އާރކް އާއި ފެމިލީ ލީގަލް ކްލިނިކް ގުޅިގެން ކާބޯތަކެތީގެ އެހީތެރިކަން ފޯރުކޮށްދެނީ
25 އެޕްރީލު 2020 | ހޮނިހިރު 13:33ކާބޯތަކެތީ ފޯރުކޮށްދެނީ ސަރުކާރުން ރިފަރކުރާ ކުޑަކުދިން ތިބޭ އާއިލާތަކަށް
މިހާތަނަށް ކެއާރސްގެ ކާބޯތަކެތީގެ އެހީ 37 ފަރާތަކަށް ފޯރުކޮށްދީފައިވޭ
ކޮވިޑް-19 ގެ ސިއްހީ ކާރިސާގެ ސަބަބުން ކުޑަކުދިން ތިބޭ އާއިލާތަކަށް ކުރިމަތިވަމުންދާ އިޖުތިމާއީ އަދި އިގްތިސާދީ ދަތިތަކަށް ލުއިތަކެއް ހޯދައިދިނުމުގެ ގޮތުން، ކާބޯތަކެތީގެ އެހީ ފޯރުކޮށްދިނުމަށް އެޑްވޮކޭޓިންގ ދަ ރައިޓްސް އޮފް ޗިލްޑްރަން (އާރކް) އާ ފެމިލީ ލީގަލް ކްލިނިކް އިން ޗައިލްޑް އެއިޑް ރިލީފް އިން އިމަރޖެންސީ ސިޓުއޭޝަންސް (ކެއަރސް) އުފައްދައިފިއެވެ.
ކެއަރސްގެ ކާބޯތަކެތީގެ އެހީ ފޯރުކޮށްދެނީ ކާބޯތަކެތި ބޭނުންވާ ކަމަށް ސަރުކާރުން މި ދެ ޖަމްއިއްޔާއަށް ރިފަރކުރާ ކުޑަކުދިން ތިބޭ އާއިލާތަކަށެވެ.
ކެއަރސްއިން ފޯރުކޮށްދޭ ކާބޯތަކެތީގެ އެހީގައި ދެ ބާވަތެއްގެ އެހީ ހިމެނެއެވެ. އެއީ، ކޮންމެ މީހަކަށް ކޮންމެ ދުވަހަކު ދެ ފަހަރު ފޯރުކޮށްދެވޭ ނާސްތާ އާއި ކޮންމެ އާއިލާއަކަށް ފޯރުކޮށްދެވޭ އަސާސީ ކާބޯތަކެއްޗެވެ. އެގޮތުން ކެއަރސްއިން ފޯރުކޮށްދޭ އަސާސީ ކާބޯތަކެތީގެ ތެރޭގައި ހިމެނެނީ، ހަނޑޫ، ފުށް، މުގު، ކިރު، މަސް ދަޅު، ބިސް އަދި ބައެއް ބާވަތްތަކުގެ ތަރުކާރީ ދަޅެވެ.
މީގެ އިތުރުން ކާބޯތަކެތި ލިބުމަށް ދަތިވެފައިވާ ކުޑަކުދިން ތިބޭ އާއިލާތަކަށް ކާބޯތަކެތި ފޯރުކޮށްދިނުމަށް ޖެންޑަރ މިނިސްޓްރީގެ އެދުމުގެ މަތިން ކުރަމުންދާ ކަމަށް އާރކްއިން ބުނެއެވެ.
މިފަދަ ދަތި ވަގުތެއްގައި ވެސް ބަނޑުހައިހޫނުކަން ނައްތާލެވޭކަން ކަށަވަރުކުރުމަކީ ކެއަރސްގެ މައިގަނޑު އެއް އަމާޒެވެ.
މި އަމާޒަށް ވާސިލްވުމަށް މި ދެ ޖަމްއިއްޔާއާއެކު ޕާޓްނަރވެފައިވަނީ، ބޭންކް އޮފް މޯލްޑިވްސް، ބީ.އެޗްއެމް ޓްރޭޑަރސް، ދިރާގު، އެންސިސް ފިޝަރީޒް ޕްރައިވެޓް ލިމިޓެޑް، މިހާރު، ދި އެޑިޝަން، އުރީދޫ މޯލްޑިވްސް އަދި ޔުނިސެފްއެވެ.
ކެއަރސްގެ މިނިވަން އޮޑިޓް ޕާޓްނަރަކީ، ޕްރޫޑަންޓް ޗާރޓަޑް އެލް.އެލް.ޕީ.އެވެ.
މިހާތަނަށް ކެއާރސްގެ ކާބޯތަކެތީގެ އެހީ 37 ފަރާތަކަށް ލިބިފައިވެއެވެ. މި ފަރާތްތަކަކީ ކޮވިޑް-19 އާ ގުޅިގެން އިންތިހާއަށް އިގްތިސާދީ ދަތިކަން ކުރިމަތިވެފައިވާ ފަރާތްތަކެއް ކަމަށްވާއިރު، މީގެ ތެރެއިން ބައެއް ފަރާތްތައް އެއް ދުވަހަށްވުރެ ދިގު މުއްދަތަކަށް ކާބޯއެއްޗެއް ނުލިބި ވޭތުކުރަން ޖެހުނުކަން އާރކްއިން ފާހަގަކޮށްފައިވެއެވެ.
