ރައީސްގެ އިލްތިމާސް: ދީލަތިކަމާއި އޯގާތެރިކަން އިސްކުރައްވާ! އިންސާނިއްޔަތުކަން އިސްކުރައްވާ!
23 އެޕްރީލު 2020 | ބުރާސްފަތި 14:49އެކަކު އަނެކަކަށް އެހީތެރިވުމަށް ރައީސް އިލްތިމާސްކުރެއްވި
ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު
ކޮވިޑް-19ގެ ސަބަބުން ވަރަށް ގިނަ ބަޔަކު ދަތި ހާލުގައި އުޅެމުންދާކަމަށާއި، ދީލަތިކަމާއި އޯގާތެރިކަން އިސްކުރެއްވުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
1441 ވަނަ އަހަރުގެ ރަމަޟާން މަސް ފެށުމުގެ މުނާސަބަތުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ދެއްވި ޚިޠާބުގައި އެމަނިކުފާނު ވިދާޅުވީ، މުޅި ދުނިޔޭގެ އިޤްތިޞާދު ދަށްވެ އެކަމުގެ ނަތީޖާ ރާއްޖެއަށްވެސް ކުރިމަތިވެފައިވާކަމަށާއި ވަރަށް ދަތި ޙާލުގައި އުޅޭ މީހުން އެބަތިބިކަމަށެވެ. އެގޮތުން މާލީ ގޮތުންނާއި ބޯހިޔާވަހިކަމުގެ ގޮތުން ވަރަށް ނިކަމެތި ޙާލުގައި ދިރިއުޅޭ ފަރާތްތަކާއި ޞިއްޙީ ގޮތުންވެސް ވަރަށް ނާޒުކު ޙާލަތުގައި އުޅޭ ބަޔަކު އެބަތިބިކަމަށް ރައީސް ވަނީ ފާހަގަކުރައްވާފައެވެ.
ދިރިއުޅުމުގެ ޒަރޫރީ ބޭނުންތައް ފުއްދުމަށް ހުރަސްއެޅިފައިވާ މީހުން އެބަތިބިކަން ފާހަގަކުރައްވައި ރައީސް ސޯލިހު ވަނީ ދީލަތިކަމާއި އޯގާތެރިކަން އިސްކޮށް، މީހުންނަށް އެހީތެރިކަން ފޯރުވައި، އަޅައިލާ މައްސަވަރަކަށް ރަމަޟާމް މަސް ހެދުމަށް އިލްތިމާސްކުރައްވާފައެވެ. އަދި އިންސާނިއްޔަތުކަމުގެ މާތް ސިފަ ކުރިއަށް ނެރެ، ދުވަސްމީހުންނާއި ބަލި މީހުންނަށް ހެޔޮ ފޯރުވައި އުޅެން އިސްކަން ދިނުމަށް ރައީސް ސޯލިހު ވަނީ އިލްތިމާސްކުރައްވާފައެވެ.
ރައީސް އިތުރަށް ވިދާޅުވީ، އަޅުގަނޑުމެންނަށް ކުރިމަތިވެފައިމިވާ ދަތި ޙާލަތުގައި، އަނެކުންގެ ހިތާމަތައް ފިލުވައިދީ، ދީލަތިވެ އެހީތެރިކަން ފޯރުވުމަކީ، މި މާތް މައްސަރުގެ ދަރުމައާއި ޘަވާބު ފުރިހަމަ ގޮތުގައި ހޯދުމަށްޓަކައިވެސް ސަމާލުކަން ދޭންޖެހޭކަމެއްކަމަށެވެ. އަދި ކޮވިޑް-19 ބަލިމަޑުކަމުން އަރައިގަތުމަށް ކުރާ މަސައްކަތް ކާމިޔާބު ކުރުމުގައި، ރައްޔިތުންގެ އެހީތެރިކަން ސަރުކާރަށް ބޭނުންވާކަމަށާއި އަތުގައި ހުރި ފުދުންތެރިކަމާއި ވަސީލަތްތައް، އެންމެ ފުރިހަމައަށް އިޤްތިޞާދުކޮށް، އިސްރާފުކުރުމާ މުޅިން ދުރުހެލިވާންވީ އެންމެ މުހިންމު ވަގުތުކަމަށް ރައީސް ވަނީ ވިދާޅުވެފައެވެ.
