މާދަމާވެސް މަޖިލީހުގެ ޖަލްސާއެއް ބާއްވަނީ، ކައުންސިލްތަކުގެ އިންތިހާބާގުޅޭ "ސަންސެޓް ބިލް"އަށް ބަހުސްކުރުން
އަންނަ އަހަރުގެ ޖެނުއަރީ 6 ގެ ކުރިން ލޯކަލް ކައުންސިލްތަކުގެ އިންތިހާބު ބާއްވަންޖެހޭ
ރައްޔިތުންގެ މަޖިލީހުގެ ޖަލްސާއެއްގެ ތެރެއިން
ރައްޔިތުންގެ މަޖިލީހަށް ހުށަހަޅާފައިވާ "ސަންސެޓް ބިލް" އެއްކަމަށްވާ، ލޯކަލް ކައުންސިލްތަކުގެ އިންތިހާބާގުޅޭ ހާއްސަ ބިލަށް ބަހުސް ކުރުމަށްޓަކައި ބުރާސްފަތި ދުވަހު މަޖިލީހުގެ ޖަލްސާއެއް ބޭއްވުމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ނިންމަވައިފި އެވެ.
ރައްޔިތުންގެ މަޖިލީހުގެ ބުދަ ދުވަހުގެ ޖަލްސާ ނިންމާލައްވަމުން މަޖިލީހުގެ ރައީސް މުހައްމަދު ނަޝީދު ވަނީ، މަޖިލީހުން މިވަގުތު ވަރަށް އަވަހަށް ނިންމަންޖެހޭ މުހިއްމު ބިލްތަކެއް އެބަހުރި ކަމަށާއި ކުރައްވަންޖެހޭ މުހިއްމު މަސައްކަތްތަކެއް ވެސް ހުރުމުން ބުރާސްފަތި ދުވަހު މަޖިލީހުގެ ޖަލްސާއެއް އޮންނާނެ ކަމަށެވެ.
ބުދަ ދުވަހުގެ ޖަލްސާ ނިންމަވާލެއްވިއިރު، ޖަލްސާގައި ކުރިއަށް ގެންދެވިފައިވަނީ، މަޑުއްވަރީ ދާއިރާގެ މެންބަރު ހުށަހެޅުއްވު ކުއްލި މައްސަލަ، މަޖިލީހަށް ބަލައިގަތުމާއި އެމައްސަލައަށް މެމްބަރުން ބަހުސްކުރުމެވެ.
ކުއްލި މައްސަލައަށް ބަހުސް ކުރެއްވުމަށްފަހު، ބުދަ ދުވަހުގެ ޖަލްސާގައި ވަނީ ސަރުކާރުގެ ފަރާތުން ތުޅާދޫ ދާއިރާގެ މެމްބަރު ހިސާން ހުސައިން ހުށަހެޅުއްވި، "ލޯކަލް ކައުންސިލްތަކުގެ އިންތިޚާބުގެ ޚާއްޞަ ބިލު 2020" ބިލް މަޖިލީހަށް ހުށަހެޅުމާއި އެބިލަށް ބަހުސް ކުރުމަށް ފުރުސަތު ހުޅުވާލައްވާފަ އެވެ. ނަމަވެސް ބުދަ ދުވަހުގެ މަޖިލީހުގެ ވަގުތު ހަމަވިއިރު، އެބިލަށް ބަހުސް ކުރުމުގެ ފުރުސަތު ދެވިފައިވަނީ ބާރަށު ދާއިރާގެ މެމްބަރު އަހުމަދު އަބްދުﷲ އަށް އެކަންޏެވެ.
އެބިލަކީ މަޖިލީހުން ވަރަށް އަވަހަށް ނިންމަންޖެހޭ ބިލެއްކަމަށްވާތީ، މަޖިލީހުގެ ރައީސް ވަނީ ބުރާސްފަތި ދުވަހު އެބިލަށް ބަހުސް ކުރެއްވުން ތާވަލް ކުރައްވާނެ ކަމުގެ އިޝާރާތެއް ކުރައްވާފަ އެވެ.
ލޯކަލް ކައުންސިލްތަކުގެ އިންތިހާބު ބާއްވާނެ ވަކިދުވަހެއް ކަނޑައެޅުމާއި، އަދި މިހާރު ހިނގަމުންދާ ކައުންސިލްތަކުގެ ދައުރު އަންނަ ޖޫން މަހުގެ 3 ވަނަ ދުވަހަށް ހަމަވާއިރު، ރަށު ކައުންސިލްތަކުގެ އިދާރާތަށް އޭގެ ފަހުން ހިންގާނެ ގޮތަކާމެދު މަޖިލީހުން ގޮތްތަކެއް ފާސްކުރަންޖެހެ އެވެ.
މިކަމާ ގުޅިގެން ރައްޔިތުންގެ މަޖިލީހަށް ހުށަހެޅިފައިވާ ބިލުތަކުގެ ތެރެއިން އެއްބިލަކީ މިހާރު ހިނގަމުންދާ ކައުންސިލްތަކުގެ ދައުރު އިތުރުކުރުމަށް، ސަރުކާރުގެ ފަރާތުން ބިލެތްދޫ ދާއިރާގެ މެންބަރު އަހްމަދު ހަލީމް ހުށަހަޅުއްވާފައިވާ، ޤާނޫނު ނަންބަރު 22/2019 (ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއަށް 5 ވަނަ އިޞްލާޙު ގެނައުމުގެ ޤަނޫނު)އަށް އިޞްލާޙު ގެނައުމުގެ ބިލެވެ. އެބިލަކީ މިހާރު ހިނގަމުންދާ ކައުންސިލްތަކުގެ އުމުރު އިތުރުކުުރުކުރުމަށް ހުށަހަޅާފައިވާ ބިލެކެވެ.
ދެން އޮތީ، ހެންވޭރު ހުޅަނގު ދާއިރާގެ މެންބަރު ހަސަން ލަޠީފް ހުށަހަޅުއްވާފައިވާ، "ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުން ކަށަވަރުކުރުމުގެ ޚާއްޞަ ބިލު 2020" ބިލް" އެވެ. މިބިލް ހުށަހެޅުމުގެ މަޤުޞަދަކީ މިހާރު ހިނގަމުންދާ ކައުންސިލްތަކަކީ ޤާނޫނުއަސާސީއާއި، ޤާނޫނުގައިވާގޮތުގެމަތީން އިންތިޚާބުކޮށްފައިވާ ކައުންސިލްތަކަކަށްވާއިރު، ޤާނޫނީ ހުސްކަމެއް ކުރިމަތިނުވެ، ޤާނޫނުއަސާސީގެ 230 ވަނަ މާއްދާއިން ލާޒިމުކުރާގޮތުގެ މަތީން ލާމަރުކަޒީ އުޞޫލުން ދިވެހިރާއްޖޭގެ އިދާރީ ދާއިރާތައް ހިންގުމެވެ. މި ބިލުގައިވާ ގޮތުން އިދާރީ ދާއިރާތައް ލާމަރުކަޒީ އުޞޫލުން ހިންގުމަކީ ޤާނޫނުއަސާސީގެ 230 ވަނަ މާއްދާގެ ދަށުން ލާޒިމުކަމެއްކަމަށްވާއިރު ދިވެހިރާއްޖޭގެ އިދާރީ ދާއިރާތައް އަބަދުމެ ހިންގަމުން ގެންދަނީ ޤާނޫނުއަސާސީގެ 8 ވަނަ ބާބުގައި ބަޔާންކޮށްފައިވާ ގޮތުންކަން ކަށަވަރުކުރުމަކީ ދައުލަތުގެ މައްޗަށް ލާޒިމުކަމެއްކަމަށްވާތީ އެކަމަށް ހައްލެއް ގެނައުމަށް ހުށަހަޅުއްވާފައިވާ ބިލެކެވެ.
