ބަންގްލަދޭޝްގެ ބޮޑުވަޒީރު ޝައިހް ހަސީނާ ވަޒެދްއަށް ފޯނުން ގުޅުއްވައި، ރައީސް އިބްރާހިމް މުހައްމަދު ސޯލިހް ޝުކުރު އަދާ ކުރައްވައިފި އެވެ.
ރައީސް ސޯލިހު ބުދަ ދުވަހު ފޯނުން ގުޅުއްވާ ދެއްކެވި ވާހަކަފުޅުގައި، ދެ ބޭފުޅުންވެސް ވަނީ ދުނިޔެއަށް ކުރިމަތިވެފައިވާ މި ނުރައްކާތެރި ޙާލަތުން އަރައިގަތުމަށް ދެ ޤައުމުންވެސް އަޅާފައިވާ އަދި އަޅަމުންގެންދާ ހަރުދަނާ ފިޔަވަޅުތަކާ ބެހޭގޮތުން ވާހަކަފުޅު ދައްކަވާފައެވެ.
މީގެ އިތުރުން ރައީސް ސޯލިހު ވަނީ ބޭރުގައި ތާށިވެފައި ތިބި ދިވެހިން ރާއްޖެ ގެނެސް ދިނުމާއި ބަންގްލަދޭޝް އިން ފޯރުކޮށްދިން އެހީތަކަށް އެ ގައުމުގެ ސަރުކާރާއި ރައްޔިތުންނަށް ޝުކުރު އަދާ ކުރައްވާފައެވެ.
ކޮވިޑް-19 ޕެންޑަމިކްއާ ގުޅިގެން ކާޑުގެ ބާވަތްތަކާއި، ބޭހައި އަދި މެޑިކަލް އިކުއިޕްމަންޓުތަކެއް ހިމެނޭގޮތަށް 100 ޓަނުގެ ހިލޭ އެހީ، ބަންގްލަދޭޝް ސަރުކާރުން ރާއްޖެއަށް ބުދަ ދުވަހު ފޯރުކޮށްދީފައި ވެއެވެ. އަދި ބަންގްލަދޭޝް އިން ވަނީ އެ ގައުމާއި ނޭޕާލްގައި ތާށިވެފައި ތިބި 71 ދިވެހިން ރާއްޖެ ގެނެސްފައިވާއިރު، ބަންގްލަދޭޝްގެ މެޑިކަލް ޓީމެއް ވެސް ރާއްޖޭ ގެނެސްފައި އެވެ.
