ފެބްރުއަރީ މަހު ދުބާއީގައި އޮތް ގަލްފް ފުޑް އެކްސްޕޯއަށް ދިޔަ މީހުން އެޗްޕީއޭއާ މައުލޫމާތު ހިއްސާކުރުމަށް އަންގައިފި އެވެ.
މިކަމާއި ގުޅޭގޮތުން އެންއީއޯސީގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން އެޗްޕީއޭގެ އެޕިޑަމޮލޮޖިސްޓް ޑރ. އަފްޒަލް ވިދާޅުވީ މިއީ ދިރާސާގެ ބޭނުމަށް ކުރެވިގެންދާ މަސައްކަތެއް ކަމަށެވެ. ގަލްފް ފުޑް އެކްސްޕޯ ބާއްވާފައިވަނީ ފެބްރުއަރީ މަހުގެ 16 އިން 20 އަށެވެ.
މާލެ ތެރޭގައި ވައިރަސް ފެތުރެން މެދުވެރިވީ ސީދާ މި އެކްސްޕޯ އަށް ދިޔަ ފަރާތަކުގެ ފުށުން ކަމަށް ޑރ. އަފްޒަލް ވިދާޅުވިއެވެ. ފުޑް އެކްސްޕޯ އަށް ދިޔަ ބައެއް ފަރާތްތަކުގެ ފުށުން މި ވައިރަސްގެ ބައެއް އަލާމާތްތައް ފެނިފައިވާ ކަމަށް މައުލޫމާތު ލިބިފައިވާ ކަމަށް ވިދާޅުވި އެވެ.
މިހާރު ފެނިފައިވާ ބައެއް ކޭސްތަކާއި ގުޅިގެން ލިބިފައިވާ މައުލޫމާތުތަކުގެ ތެރޭގައި، މި އެކްސްޕޯއާ ގުޅިފައިވާ ބައެއް މީހުންނާ ގުޅުންތަކެއް ވާކަން ފާހަގަކުރެވިފައިވާ ކަމަށް ޑރ. އަފްޒަލް ވިދާޅުވި އެވެ. މިއީ އިންޑެކްސް ކޭސްއާ ގުޅުންހުރި ކަމެއްތޯ ނޫސްވެރިއަކު ސުވާލުކުރުމުން، ސީދާ ނޫނެކޭ ވިދާޅެއް ނުވެއެވެ.
