އުމުރުން 8 އަހަރުގެ ކޮރޯނާ ޑި ވްރީސް ކިޔާ ކުއްޖަކަށް ބުލީ ކުރަމުންދާކަމަށް ބުނެ އެމެރިކާގެ ފިލްމީތަރި، ޓޮމް ހޭންކްސްއަށް ސިޓީއެއް ފޮނުވައިފިއެވެ.
މި ކުއްޖާއަކީ އޮސްޓްރޭލިއާގެ ކުއްޖަކަށްވާއިރު، ޓޮމް އާއި އޭނާގެ އަންހެނުން ރީޓާ ވިލްސަން ވަނީ އެ ގައުމުގައި އުޅެމުން ދަނިކޮށް ކޮވިޑް-19 އަށް ޕޮޒިޓިވްވެ އޮސްޓްރޭލިއާގައި ދެ ހަފްތާއަށް ވުރެ ގިނަ ދުވަސް ކަރަންޓީނުގައި ހޭދަކޮށްފައެވެ.
"ހަބަރުގައި ދެކުނިން ޓޮމް އާއި އަންހެނުންނަށް ކޮރޯނާވައިރަސް ޖެހުނު ވާހަކަ. މިހާރު އޯކޭ ތަ؟"ކޮރޯނާ ޑި ވްރީސްގެ ސިޓީގެ ބައެއް
މީގެ އިތުރުން، އަމިއްލަ ނަން ދެކެ ވަރަށް ލޯބިވާކަމަށާއި ނަމަވެސް މިހާރު ސްކޫލްގައި އުޅޭ ކުދިން ނަމާ ހެދީ އޭނާއަށް ބުލީ ކުރަމުންދާކަމަށް ކޮރޯނާ ބުނެފައިވެއެވެ. އަދި މިކަމުގެ ސަބަބުން "ވަރަށް ދެރަވެ ރުޅި އާދޭ"ކަމަށް އެ ކުއްޖާ ބުންޏެވެ.
ކޮރޯނާގެ ސިޓީ ލިބުމުން އޭނާ އާއި އަންހެނުން ވަރަށް އުފާވިކަން ފާހަގަ ކުރަމުން ޓޮމް ބުނީ، ކޮރޯނާ ކިޔާ ކުއްޖަކާ ކުރިން ދިމާވެފައި ނުވާ ކަމަށާއި އޭގެ މާނައަކީ "އިރުގެ ވަށައިގެންވާ ކްރައުން" ކަމަށެވެ.
މީގެ އިތުރުން، ޓޮމް ވަނީ މި ކުއްޖާއަށް އޭނާގެ ޓައިޕްރައިޓަރ ފޮނުވާފައެވެ. ޓޮމް ވަނީ މީގެ ކުރިން މި ޓައިޕްރައިޓަރގެ ފޮޓޯއެއް ސޯޝަލް މީޑިއާގައި ޕޯސްޓްކޮށްފައެވެ. ކެޕްޝަން ގައި ޖަހާފައިވަނީ އެމެރިކާއިން އޮސްޓްރޭލިއާއަށް ގެންދިއަ ޓައިޕްރައިޓަރެއްކަމަށެވެ. އެއީ އެލްސީ ސްމިތު އެންޑް ކޮރޯނާ ޓައިޕްރައިޓަރސް އިންކްގެ "ކޮރޯނާ ސްޓެންޑަޑް" ޓައިޕްރައިޓަރެކެވެ.
އަދި ޓައިޕްރައިޓަރ ބޭނުން ކުރުމަށް ދަސް ކުރުމަށް ފަހު އޭނާއަށް ސިޓީ ލިޔުމަށް ވެސް ޓޮމް ކޮރޯނާ ގާތު އެދުނުވެ.
