ކޮވިޑް-19އަށް ޕޮޒިޓިވް ވާ މީހުން ވަކި ތަނެއްގައި ނުވަތަ ރަށެއްގައި ބޭއްތިއްބުމަށް މަޝްވަރާ ކުރަނީ: ހެލްތް މިނިސްޓަރ
25 އެޕްރީލު 2020 | ހޮނިހިރު 10:59އިސްކަމެއް ދެނީ ޑައިރެކްޓް ކޮންޓެކްޓް ތެރެއިން އަލާމަތް ހުންނަ މީހުން ޓެސްޓު ކުރުމަށް ކަމަށް ވިދާޅުވި
ނޭޝަނަލް އިމަރޖެންސީ އޮޕަރޭޝަންސް ސެންޓަރުގައި ކުރިން ބޭއްވި ނޫސްވެރިންގެ ބައްދަލުވުމެއްގައި ހެލްތް މިނިސްޓަރު އަބްދުﷲ އަމީން ވާހަކަ ދައްކަވަނީ
ކޮވިޑަށް ޕޮޒިޓިވްވާ މީހުން ވަކި ތަނެއްގައި ނުވަތަ ރަށެއްގައި ބޭއްތިއްބުމަށް މަޝްވަރާ ކުރަމުންދާ ކަމަށް ހެލްތު މިނިސްޓަރ ޢަބްދުﷲަ އަމީން ވިދާޅުވެއްޖެއެވެ.
ނޭޝަނަލް އިމަރޖެންސީ އޮޕަރޭޝަންސް ސެންޓަރު (އެންއީއޯސީ) ގައި ހޮނިހިރު ދުވަހު ހަވީރު ކުރިއަށްދާ ނޫސްވެރިންގެ ބައްދަލުވުމުގައި ހެލްތް މިނިސްޓަރު އަބްދުﷲ އަމީން ވިދާޅުވީ މި ވައިރަސް އަށް ޕޮޒިޓިވް ވާ މީހުން ވަކި ތަނެއްގައި/ވަކި ރަށެއްގައި ބޭތިއްބުމުގެ މަޝްވަރާތައް ކުރަމުންދާ ކަމަށެވެ. އަދި ޑައިރެކްޓް ކޮންޓެކްޓްގެ ތެރެއިން އަލާމަތްތައް ހުންނަ މީހުން ގާތުން ބަލަން ޖެހޭ ކަމަށާއި އިސްކަންދޭ ތަރުތީބަށް ބަލާއިރު، މިހާރު ޤަބޫލު ކުރެވޭ ގޮތުގައި އެންމެ އިސްކަމެއް ދެނީ ޑައިރެކްޓް ކޮންޓެކްޓް ތެރެއިން އަލާމަތް ހުންނަ މީހުން ޓެސްޓު ކުރުމަށް ކަމަށް މިނިސްޓަރު ވިދާޅުވިއެވެ.
ކޮމިއުނިޓީ ސްޕްރެޑެއް ފެނުނު ފަހުން ބަލި ފެތުރެމުންދާކަން ލަފާކުރެވިފައިވާ ކަމަށާއި، މާލެއިން ގިނަ ކޭސްއެއް ފެނުނުއިރު،އަތޮޅު ތެރެއަށް ވެސް އޭގެ ކުރިން މީހަކު ދަތުރު ކޮށްފައިވާނެކަން ބަލާ މަސައްކަތް ކޮށްފައިވާނެ ކަމަށް އަމީން ވިދާޅުވިއެވެ.
ފަންނީ ބޭފުޅުންނާއި ޑޮކްޓަަރުން ގުޅިގެން ފަރުވާގެ ކަންކަމަށް ގެންނަންޖެހޭ ބަދަލުތައް ދެނެގަންނަމުންދާ ކަމަށާއި ބެލިބެލުމުން ކަރަންޓީނަށް ބަދަލުތަކެއް ގެންނަންޖެހޭ ކަމަށް ވެސް މިނިސްޓަރު ވިދާޅުވިއެވެ. އެގޮތުން ރައްޔިތުން ގޭގައި ކަރަންޓީން ކުރަން ޖެހިދާނެ ކަމަށް މިނިސްޓަރު ވިދާޅުވިއެވެ.
