ވިޔަފާރިކުރަން އަންނަ ފަރާތްތަކުގެ މެދުގައި ތަފާތުކުރުން ގެންގުޅޭނަމަ ފިޔަވަޅު އަޅަނީ
24 އެޕްރީލު 2020 | ހުކުރު 05:26ކަސްޓަމަރުންގެ މެދުގައި ތަފާތުކުރުން ގެންގުޅޭ ކަމުގެ ޝަކުވާތައް ވަނީ އިތުރުވެފައި
ބާޒާރު މަތީގައި އޮތް ޕިކަޕަކަށް މުދާ އަރުވަނީ
އެއްވެސް ވިޔަފާރިއަކުން މުދާ ގަންނަން ނުވަތަ ހިދުމަތެއް ލިބިގަންނަން އަންނަ ފަރާތްތަކުގެ މެދުގައި ތަފާތުކުރުން ގެންގުޅޭނަމަ ކޮންސިއުމަރ ޕްރޮޓެކްޝަން ގާނޫނުގެ ދަށުން ފިޔަވަޅު އަޅާނެ ކަމަށް އިކޮނޮމިކް މިނިސްޓްރީން ހާމަކޮށްފި އެވެ.
އެންއީއޯސީގައި ބޭއްވި ނޫސްވެރިންގެ ބައްދަލުވުމުގައި މިކަމާ ގުޅޭގޮތުން ވިޔަފާރިވެރިންނަށް އިލްތިމާސް ކުރައްވަމުން ރަޖިސްޓްރަރ އޮފް ކޮމްޕެނީޒް މަރިޔަމް ވިސާމް ވިދާޅުވި އެ ވުޒާރާއަށް މިދިޔަ ދުވަސްތަކުގެ ތެރޭގައި ލިބިފައިވާ ޝަކުވާތަކަށް ބަލާއިރު، މުދާ ގަންނަން ނުވަތަ ހިދުމަތެއް ލިބިގަންނަން އަންނަ ފަރާތްތަކުގެ މެދުގައި ތަފާތުކުރުން ގެންގުޅޭ ކަމުގެ ޝަކުވާ ވަރަށް ގިނައިން ލިބިފައިވާ ކަމަށެވެ.
ވިސާމް އިތުރަށް ވިދާޅުވީ އާންމުންނަށް މިފަދަ އެއްވެސް ކަމެއްގައި ދައްޗެއް ކުރިމަތިވާ ކަމުގައި ވަނީނަމަ، އެ ވުޒާރާއަށް ޝަކުވާ ހުށައެޅޭނެ ކަމަށެވެ. ޝަކުވާ ހުށައަޅަން އީމެއިލްގެ ޒަރިއްޔާއިން ފޮނުވަން ޖެހެނީ consumer@trade.gov.mv އަށެވެ.
ކޮންސިއުމަރ ޕްރޮޓެކްޝަން ގާނޫނު (މުދާ ގަންނަ ފަރާތްތަކާއި ހިދުމަތް ލިބިގަންނަ ފަރާތްތައް ހިމާޔާތްކުރުމުގެ ގާނޫނު) ގައިވާ ގޮތުން، ނަހަމަގޮތެއްގައި ވަކިފަރާތެއް ތަފާތުކޮށްގެން ނުވާނެ އެވެ. އެ ގާނޫނާ ހިލާފުވެއްޖެނަމަ، އަދަބެއްގެ ގޮތުގައި 500ރ. އާއި 100،000ރ. އާ ދޭތެރޭގެ އަދަދަކުން އެ ވިޔަފާރިއެއް ޖޫރިމަނާ ކުރުމުގެ އިޙްތިޔާރު އިކޮނޮމިކް މިނިސްޓްރީއަށް ލިބިގެންވެ އެވެ.
މިފަދަ ކުށްތައް ތަކުރާރުކުރާ ފަރާތްތަކުގެ ވިޔަފާރި ހަ މަސް ދުވަހަށް ވުރެ ދިގުނޫން މުއްދަތަކަށް އެ ވިޔަފާރިއެއް ބަންދުކުރުން ނުވަތަ އެ ފަރާތަކަށް ދޫކޮށްފައިވާ ވިޔަފާރި ކުރުމުގެ ހުއްދަ 6 މަސް ދުވަހަށް ވުރެ ދިގުނޫން މުއްދަތަކަށް ބާތިލްކުރުމުގެ އިޙްތިޔާރު ވެސް މިނިސްޓްރީއަށް ލިބެ އެވެ.
ވިޔަފާރިކުރަން އަންނަ ބައެއް ފަރާތްތަކުގެ މެދުގައި ތަފާތުކުރުން ގެންގުޅޭ ކަމަށް ލިބިފައިވާ ޝަކުވާތަކާއި ގުޅިގެން އިކޮނޮމިކް މިނިސްޓްރީން ވިޔަފާރިތަކަށް އިލްތިމާސްކޮށްފައި މިވަނީ، މި ދަނޑިވަޅުގައި މިފަދަ ކަންކަން ކުރާ ކަމުގެ ޝަކުވާތައް ގިނަވެފައިވާ ދަނޑިވަޅެއްގަ އެވެ. އަދި ބިދޭސީއަކަށް ވީތީ ތަފާތުކުރާ ކަމަށް ބުނެ ސޯޝަލް މީޑިއާގައި ވެސް ބައެއް ޕޯސްޓްތައް ދައުރުވަމުން އެބަދެ އެވެ.
