ރާއްޖޭގައި ނަތީޖާ ކަށަވަރު ނުވާ 2 މީހުން، އަމަލުކުރާނީ ޕޮޒިޓިވް ކޭސް އެކޭ އެއްގޮތަށް: މަބްރޫކް
22 އެޕްރީލު 2020 | ބުދަ 07:09ޕޮޒިޓިވްވިކަމަށް ބަލައިގަންނަ 3 ކެޓަގަރީއެއް ޑަބްލިއުއެޗްއޯއިން ކަނޑައަޅާފައިވޭ
ކޮވިޑް-19 ގެ ޓާސްކް ފޯހުގެ ތަރުޖަމާން މަބްރޫކް އަޒީޒު
ކޮވިޑް-19 އަށް ޝައްކު ކުރެވިގެން ޓެސްޓްތައް ހެދުމުންވެސް ނަތީޖާ ކަށަވަރުނުވާ ދެމީހަކު ރާއްޖޭގައި އެބަތިބި ކަމަށް ކޮވިޑް-19 ގެ ޓާސްކް ފޯހުގެ ތަރުޖަމާން މަބްރޫކް އަޒީޒު ވިދާޅުވެއްޖެ އެވެ.
ކޭސްތަކާއިމެދު އަމަލުކުރަމުންދާ ގޮތުގެ މައުލޫމާތު ދެއްވަމުން މަބްރޫކް ވިދާޅުވީ ކޮވިޑް-19 އަށް މީހުން ޕޮޒިޓިވްވިކަމަށް ބަލައިގަންނަ 3 ކެޓަގަރީއެއް ޑަބްލިއުއެޗްއޯއިން ކަނޑައަޅާފައިވާ ކަމަށެވެ. މަބްރޫކް ވިދާޅުވީ ބައްޔަށް ޕޮޒިޓިވްވިކަމަށް ބަލާ އެންމެ ފުރަތަމަ ކެޓަގަރީއަކީ ޝައްކުކުރެވޭ ކޭސްތައް ކަމަށެވެ. އެއީ ބަލިމީހާގެ ރެސްޕިރޭޓަރީ ބައްޔެއް ނުވަތަ ކޮވިޑް-19އަށް ޝައްކުކުރެވޭ ޢަލާމާތްތައް ހުންނަ މީހުންނެވެ. ދެވަނަ ކެޓަގަރީއަކީ "ކޮންފާރމްޑް" ޓެސްޓް ހެދުމަށްފަހު ނުވަތަ ހަދާ ޓެސްޓްތަކުން ޕޮޒިޓިވް ނަތީޖާ ކަށަވަރުވާ ކޭސްތައް ހިމެނޭ ބައެކެވެ.
މަބްރޫކް ވިދާޅުވީ ރާއްޖޭގައި އެންމެ ފަހަކާ ޖެހެންދެން ފެންނަމުން ދިޔައީ މިދެކެޓަގަރީގެ ކޭސްތައް ކަމަށެވެ. ޕޮޒިޓިވްވިކަމަށް ނިންމާ ތިންވަނަ ކެޓަގަރީއަކީ "ޕްރޮބަބަލް ކޭސް" ނުވަތަ އެމީހެއްގެ ޓެސްޓް ހެދުމަށްފަހު ނަތީޖާ ކަށަވަރު ނުވާ ނަތީޖާ ނިކުންނަ ކެޓަގަރީކަމަށް މަބްރޫކް ވިދާޅުވިއެވެ. މިހާތަނަށް ރާއްޖެއިން އޭގެ ދެ މީހުން ފެނިފައިވާކަމަށް މަބްރޫކް ވިދާޅުވި އެވެ. މިފަދަ މީހުންނާ މެދުވެސް ޢަމަލުކުރާނީ ޕޮޒިޓިވް މީހުންނާ މެދުވެސް ޢަމަލުކުރާ އުސޫލުންކަމަށް މަބްރޫކް ވިދާޅުވިއެވެ.
ރާއްޖޭގައި މިހާތަނަށް 86 މީހުންނަށް ކޮވިޑް-19 ޖެހިފައިވެ އެވެ.
