ނިއުކާސަލް ވިއްކާލުމާ ދެކޮޅަށް އެމްނެސްޓީ ތެދުވެއްޖެ

ސައުދީ އަރަބިއްޔާގެ ހިއްސާ ބޮޑު ކުންފުންޏަކަށް އިނގިރޭސި ޕްރިމިއާ ލީގުގެ ނިއުކާސަލް ޔުނައިޓެޑް ވިއްކާލުމާ ދެކޮޅަށް އިންސާނީ ހައްގުތަކަށް މަސައްކަތްކުރާ ޖަމިއްޔާ, އެމްނެސްޓީ އިންޓަނޭޝަނަލުން އިންޒާރެއް ދީފި އެވެ.

ސައުދީގެ އިންވެސްޓަރުންގެ ބޮޑު ހިއްސާއަކާ އެކު 300 މިލިއަން ޕައުންޑަށް ނިއުކާސަލް ގަންނަން މަސައްކަތް ކުރަމުން އަންނަނީ އަމަންޑާ ސްޓަވިލީސްގެ ޕީސީޕީ ކެޕިޓަލް ޕާޓްނާސް އިންނެވެ. އަމަންޑާއާ އެކު ނިއުކާސަލް ގަތުމުގައި ހިއްސާވަނީ ސައުދީ ވަލީ އަހުދު މުހައްމަދު ބިން ސަލްމާނެވެ. އެގޮތުން ސައުދީ ވަލީ އަހުދު މުހައްމަދު ބިން ސަލްމާނަށް 80 އިންސައްތަ ހިއްސާ ލިބޭއިރު، ބާކީ 20 އިންސައްތަ ބެހިފައި އޮތީ އަމަންޑާ އާއި ރިއުބެން ބްރަދާސްގެ ތެރެއިން ކޮންމެ ބަޔަކަށް 10 އިންސައްތަ ލިބޭ ގޮތަށެވެ.

ނިއުކާސަލް ވިއްކާލުމުގެ ފުރަތަމަ މަރުހަލާ ނިމުމަކާ ގާތްވެފައިވާއިރު، ސައުދީ ވަލީ އަހުދު މުހައްމަދު ބިން ސަލްމާން މެދުވެރިކޮށް ވަނީ ރިފަންޑް ނުކުރެވޭގޮތަށް، އެ ކްލަބުގެ މިހާރުގެ ވެރިޔާ މައިކް އޭޝްލީ އަށް މިހާރުގެ ޚަރަދުތަކަށް 17 މިލިއަން ޕައުންޑް ދީފަ އެވެ.

އެމްނެސްޓީން ވަނީ ނިއުކާސަލް ވިއްކާލުމުގެ ކަންތައްތަކުގެ ފުރިހަމަ ތަހުގީގެއް ކުރަން ޕްރިމިއާ ލީގަށް ގޮވާލާފަ އެވެ. އަދި އެ ޖަމިއްޔާއިން ތުހުމަތުކުރާ ގޮތުގައި ސައުދީން އިސްވެ ކުޅިވަރު ހަރަކާތްތަކަށް އިންވެސްޓްކުރަނީ އެ ގައުމުން އިންސާނިއްޔަތާ ޚިލާފަށް ހިންގާ އަމަލުތައް ފޮރުވުމުގެ ގޮތުންނެވެ.

ނިއުކާސަލް ވިއްކާލުމާ ދެކޮޅަށް އެންމެ ފަހުން ވާހަކަ ދައްކާފައިވަނީ ޕްރިމިއާ ލީގު ބްރޯޑްކާސްޓް ކުރަމުން އަންނަ ބެއިން ސްޕޯޓްސް އިންނެވެ. ބެއިން ސްޕޯޓްސް އިން ބުނީ ސައުދީން ގަވާއިދާ ޚީލާފަށް ޕްރިމިއާ ލީގު އެ ގައުމުގައި ދައްކަމުން އަންނަ ކަމަށާއި، އެކަމުގެ ސަބަބުން ކްލަބުތަކަށް ވެސް މާލީ ގޮތުން ގެއްލުންވާ ކަމަށެވެ. އެއާއެކު ބެއިން ސްޕޯޓްސްއިން ވަނީ ޕްރިމިއާ ލީގުގެ ހުރިހާ ކްލަބަކުން ނިއުކާސަލް ވިއްކާލުމާ ދެކޮޅަށް މަސައްކަތް ކުރުމަށް ގޮވާލާފަ އެވެ.

ނިއުކާސަލްގެ ހިއްސާ ގަތުމަށް ސައުދީ ވަލީ އަހުދު މުހައްމަދު ބިން ސަލްމާން މަސައްކަތް ކުރައްވަމުން އަންނައިރު، ޕްރިމިއާ ލީގުގައި ވާދަކުރަމުން އަންނަ ޝެފީލްޑް ޔުނައިޓެޑަކީ ސައުދީ ވަލީ އަހުދު އަބްދުﷲ ބިން މޫސާގެ ފުރިހަމަ ހިއްސާ އޮންނަ ކްލަބެކެވެ.