ކުޅުންތެރިން ފިޓްނަސް ރަނގަޅަށް ބެލެހެއްޓުމަށް ބައްސާމް އިލްތިމާސް ކޮށްފި

ކޮރޯނާވައިރަސް (ކޮވިޑް-19)އާ ގުޅިގެން ރާއްޖޭގެ ފުޓުބޯޅަ ހުއްޓުމަކަށް އައިސްފައިވީ ނަމަވެސް، ކުޅުންތެރިންގެ ފިޓްނަސް ރަނގަޅަށް ބެލެހެއްޓުމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލް އިލްތިމާސް ކުރައްވައިފިއެވެ.

އާދީއްތަ ދުވަހުގެރޭ ބައްސާމް ހިއްސާކުރެއްވި މެސެއްޖެއްގައި ވިދާޅުވެފައިވަނީ މިދަނޑިވަޅުގައި އެންމެން ވެސް ޕޮޒިޓިވްކޮށް ތިބެ، އެންމެން އެއްކޮށް މަސައްކަތް ކުރަން ޖެހޭ ކަމަށެވެ. އަދި ކޮވިޑް-19 އާ ދެކޮޅަށް ކުރާ މަސައްކަތުގައި ކޮންމެ މީހަކަށްވެސް ތަފާތު ދެއްކިދާނެ ކަމަށް ބައްސާމް ވަނީ ވިދާޅުވެފައެވެ.

ބައްސާމް އިތުރަށް ވިދާޅުވީ މިހާލަތު ރަނގަޅުވެ އަލުން ފުޓްބޯޅަ ފަށާއިރު، ކުޅުންތެރިން އެކަމަށް ތައްޔާރަށް ތިބެން ޖެހޭނެ ކަމަށެވެ. އެހެންކަމުން ފިޓްނަސް ރަނގަޅަށް ބެލެހެއްޓުމަށް ކުޅުންތެރިންގެ ކިބައިން ވަނީ އެދިވަޑައިގެންފައެވެ.

ކުޅުންތެރިންގެ ފިޓްނަސް ރަނގަޅަށް ބެލެހެއްޓުމަށް ބައްސާމް އިލްތިމާސް ކުރެއްވިއިރު، ކޮވިޑް-19 ގެ ސަބަބުން 2019/2020 ވަނަ އަހަރުގެ ފުޓްބޯޅަ ސީޒަންގެ ބާކީބައި ކެންސަލް ކުރަން އެފްއޭއެމް އިން މީގެ ކުރިން ވަނީ ނިންމާފައެވެ. އެގޮތުން ކެންސަލް ކޮށްފައިވަނީ އެފްއޭ ކަޕާއި ޕްރެޒިޑެންޓްސް ކަޕެވެ. އެފްއޭ ކަޕް ކެންސަލް ކުރިއިރު، މީގެ ކުރިން ވަނީ މި މުބާރާތުގެ ކުއާޓާ ފައިނަލް މެޗުތައް ކުޅެފައެވެ.

އެފްއޭ ކަޕާއި ޕްރެޒިޑެންޓްސް ކަޕް ކެންސަލް ކުރި ނަމަވެސް، މި ސީޒަނުގެ ތިންވަނަ ޑިވިޝަން ފުޓްބޯޅަ މުބާރާތާއި މިއަހަރުގެ ޖަޒީރާ ޗެމްޕިއަންޝިޕް އޮންނާނެ ކަމަށް އެފްއޭއެމުން ވަނީ މައުލޫމާތު ދީފައެވެ. އަދި މި ދެ މުބާރާތް ބާއްވާނެ ތާރީޚެއް ފަހުން އިއުލާނުކުރާނެ ކަމަށްވެސް އެފްއޭއެމުން ވަނީ ބުނެފައެވެ.