އަމާނާ ތަކާފުލްގެ 9 ވަނަ އަހަރީ ޢާންމު ޖަލްސާ ވަރޗުއަލްކޮށް ބާއްވައިފިއެވެ.

އަމާނާ ތަކާފުލުން ބުނީ އަދުގެ ޙާލަތަށް ބަލައި މަދަނީ ގައިދުރުކަމަށް އިސްކަންދީ ޞިއްޙީ ކުއްލި ޙާލަތުގެ އަސާސްތަކާ އެއްގޮތަށް ޖަލްސާ ވަރޗުއަލްކޮށް ބޭއްވުމަށް ނިންމީ ދުނިޔޭގައި މިއޮތް ޞިއްޙީ ކުއްލި ނުރައްކަލުގެ ޙާލަތު އަވަސް މުއްދަތެއްގައި ނިމުމަކަށް އަންނާނެ ކަމަށް ނުފެންނާތީ ކަމަށެވެ.

މި ޖަލްސާ ބާއްވާފައިވަނީ 23 އެޕްރިލް 2020 ވީ ބުރާސްފަތި ދުވަހުގައެވެ. އަދި ޖަލްސާގެ ތެރެއިން ޑިރެކްޓަރުންގެ ބޯޑުން ވަނީ ފާއިތުވި 2019 ވަނަ އަހަރުގެ ފައިދާ ހިއްސާދާރުންނަށް ބަހަން ނިންމާފައެވެ. އެގޮތުން 2019 ވަނަ އަހަރު ކުންފުންޏަށް ފައިދާ (ޕީ.ބީ.ޓީ – ފައިދާ ޓެކްސް ކެނޑުމުގެ ކުރިން) ގެ ގޮތުގައި 14.9 މިލިއަން ދިވެހި ރުފިޔާ ލިބިފައިވެއެވެ. ކުންފުނީގެ ޖުމްލަ ޢާމްދަނީގެ (ގްރޮސް ރިޓްން ޕްރީމިޔަމް) ގޮތުގައި ފާއިތުވި 2019 ވަނަ އަހަރު 138 މިލިއަން ދިވެހި ރުފިޔާ ލިބިފައިވެއެވެ.

ކުންފުނިން 2019 ވަނަ އަހަރު ބަދަލުގެ ގޮތުގައި މުޅި ޖުމުލަ 66.2 މިލިއަން ދިވެހި ރުފިޔާ ކަސްޓަމަރުންނަށް ދީފައިވެއެވެ. މިއީ ފާއިތުވި 2018 ވަނައަހަރާއި އަޅާ ބަލާއިރު 39 އިންސައްތައިގެ އިތުރު ޢަދަދެކެވެ. ބަދަލު ދިނުމުގެ ކަންކަން ފުރިހަމަ ވެފައިވަނީ ކުންފުނީގެ ރީތަކަފުލް ބައިވެރިންނަކީ ބައިނަލްއަޤުވާމީ ރޭޓިންގ އެޖެންސީ ތަކުން ރޭޓްކުރެވިފައިވާ މަތީ ދަރަޖައިގެ ކުންފުނިތައް ކަމަށްވުމާއެކު އެ ފަރާތްތަކުގެ ފުރިހަމަ އެއްބާރުލުން ލިބިފައިވާތީ ކަމަށް އެކުންފުނިން ބުނެއެވެ.

2019 ވަނަ އަހަރުގެ އިންޓެރިމް ފައިދާ ވަނީ 2019 ވަނަ އަހަރުގެ އޮގަސްޓް މަހު ބަހާފައެވެ. އަދި މިދިޔަ އަހަރީ ޢާންމު ޖަލްސާގައި ނިންމާފައި ވަނީ 2019 ވަނަ އަހަރުގެ ފައިނަލް ޑިވިޑަންޑް ހިއްސާދާރުންނަށް ބެހުމަށެވެ. 2019 ވަނަ އަހަރުގެ ފައިދާ ބެހުމަށް ނިންމުމާއެކު، މިއީ ޖެހިޖެހިގެން ކުންފުނީގެ ހިއްސާދާރުންނަށް ފައިދާ ބަހަމުންދާތާ 8 ވަނަ އަހަރެވެ.

ހިއްސާ ބެހުމަށް ކަޑައެޅިފައިވާ އުޞޫލުގެ ތެރެއިން ބުކް ކްލޯޝަރ ތާރީޚު ކަމުގައިވާ 16 އެޕްރިލް 2020 ގެ ނިޔަލަށް ކުންފުނީގެ ހިއްސާދާރުންގެ ދަފްތަރުގައިވާ ހުރިހާ ހިއްސާދާރުންނަށް ފައިދާ ލިބޭނެކަމަށާއި އަމާނާ ތަކާފުލްގެ ކަންކަން ތަރުތީބު ކުރެވިފައިވަނީ ތަކާފުލްގެ މަހްފޫމުގައިވާ ފަދައިން ބައިވެރިންގެ މެދުގައި ހަމަހަމަކަން ދެމެހެއްޓުމާއި، ހުރިހާ ސްޓޭކް ހޯލްޑަރުންގެ މަޞްލަޙަތު ޙިމާޔަތްކުރުމާއި ދެފުށް ފެންނަ ގޮތަށް މުޢާމަލާތް ހިންގުމަށް ކަމަށް އެކުންފުނިން ބުންޏެވެ.

ކުންފުނީގެ އަހަރީ ޢާންމު ޖަލްސާގައި ހިއްސާދާރުން ވަނީ ޑރ. ޢަބުދުﷲ ޝިހާމް ޙަސަން މިނިވަން ޑިރެކްޓަރެއްގެގޮތުގައި އިތުރު އަހަރަކަށް ޑިރެކްޓަރުންގެ ބޯޑަށް ހޮވާފައެވެ. އެހެން އަހަރުތަކެކޭ އެއްފަދައިން މިއަހަރު ވެސް ހިއްސާދާރުންނަށް ކުންފުނީގެ ފަރާތުން ހިލޭ ޕަރސަނަލް އެކްސިޑެންޓް ކަވަރ ދިނުމަށް އަހަރީ ޢާންމު ޖަލްސާގައި ވަނީ ނިންމާފައެވެ.

އަމާނާ ތަކާފުލް މޯލްޑިވްސްގެ ބޯޑުގައި މިހާރު ތިއްބެވި ޑިރެކްޓަރުންނަކީ ޠައްޔިބު އަކްބަރ ޢަލީ (ޗެއަރމަން)، ހަރީޒް ސުލައިމާން (މެނޭޖިންގ ޑިރެކްޓަރ)، ޑިރެކްޓަރުން – އޮސްމާން ކާސިމް، ދާތޯ މުހައްމަދު ފަޒްލީ ޔޫސުފް، އެމް.އެޗް.އެމް ރަފީޤް، ޑރ. ޢަބުދުﷲ ޝިހާމް ހަސަން، ޢަބުދުﷲ ކާސިމެވެ.