކަމަށެވެ.
މާލެސިޓީ 26 ޒޯނަކަށް ބަހާލެވިފައިވާކަން ފާހަގަކުރައްވައި ނަވީން ވިދާޅުވީ ކޮންމެ ޒޯނެއްގައި ވެސް އެންމެ ގިނަ ވެގެން އުޅެވޭނީ 65 މީހުންނަށް ކަމަށެވެ. އަދި ހާލަތް ރިޔާއަތް ކުރާ ގޮތުން ބައެއް ޒޯނުުތަކަށް ފާސް ދޫކުރުން މަދު ވެސް ވެދާނެކަން ނަވީން ފާހަގަކުރެއްވި އެވެ.
މީގެ އިތުރުން ނަވީން ވިދާޅުވީ ރައްޔިތުންނަށް ލުއި ފަސޭހަ ކޮށްދިނުމަށް ގިނަ މަސައްކަތްތައް ކުރާ ކަމަށެވެ. އެގޮތުން އެމީހަކު ބޭނުންވާ މުދާ ގަތުމަށް ބޭރަށް ދެވޭނެ ފަސޭހަ ވަގުތަކަށް އިސްކަންދޭ ކަމަށް ނަވީން ވިދާޅުވި އެވެ.
ނަވީން ވިދާޅުވީ ހޯމަ ދުވަހު އެކަނި ވެސް 741 މީހަކަށް ފާސް ދޫކުރެވިފައިވާ ކަމަށެވެ. ޕޯޓަލް މެދުވެރި ވެގެން ފާސް ދުކުރަން ފެެށީއްސުރެ ހޯމަ ދުވަހުގެ ނިޔަލަށް ޖުމްލަ 23188 ފާސް ދޫކުރެވިފައިވާ ކަމަށް ނަވީން ވިދާޅުވި އެވެ.
