ރާއްޖެއިން ކޮވިޑް-19 ނައްތާލުމަށް ކުރަމުންދާ މަސައްކަތްތަކާއި، ދިމާވާ ގޮންޖެހުންތައް ސާރކްގެ ގައުމުތަކާއި ހިއްސާކޮށްފިއެވެ.

ކޮވިޑް-19 ކޮންޓްރޯލް ކުރުމަށް ސާރކް ސަރަހައްދުގެ ގައުމުތަކުން ގުޅިގެން މަސައްކަތްކުރުމާ ގުޅޭގޮތުން މަޝްވަރާކުރުމަށް ސިއްހީ ދާއިރާގެ އިސް މަސްއޫލުވެރިންގެ ވީޑިއޯ ކޮންފަރެންސެއް ވަނީ ބާއްވާފައެވެ. ޕާކިސްތާނުގެ އިސްނެގުމާއެކު ބޭއްވި ވީޑިއޯ ކޮންފަރެންސްގައި ރާއްޖޭގެ ފަރާތުން ބައިވެރިވެ ވަޑައިގެންނެވީ ޑިރެކްޓަރ ޖެނަރަލް އޮފް ޕަބްލިކް ހެލްތު މައިމޫނާ އަބޫބަކުރެވެ.

މި ބައްދަލުވުމުގައި ސާކްގެ ގައުމުތަކުން ކޮވިޑް-19 އިން ރައްކާތެރިވުމަށް ކުރަމުންދާ މަސައްކަތްތަކާއި މިހާރުގެ ހާލަތު ހިއްސާކޮށްފައިވެއެވެ. އަދި ދިމާވާ ދަތިތަކާއި، ގޮންޖެހުންތައް ހިއްސާކޮށްފައިވެއެވެ. މީގެ އިތުރުން ފޯރުކޮށްދެވޭނެ އެހީތަކާއި، މިހާރަށް ވުރެ މަސައްކަތް އިތުރަށް ހަރުދަނާ ކުރުމަށް އެޅޭނެ ފިޔަވަޅުތަކާ ބެހޭ ގޮތުން ފުޅާ ދާއިރާއެއްގައި މަޝްވަރާ ކުރައްވާފައިވެއެވެ.

ސާރކުގެ މެންބަރު ގައުމުތަކުން ގުޅިގެން މަސަކަތް ކުރުމުގެ މުހިންމުކަން ފާހަގަކުރައްވައި ޑައިރެކްޓަރ ޖެނެރަލް އޮފް ޕަބްލިކް ހެލްތު ވަނީ ރާއްޖޭގެ ހާލަތާއި، ކޮވިޑް-19އާ ދެކޮޅަށް އަޅަމުންދާ ފިޔަވަޅުތައް ގައުމުތަކާއި ހިއްސާކުރައްވާފައެވެ. އަދި ރާއްޖެއަކީ އިމްޕޯޓް މުދަލަށް ބަރޯސާވާ ގައުމަކަށްވުމުން މިދަނޑިވަޅުގައި ރާއްޖެއަށް މުދާ ލިބުމުގައި ދަތިތަކެއް ހުރިކަން އެކަމަނާ ފާހަގަކުރެއްވިއެވެ. ވަކިން ޚާއްޞަކޮށް ބޭހާއި ސިއްހީ އާލާތްތައް ލިބުމުގެ ދަތިކަން ވަރަށް ބޮޑަށް ކުރިމަތިވެފައިވާކަން ފާހަގަކުރެއްވިއެވެ.

މައިމޫނާ ވިދާޅުވީ މިފަދަ މައްސަލަތައް ހައްލު ކުރުމަށް މެންބަރު ގައުމުތަކުން އެކުގައި މަސައްކަތްކޮށްފިނަމަ ހައްލުކުރެވިގެންދާނެކަމަށެވެ.

ކޮވިޑް-19ގެ ދަތި އުދަނގޫ ހާލަތުން އަރައިގަތުމަށް ކުރަމުންދާ މަސައްކަތްތައް ހަރުދަނާ ކުރުމަށާއި، ސާރކް ގައުމުތަކުން އެއްގައުމުން އަނެއް ގައުމަކަށް އެހީވުމަށް ކުރެވޭނެ މަސައްކަތްތަކާ ބެހޭ ގޮތުން މަޝްވަރާ ކުރުމަށް މިފަދަ އިތުރު ވީޑިއޯ ކޮންފަރެންސްތައް ބޭއްވުމަށް ގައުމުތަކުން ވަނީ އެއްބަސްވެފައެވެ.