ކޭޝްފްލޯ އަށް ފައިސާ އިތުރުކުރަން ދެކޮޅު ހަދަނީ ޕީޕީއެމް/ޕީއެންސީގެ މެމްބަރުން އެކަނި!
25 އެޕްރީލު 2020 | ހޮނިހިރު 17:00އިދިކޮޅު މެމްބަރުން ވިދާޅުވަނީ ކޭޝްފްލޯއަށް 4.2 ބިލިއަށް ރުފިޔާ އިތުރުކޮށްދިނުމަކީ ގޯހެއް ކަމަށް، އިގްތިޞާދު އިތުރަށް ގޯސްވާނެ ކަމަށް
މަޖިލީހުގެ ޖަލްސާއެއްގެ ތެރެއިން
ކޮވިޑް-19 އާ ގުޅިގެން އަންނަ އިޤްތިޞާދީ އަދި މާލީ ލޮޅުމާއެކު ދައުލަތުގެ ޚަރަދުތަކަށް ބޭނުންވާ ކޭޝްފްލޯ އިތުރުކުރުމަކީ ގޯހެއްކަމަށް އިދިކޮޅު ޕީޕީއެމް-ޕީއެންސީގެ މެމްބަރުން ވިދާޅުވެއްޖެ އެވެ.
ރައްޔިތުންގެ މަޖިލީހަށް ފިނޭންސް މިނިސްޓަރ އިބްރާހީމް އަމީރު ހުށަހަޅުއްވާފައިވަނީ ދައުލަތުގެ ކޭޝްފްލޯއަށް 4.2 ބިލިއަން ރުފިޔާ އިތުރުކޮށް، 1 އަހަރު ދުވަހުގެ މުއްދަތަށް ފައިނޭންސް ކޮސްޓެއް ނުހިމެނޭ ގޮތަށް އޯވަރޑްރޯ ކުރެވޭގޮތަށް ހަމަޖައްސާ ދެއްވުމަށެވެ.
މިމައްސަލައަށް ބަހުސް ކުރެއްވި، ނައިފަރު ދާއިރާގެ މެމްބަރު އަދި ޕީޕީއެމް ނައިބު ރައީސް އަހުމަދު ޝިޔާމް އަދި މާވަށު ދާއިރާގެ މެމްބަރު އަދި ރައީސް ޔާމީންގެ ވެރިކަމުގައި އިކޮނޮމިކް މިނިސްޓަރު މުހައްމަދު ސައީދު ވެސް ވަނީ މިހާރު ދިމާވެފައިވާ އިގްތިޞާދީ މިހާލަތުން އަރަގައިގަންނާނެ ގޮތުގެ ރަނގަޅު ވިސްނުމެއް މިސަރުކާރުގެ ވެރިންގެ ކިބައިގަ ނެތް ކަމަށް ވިދާޅުވެފަ އެވެ. އަދި ދައުލަތުގެ ޚަރަދު ބޮޑުވަމުންދާއިރު އިތުރަށް 4.2 ބިލިއަން ރުފިޔާ އިތުރުކޮށްދިނުމަކީ ގޯހެއްކަމަށްވެސް އިދިކޮޅު މެމްބަރުން ވިދާޅުވި އެވެ.
ނަމަވެސް ސަރުކާރު ހިންގާ މައިޕާޓީ އެމްޑީޕީއާއި ސަރުކާރު ކޯލިޝަން ޕާޓީތަކުގެ މެމްބަރުން ވިދާޅުވީ، މިހާލަތުގައި ސަރުކާރުން ކޮންމެހެން ކުރަންޖެހޭ ޚަރަދުތައް ކުރުމަށް މަޖިލީހުން ދޭންޖެހޭ އެއްބާރުލުން ދޭން ޖެހޭ ކަމަށެވެ. ނަމަވެސް ގިނަ މެމްބަރުން ވަނީ ދައުލަތުގެ ކޭޝްފްލޯ އިތުރުކުރުމަށް ދެވޭ 4.2 ބިލިއަން ރުފިޔާއަށް ވާނުވާ މަޖިލީހުން ބަލަންޖެހޭ ކަމަށް ވިދާޅުވެފަ އެވެ. އަދި އެފައިސާ ޚަރަދުކުރެވޭ ކަންކަން މަޖިލީހުން ގާއިމު ކުރާ މެކޭނިޒަމެއްގެ ދަށުން ބެލޭނެ އިންތިޒާމު ހަމަޖައްސުމަކީ ވަރަށް މުހިއްމު ކަމެއް ކަމަށް ގިނަ މެމްބަރުން ފާހަގަކުރެއްވި އެވެ.
ގައްދޫ ދާއިރާގެ މެމްބަރު އަހުމަދު ޒާހިރު ވިދާޅުވީ، މިވަރުކަމެއް ކުރަން ވަރަށް ކަންބޮޑުވާ ކަމަށާއި ވަކިން ހާއްސަކޮށް ކޮރަޕްޝަންގެ މައްސަލަތައް އިންތިހާއަށް ރާއްޖޭގައި ހިންގާފައިވާތީ ކަންބޮޑުވާ ކަމަށެވެ. އަހުމަދު ޒާހިރު ވިދާޅުވީ، މިކަންކުރަން ޖެހޭނީ ވަރުގަދަ މޮނިޓަރިންގ މެކޭނިޒަމަކާއެކު ކަމަށާއި އަދި މަޖިލީހުން މިކަންކަން ބެލެހެއްޓުމަށް ހާއްސަ ކޮމެޓީއެއް އެކުލަވާލަން ފެންނަކަމަށެވެ.
މިމައްސަލައަށް ބަހުސް ކުރުމާއި، ވީހާވެސް އަވަހަކަށް ގޮތެއް ނިންމުމަށް މަޖިލީހުގެ ޖަލްސާއެއް އާދިއްތަ ދުވަހުވެސް ބާއްވާ ގޮތަށް ވަނީ ހަމަޖައްސާފަ އެވެ.
